ވެލޭނާ އިންޓަނޭޝަނަލް އެއާޕޯޓުގެ ޓާމިނަލް 2 ނުވަތަ ޑޮމެސްޓިކް ޓާމިނަލްގެ ކުރިމަތިން ޓެކްސީ ލިބޭނެ ގޮތް މިއަދު ހަދައިފި އެވެ.
އެއާޕޯޓުގެ ޓްރެފިކް ފްލޯއަށް ގެނައި ބައެއް ބަދަލުތަކާ ގުޅޭ ގޮތުން އެމްއޭސީއެލް އިން ނެރުނު ބަޔާނެއްގައި ބުނީ ޓާމިނަލް 2 ބޭނުންކުރާ ފަސިންޖަރުންނަށް ލުއިފަސޭހަ އިންތިޒާމުތަކެއް ހަމަޖައްސައިދިނުމުގެ ގޮތުން މިއަދު ހެނދުނު 10:00 އިން ފެށިގެން އެ ޓާމިނަލްގެ ކުރިމަތިން ފަސިންޖަރުންނަށް ޓެކްސީތަކަށް އަރައިފޭބޭނެ ގޮތް ހަދާފައިވާ ކަމަށެވެ.
އެމްއޭސީއެލުން ބުނީ އެ އިންތިޒާމުގެ ދަށުން ޓާމިނަލް 2 ގެ އެރައިވަލްގެ ކުރިމަތިން ބުރާއި ދެމެދުގައިވާ ސަރަހައްދަކީ ފަސިންޖަރުން ބޭލުމަށް ހާއްސަކޮށްފައިވާ ސަރަހައްދު ކަމަށެވެ. އެ ސަރަހައްދުގައި ފަހަރަކު ހަތަރު ޓެކްސީއަށް މަޑުކުރެވޭނެ ސްލޮޓްތައް ފާހަގަކުރެވިފައި ހުންނާނެ ކަމަށް އެ ކުންފުނިން ބުންޏެވެ.
ޓާމިނަލް 2 ގެ ޑިޕާޗާ ކުރިމަތިން ބުރާއި ދެމެދުގައިވާ ސަރަހައްދަކީ ފަސިންޖަރުން ޓެކްސީއަށް އެރުމަށް ހާއްސަކޮށްފައިވާ ސަރަހައްދު ކަމަށާއި އެތަނުގައި ފަހަރަކު ފަސް ޓެކްސީއަށް މަޑުކުރެވޭނެ ސްލޮޓްތައް ފާހަގަކޮށްފައި ހުންނާނެ ކަމަށް އެމްއޭސީއެލުން ބުންޏެވެ.
މި ގެނެވުނު ބަދަލަށް އާންމުން އަހުލުވެރިކޮށް ޓްރެފިކް ފްލޯ މެނޭޖްކުރުމަށް އެ ކުންފުނީގެ މުވައްޒަފުން އެ ސަރަހައްދުގައި ތިބޭނެ ކަމަށް އެމްއޭސީއެލުން ބުންޏެވެ.
އެމްއޭސީއެލުން މި ބަދަލު ގެނައީ ޑޮމެސްޓިކް ފްލައިޓްތަކުގައި ދަތުރުކުރާ ފަސިންޖަރުން ޓެކްސީ ހޯދުމަށް ޓާމިނަލް 1 ގެ ޓެކްސީ ކިއުއަށް މާ ދުރަށް ދާން ޖެހޭތީ އާންމުންގެ ޝަކުވާ ބޮޑުވެފައި ވަނިކޮށެވެ.
ކުރީގެ ޑޮމެސްޓިކް ޓާމިނަލް ބަންދުކޮށް، އެތެރޭގެ އުދުހުންތަކުގެ ދަތުރުތައް ކުރީގެ އިންޓަނޭޝަނަލް ޓާމިނަލް ނުވަތަ މިހާރުގެ ޓާމިނަލް 2 އަށް ބަދަލުކުރީ މިދިޔަ މަހު އެވެ. އޭގެ ފަހުން، ޑޮމެސްޓިކްގައި ދަތުރުކުރާ ފަސިންޖަރުންނަަށް ޓެކްސީ ލިބޭނެ އިންތިޒާމު ހަމަޖެއްސީ ޓާމިނަލް 1 ގެ ޓެކްސީ ކިޔޫންނެވެ.
ވެލާނާ އެއާޕޯޓުގެ އާ ޓާމިނަލް ނުވަތަ ޓާމިނަލް 1 މިދިޔަ އަހަރުގެ ޖުލައި 26 ގައި ހުޅުވައި، މިދިޔަ އަހަރުގެ ނިޔަލަށް ހުރިހާ އިންޓަނޭޝަނަލް އެއާލައިންތަކުގެ ދަތުރުތައް ވަނީ އެ ޓާމިނަލަށް ބަދަލުކޮށްފަ އެވެ.