މާފުށީގައި ހުންނަ ރާއްޖޭގެ އެންމެ ބޮޑު ޖަލުގައި ބޮޑީ ސްކޭނިން މެޝިނެއް ބަހައްޓައި، ބޭނުންކުރަން ފަށާފައިވާއިރު، ޖަލަށް ވެއްދުމަށް މަސައްކަތްކުރާ އެއްޗެހި އޭގެ ސަބަބުން އަތުލައިގަނެ، ސްކޭމް މައްސަލަތަކަށް ހައްލެއް އަންނާނެ ކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ.
އެ މިނިސްޓްރީން ބޭއްވި ޕްރެސް ކޮންފަރެންސްގައި މިނިސްޓަރު އިހުސާން ވިދާޅުވީ މި ސަރުކާރު ވެރިކަމާ ހަވާލުވިއިރު ރާއްޖޭގެ ރައްޔިތުންނަށް ކުރިމަތިވެފައި އޮތް އެންމެ ބޮޑު ދުއްތުރާއަކަށްވީ، ޖަލުތަކުގައި ގައިދީން ފޯނު ބޭނުންކޮށްގެން ސްކޭމް ކުރާ މައްސަލަ ކަމަށެވެ.
އެހެންވެ، އެކަން ހުއްޓުވުމަށް ތަފާތު އެކި މަސައްކަތްތައް ކުރަމުން އަންނަ ކަމަށް ވިދާޅުވި އެވެ.
އިހުސާން ވިދާޅުވި ގޮތުގައި ސެންޓްރަލް ޕްރިޒަން ކޮމްޕްލެކްސެއް ހަދައި، އެއީ އިންޓަނޭޝަނަލް މިންގަނޑުތަކަށް ފެތޭ ސެކިއުރިޓީ ވަރުގަދަ ތަންތަނަށް ހެދުމަށް މަސައްކަތްތަކެއް ކުރާ ކަމަށެވެ.
އެކަމަކު އެ ތަނުގެ މަސައްކަތް ނިމެންދެން ވެސް ޖަލުތަކުގެ ވަސީލަތްތައް ރަނގަޅުކޮށް ސެކިއުރިޓީ ބްރީޗުތައް ހައްލުކުރުމަށް މަސައްކަތް ކުރަމުން އަންނަ ކަން ފާހަގަކުރައްވައި އިހުސާން ވިދާޅުވީ މިމަހު ވަނީ މާފުށީ ޖަލުގައި ބޮޑީ ސްކޭނިން އިންސްޓޯލް ކޮށްފައި ކަމަށެވެ.
އޭގެ ސަބަބުން ގައިދީންނާއި އެ މީހުންނާ ބައްދަލުކުރުމަށް އަންނަ މީހުންގެ އިތުރުން ޖަލުތައް ބަލަހައްޓާ އޮފިސަރުން ވެސް ސްކޭން ކުރާނެ ކަމަށް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ، ހަށިގަނޑުގެ ކޮންމެ ތަނެއްގައި އެއްޗެއް ފޮރުވާފައި ބެހެއްޓިޔަސް އެ މެޝިނުގެ އެހީގައި ފެންނާނެ ކަމަށެވެ.
"މި މަހު ވަނީ ބޮޑީ ސްކޭނިން އިންސްޓޯލް ކުރެވި، މާފުށީ ޖަލަށް ވަދެ ނިކުމެ ހަދާ ގައިދީންނާ ބައްދަލުކުރުމަށް ދާ އާއިލާގެ ފަރާތްތަކާއި އަދި ބަލަހައްޓާ ފަރާތްތައް ވެސް 100 ޕަސެންޓް ސްކޭން ކުރެވިގެން ހަށިގަނޑުގެ ކޮންމެ ތާކު ކޮންމެ އެއްޗެއް ފޮރުވާފައި އޮތަސް އެ ފެންނަ ގޮތަށް ސްކޭން މެޝިން އިންސްޓޯލް ކުރެވި މިހާރު ވަނީ ހިދުމަތަށް ނެރެފައި،" އިހުސާން ވިދާޅުވި އެވެ.
އޭގެ ސަބަބުން މާފުށީ ޖަލުގައި ހިންގަމުން އައި ސްކޭމް ކޯލްތަކުގެ މައްސަލަ ވަރަށް ބޮޑަށް ހައްލުވާނެ ކަމަށް ވިދާޅުވި އެވެ.
ރާއްޖޭގައި ކޮންމެ އަހަރަކު ފޯންކޯލްތަކުގެ ޒަރިއްޔާއިން ހިންގާ ސްކޭމްތަކުގައި ޖެހި، އެކި މީހުންގެ އަތުން އެތައް މިލިޔަން ރުފިޔާއެއް ގެއްލެ އެވެ. އޭގެ ތެރެއިން ގިނަ ކޯލްތަކަކީ ގައިދީން ކުރާ ކޯލުތަކެވެ.
މިނިސްޓަރު ވިދާޅުވީ މި ރޯދަމަހުގައި ޖަލަށް ހާފިޒުން ގޮސްގެން، އެ ތަނުގައި ތަރާވީހު ނަމާދުކުރަން ފަށާފައިވާ ކަމަށެވެ.
ގައިދީންނާއި އޮފިސަރުން ބައިވެރިކޮށްގެން ތަރާވީހު ނަމާދުކުރަމުން އަންނައިރު އިހުސާން ވިދާޅުވީ އެއީ ޖަލުގައި ހޭދަކުރާ މުއްދަތު ނިމިގެން މުޖުތަމައަށް ނިކުންނައިރު، އެއީ މުޖުތަމައު ބަލައިގަންނަ ބަޔަކަށް ހެދުމަށް ސަރުކާރުން ކުރަމުން އަންނަ މަސައްކަތުގެ ދަށުން ފަށާފައިވާ ކަމެއް ކަމަށް މިނިސްޓަރު ވިދާޅުވި އެވެ.