"މޯލްޑިވްސް ޕާލް ރެސިޑެންސީ"ގެ ނަމުގައި ބޭރުގެ އިންވެސްޓަރުންނަށް ހާއްސަ ވިސާއެއް ތައާރަފްކުރަން ސަރުކާރުން ގެންގުޅޭ ސިޔާސަތާ ބެހޭ ގޮތުން މައުލޫމާތު ސާފުކުރަން އަދާލަތު ޕާޓީގެ އިސްވެރިންގެ ވަފުދެއް އިކޮނޮމިކް މިނިސްޓަރު މުަހައްމަދު ސައީދާ އިއްޔެ ބައްދަލުކޮށްފި އެވެ.
ސިޔާސީ ގޮތުން ވަކި ފިކުރަކަށް މި ވަގުތު ތާއީދު ނުކޮށް އޮތް އަދާލަތު ޕާޓީން ސޯޝަލް މީޑިއާގައި ކުރި ޕޯސްޓެއްގައި ބުނީ "މޯލްޑިވްސް ޕާލް ރެސިޑެންސީ" ޕްރޮގްރާމާ ގުޅިގެން އެ ޕާޓީގެ ފަރާތުން ސާފުކުރަން ބޭނުންވާ މުހިންމު ކަންކަން އޮޅުންފިލުވަން ރައީސް ޝައިހް މުހައްމަދު ޝިފާންގެ އިތުރުން އިސް ލީޑާޝިޕުން މިނިސްޓަރު ސައީދާ ބައްދަލުކުރި ކަމަށެވެ.
އެކަމަކު، އެ ބައްދަލުވުމުގައި ކުރެއްވި މަޝްވަރާތަކުގެ ތަފްސީލެއް އަދި ނުލިބެ އެވެ.
ޕާލް ރެސިޑެންސީ ޕްރޮގްރާމަކީ ރާއްޖޭގެ އިގުތިސާދު ޑައިވާސިފައިކޮށް، ބޭރުގެ އިންވެސްޓަރުންގެ ޝައުގުވެރިކަން ހޯދަން ރާއްޖެއަށް ސަރުކާރުން ތައާރަފުކޮށްފައިވާ "ރެސިޑެންސީ ބައި އިންވެސްޓްމަންޓް" ޕްރޮގްރާމެކެވެ. އެ ޕްރޮގްރާމްގެ މައިގަނޑު މަގުސަދަކީ ރާއްޖެއަށް ބޭރު ފައިސާ އިތުރުކޮށް، އިގުތިސާދީ ދަތިތަކަށް ހައްލު ހޯދުން ކަމަށް ސަރުކާރުން ބުނެ އެވެ.
ރާއްޖެއިން ކަނޑައަޅާފައިވާ ހާއްސަ ރިއަލް އެސްޓޭޓް މަޝްރޫއުތަކުން ޕްރޮޕަޓީއެއް ގަންނަ ބޭރުގެ އިންވެސްޓަރުންނަށް އެ ވިސާ ހޯދުމުގެ ފުރުސަތު ލިބެއެވެ. އެ ޕްރޮގްރާމްގެ ދަށުން އިންވެސްޓްކުރާ ފަރާތްތަކަށް ފަސް އަހަރާއި 10 އަހަރާ ދެމެދުގެ މުއްދަތަކަށް އާކުރެވޭގޮތަށް ރާއްޖޭގައި ދިރިއުޅުމުގެ ހުއްދަ ލިބެ އެވެ.