ރާއްޖޭގެ ތާރީހުގައި ވެސް ގެންނަ އެންމެ ބޮޑު އިންވެސްޓެއް ކުރާ ކުންފުނީގެ ހައިސިއްޔަތުން އީގަލް ހިލްސް އަށް ދިވެހިން އިތުބާރުކުރާ ކަމަށް އެ ކުންފުނީގެ ޗެއާމަން މުހައްމަދު އަލައްބާރު ވިދާޅުވެއްޖެ އެވެ.
"މޯލްޑިވްސް ވޯޓާފްރޮންޓް އެންޑް މެރީނާ" ގެ ނަމުގައި ރަސްމާލޭގައި ބޮޑު މަޝްރޫއެއް ހިންގަން އެ ކުންފުންޏާ އެކު ސަރުކާރުން ވަނީ ކޮމާޝަލް ޓާމްސް އެއްބަސްވުމެއްގައި ސޮއިކޮށްފަ އެވެ. އެ މަޝްރޫއު ހިންގަން ރަސްމާލޭގެ 500 ހެކްޓަރު އެ ކުންފުންޏަށް ދޫކުރަން ސަރުކާރުން ނިންމާފައި ވާއިރު އެ އެއްބަސްވުމާ މެދު ރާއްޖޭގެ ސިޔާސީ ބައެއް ލީޑަރުން ގެންދަވަނީ ކަންބޮޑުވުން ފާޅުކުރައްވަމުންނެވެ.
އެ މަޝްރޫއު ނިމުމުން ރަސްމާލެ އޮންނާނެ ގޮތް ތަސައްވުރުކޮށް، އާޓިފިޝަލް އިންޓެލިޖެންސްގެ އެހީގައި ހަދާފައިވާ ވީޑިއޯއަކާ އެކު އިންސްްޓަގްރާމްގައި އާއްމުކުރެއްވި މެސެޖެއްގައި އަލައްބާރު ވިދާޅުވީ އެ މަޝްރޫއު ހިންގަން ލިބުމަކީ އޭނާގެ ކުންފުންޏަށް ލިބުނު ފަހުރެއް ކަމަށެވެ. ރަސްމާލޭގައި ހިންގާ މަޝްރޫއުގައި ދިވެހިންގެ އުއްމީދާ އެއްގޮތަށް މަސައްކަތްކުރާނެ ކަމަށް ވެސް މެސެޖްގައި އޭނާ ވިދާޅުވި އެވެ.
"ތާރީހުގައި އަންނަ އެންމެ ބޮޑު އިންވެސްޓްމެންޓާ އެކު ދިވެހިން އަޅުގަނޑުމެންނަށް އިތުބާރުކުރޭ. މިއީ އަޅުގަނޑުމެންނަށް ލިބޭ ޝަރަފެއް. ﷲ މިކަމުގައި ތައުފީގުދެއްވާށި. ﷲ އިރާދަކުރެއްވިއްޔާ އެ މީހުންގެ އުއްމީދާ އެއްގޮތަށް އަޅުގަނޑުމެން މަަސައްކަތްކުރާނަން،" ވީޑިއޯ މެސެޖްގައި އަލައްބާރު ވިދާޅުވި އެވެ.
އެ މެސެޖްގައި އޭނާ ފުރަތަމަ ދެއްވީ ރަސްމާލޭގައި ހިންގާ މަޝްރޫއުގެ ހުލާސާއެކެވެ. ވިދާޅުވީ، އެތަނުގައި އުފައްދަން އުޅެނީ ދިރިއުޅުމުގެ ވައްޓަފާޅިއެއް ކަމަށާއި އެތަނުން ޕްރޮޕަޓީއެއް ގަނެފި ނަމަ، ފައިދާގެ ގޮތުގައި ލިބޭނީ މުޅި ދުނިޔޭން ވެސް އެފަދަ ވިޔަފާރިއަކުން ލިބޭނެ އެންމެ ރަނގަޅު ފައިދާ ކަމަށެވެ.
މަޝްރޫއު ނިމޭއިރު އެތަނުގައި ހުންނާނެ ހިދުމަތްތަކާއި ވަސީލަތްތަކުގެ ލިސްޓެއް ވެސް އަލައްބާރު ދެއްވި އެވެ.
" އަޅުގަނޑުމެން މި އުފައްދަނީ ދިރިއުޅޭނެ ތަނެއް. އެތަނުގައި މީހުންނަށް މަހެއް ވަންދެން ނޫނީ ހަފުތާއެއް ވަންދެން ތިބެވޭނެ. އެ ތަނުގައި ރީތި ގޮނޑުދޮށްތައް ހުންނާނެ. އަދި ރެސްޓޯރެންޓްތަކާއި ހޮޓާތަކާއި ކުޅިވަރުކުޅޭނެ ތަންތަނާއި ކުޑަކުދިންނަށް ހާއްސަ ތަންތަން ހުންނާނެ،" އޭނާ ވިދާޅުވި އެވެ.
ޔުނައިޓެޑް އަރަބް އެމިރޭޓްސް (ޔޫއޭއީ) ގެ އެންމެ މަޝްހޫރު އެއް ކުންފުނި ކަމަށްވާ އީގަލް ހިލްސްއިން ފަށަން ތައްޔާރުވާ ބިޔަ މަޝްރޫއު ކުރިއަށް ގެންދާނީ، ރާއްޖޭގެ އިގްތިސާދަށާއި ރައްޔިތުންނަށް އެންމެ ފައިދާވާ ގޮތަށް ކަމުގެ ޔަގީންކަން އޭނާ ކުރިން ވެސް ދެއްވި އެވެ.