ރުޅިއައިސްގެން ގެއިން ނުކުމެގެން ދިޔަ އަންހެނަކު ގެއްލިގެން ހޯދަން ފަށައިފި އެވެ.
ފުލުހުން މިއަދު ބުނީ މާލެއިން ގެއްލިގެން ހޯދަމުން އަންނަނީ ޅ. ނައިފަރު، ކަށިމާގެ، ފާތިމަތު ނޫރާ 32، ކަމަށެވެ.
އޭނާ ރޭ އަށެއް ޖެހިއިރު ގެއިން ބޭރަށް ދިޔަ ފަހުން ހަބަރެއް ނުވެ، ގެއްލިފައިވާ ކަމަށް ފުލުހުންނަށް ރިޕޯޓުކުރީ ރޭ 12:19 ހާއިރު އާއިލާއިންނެވެ.
އެ މައްސަލަ ރިޕޯޓްކުރުމުން ފުލުހުންގެ ކަމާ ގުޅުން ހުރި ހުރިހާ އިދާރާތަކަށް އެ މައުލޫމާތު ހިއްސާކޮށް، އޭނާ ހޯދުމުގެ މަސައްކަތް ކުރަމުން ދިޔަ ނަމަވެސް މިހާތަނަށް ކުރެވުނު މަސައްކަތުން އޭނާ ފެނިފައި ނުވާ ކަމަށް ފުލުހުން ބުންޏެވެ.
ނޫރާގެ އާއިލާ މީހަކު ފޭސްބުކުގައި ކޮށްފައިވާ ޕޯސްޓެއްގައި ބުނެފައިވާ ގޮތުގައި ރޭ އޭނާ ގެއިން ނުކުތީ ރުޅިއައިސްގެން "މިދަނީ މަރުވާން" ކަމަށް ބުނެ އެވެ.
"ކޮއްކޮއަކީ ފިޓު ޖެހޭ، ސިކުނޑީގެ މައްސަލަ ހުންނަ ކުއްޖެއް. އެންމެ ފަހުން ފިޓު ޖެހުނު ދުވަހު ވެއްޓި ސިކުނޑިއަށް ލިބުނު އަނިޔާގެ ފަހުން މާ ބޮޑަށް ރުޅި ގަދަވަނީ. ރޭ ފިރިމީހާ ދެކެ ރުޅިން، ކޯކު ފުޅިއެއް ވަރާލީމާ އެތަން ސާފު ކުރަން ފިރިމިހާ ވަތް ވަގުތު ނިކުމެގެން ދިޔައީ،" އެ ޕޯސްޓުގައިވެ އެވެ.
އޭނާ އެންމެ ފަހުން ލައިގެން ހުރީ ގަދަ މުށި ކުލައިގެ ޓޮޕެއް ކަމަށް ވެސް އެ ޕޯސްޓުގައި ބުނެފައި ވެ އެވެ.
ނޫރާއާ ބެހޭ އެއްވެސް މައުލޫމާތެއް ލިބިފައިވާނަމަ ގަލޮޅު ޕޮލިސް ސްޓޭޝަން ނަމްބަރު 9631696 އަށް ނުވަތަ ފުލުހުންގެ ހޮޓްލައިން ނަމްބަރު 3322111 އަށް ގުޅުމަށް ފުލުހުން ވަނީ އެދިފަ އެވެ.