އަންހެނުންގެ ތަރައްގީއަށް އެންމެ މަސައްކަތްކުރާ ސަރުކާރަކީ މިއީ ކަމަށާއި އެ މަސައްކަތުގެ ދަށުން އަންހެނުންގެ ތަރައްގީއަށް މަސައްކަތްކުރާ ކޮމިޓީ ތަރައްގީކޮށްދީފައި ވަނީ ވެސް މި ސަރުކާރުން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އަންނަ މަހު ހަތަރެއްގައި ބާއްވާ ލޯކަލް ކައުންސިލް އިންތިހާބަށް ޕީއެންސީގެ "ދަ ގްރޭޓާ އައްޑޫ" ކެމްޕެއިން އިފުތިތާހުކުރުމަށް ބޭއްވި ޖަލްސާގައި ރައީސް ވަނީ މިއަދު ފާހަގަކުރާ ބައިނަލްއަގްވާމީ އަންހެނުންގެ ދުވަހުގެ ތަހުނިޔާ ފޮނުއްވައިފަ އެވެ.
އެ ޖަލްސާގައި ރައީސް ވިދާޅުވީ އަންހެނުންގެ ތަރައްގީއަށް މަސައްކަތްކުރާ ސަރުކާރެއްކަން ނަތީޖާއިން ދައްކަވާފައިވާ ކަމަށެވެެ.
އެމަނިކުފާނު ވިދާޅުވީ އަންހެނުންގެ ތަރައްގީއަށް މަސައްކަތްކުރާ ކޮމިޓީތައް ކުރިއެރުވުމަށް މިހާތަނަށް ކޮށްފައިވާ މަަސައްކަތްތައް ކުރީ މި ސަރުކާރުން ކަމަށެވެ. އޭގެ ތެރޭގައި ގާނޫނަށް ގެންނަންޖެހޭ ބަދަލުތައް ގެނެސް، އަންހެނުންގެ ކޮމިޓީތަކުގެ މެމްބަރުންނަށް ރޯދަ އިނާޔަތް ލިބޭ ގޮތަށް ބަދަލު ގެނެސްދިނީ މި ސަރުކާރުން ކަމަށް އެމަނިކުފާނު ވިދާޅުވި އެވެ.
"އަންހެނުންގެ ތަރައްގީއަށް މަސައްކަތްކުރާ ކޮމިޓީތައް ތަރައްގީކުރުމަށް މިއަދާ ހަމައަށް އައިރު ކުރި ކަމެއް ވިއްޔާ ވެސް ކޮށްފައި އޮންނާނީ މި ސަރުކާރުން،" ރައީސް ވިދާޅުވި އެވެ.
ރައީސް ވިދާޅުވި ގޮތުގައި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ރައީސާއަކީ ހުރިހާ ރައްޔިތުން ވޯޓުލައިގެން ހޮވާ ފުލްޓައިމް އެގްޒެކްޓިވް މަގާމަކަށް ބަދަލުކޮށްފައި ވަނީ ވެސް މި ސަރުކާރުންނެވެ. އަދި އެ ކޮމިޓީއަށް ލިބެމުން އައި ފަސް ޕަސެންޓު، ދިހަ ޕަސެންޓަށް ބޮޑުކޮށްފައިވާ ކަމަށް ވިދާޅުވި އެވެ.
އެމަނިކުފާނު ވަނީ އެ މީހުންނަށް ރޯދަ މަހުގެ އިނާޔަތް ދޭންޖެހެނީ އެ 10 ޕަސެންޓުގެ ތެރެއިން ނޫން ކަމަށާއި އެއީ ކައުންސިލުގެ ބަޖެޓުން ދޭންޖެހޭ ފައިސާއެއްގެ ގޮތުގައި ކަނޑައަޅާފައިވާ ކަމަށް ވިދާޅުވެފަ އެވެ.
އެހެންވެ އެ ކޮމިޓީތައް ހަގީގީ ކޮމިޓީއަކަށް ހަދައިދިނީ މި ސަރުކާރުން ކަމަށް ރައީސް ވިދާޅުވެ އެވެ.
"އަންހެނުންގެ ތަރައްގީއަށް މަސައްކަތްކުރާ ކޮމިޓީއަށް ކުރީގައި ލިބެމުން އައި ފަސް އިންސައްތައިގެ ބަދަލުގައި ދިހަ އިންސައްތައަށް ޑަބަލްކޮށްދިނީ ވެސް މި ސަރުކާރުން. ރޯދަ މަހުގެ އިނާޔަތް ދޭނީ އެ ދިހަ އިންސައްތައިގެ ތެރެއިން ނޫން ކަމާއި އެ ފައިސާ ދޭންޖެހޭނީ ކައުންސިލުގެ ބަޖެޓުން ކަމަށް ވެސް ކަނޑައެޅީ މި ސަރުކާރުން. އެހެންވީމަ އަންހެނުންގެ ތަރައްގީއަށް މަސައްކަތްކުރާ ކޮމިޓީ ކޮމިޓީއަކަށް ހަދައިދިނީ މި ސަަރުކާރުން."
ރައީސް ވިދާޅުވީ ކޮމިޓީތަކުގެ އިތުރުން ވެސް އަންހެނުންގެ ތަރައްގީއަށް މަސައްކަތްކުރަމުން އަންނަ ކަމަށެވެ. އޭގެ ތެރޭގައި އެމަނިކުފާނު ވަނީ އަންހެނުން އިގްތިސާދީ ގޮތުންނާއި އެކި ގޮތްގޮތުން ބާރުވެރިކުރުވުމަށް ލޯނުތައް ދޫކުރަމުން އަންނަކަން ފާހަގަކުރައްވައިފަ އެވެ.