ބަންޑާރަ މިސްކިތް ހުރި ބިމުގައި ޒަމާނީ ބޮޑު މިސްކިތެއް އަޅަން ނިންމުމުން އަމާޒުވި އާއްމުންގެ ފާޑުކިޔުންތަކާއެކު އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދުގެ ރާގު ބަދަލުވެއްޖެ އެވެ.
އިސްލާމިކް މިނިސްޓްރީގެ މީޑިއާ ގްރޫޕުގައި ޝަހީމް އިއްޔެ ވިދާޅުވީ ބަންޑާރަ މިސްކިތް ހުރި ތަނުގައި ޒަމާނީ ބޮޑު މިސްކިތެއް އަޅަން ރޯދަމަހަށްފަހު ފަށާނެ ކަމަށެވެ. އެކަމަށް ހިނގާނެ ހަރަދުތައް ދީލަތި ފަރާތަކުން ހަމަޖައްސައިދީފައިވާ ކަމަށް އޭނާ ވިދާޅުވި އެވެ.
"މިއާއެކު މާލޭގެ ބޮޑެތި ހުރިހާ މިސްކިތެެއް އާވެގެން ދިޔައީ. الحمد لله،" ޝަހީމްގެ މެސެޖުގައިވެ އެވެ.
މީޑިއާތަކުގައި އެ ހަބަރު ޖެހުމާއެކު، ތާރީހު ދިރާސާކުރާ މީހުންނާއި އާއްމުންގެ ގިނަ ބަޔަކު ކަންބޮޑުވުން ފާޅުކުރި އެވެ.
އެއާއެކު، ޝަހީމް "އެކްސް"ގައި ރޭ ކުރެއްވި ޕޯސްޓުގައި ވިދާޅުވީ ބަންޑާރަ މިސްކިތް ހުރި ތަނުގައި ބޮޑު މިސްކިތެއް އަޅަން ނިންމީ ރާއްޖޭގެ އާސާރީ ތަރިކައިގެ މިސްކިތްތަކުގެ ތެރޭގައި އެ ތަން ހިމެނިފައި ނެތުމުން ކަމަށެވެ. އަދި މިނިސްޓްރީން ކަންކަން ކުރާނީ ރައްޔިތުންގެ އަޑުއަހާފައި ކަމަށް ވެސް އޭނާ ވިދާޅުވި އެވެ.
"އެއާ އެއްގޮތަށް، އާ މިސްކިތެއް ބިނާކުރުމާމެދު ފުޅާ ދާއިރާއެއްގައި މަޝްވަރާކުރާން ބޭނުން،" ޝަހީމް ވިދާޅުވި އެވެ.
މާލޭގެ އުތުރު ފަރާތުގައި އެ މިސްކިތް ބިނާކުރީ މީގެ 100 ވަރަކަށް އަހަރު ކުރިންނެވެ. އެ ތަނަށް އޭރު ކިޔައި އުޅުނީ ބުމްބާ މިސްކިތެވެ. ނަމަވެސް ފަހުން އެ ތަނުގެ ނަން ބަންޑާރަ މިސްކިތަށް ބަދަލުކުރީ އެވެ.