މީގެ 15 އަހަރުކުރިން މާލޭގައި ޒުވާނަކު މަރާލި މައްސަލާގައި މަރަން ހުކުމް ކޮށްފައިވާ އިބްރާހިމް ޝަހުމް އާދަމްގެ މައްސަލާގައި، ދެ ފިރިހެނުންގެ ހެކިބަސް ނެތީސް މަރުގެ އަދަބު ދެވިދާނެތޯ ކުރި ބަހުސާ އެކު އެ މައްސަލާގެ އަޑުއެހުންތައް ސުޕްރީމް ކޯޓުން މިއަދު ނިންމާލައިފި އެވެ.
އޭޕްރީލް، 2011 ގައި މަޖީދީމަގާއި އަލިކިލެގެފާނު މަގު ގުޅުނު ހިސާބުގައި ސ. ހިތަދޫ ވަރުދީގޭ އަހުސަން ބަޝީރަށް ތޫނު އެއްޗަކުން ހަމަލާދީ މަރާލި މައްސަލާގައި ޝަހުމް މެރުމަށް ހައި ކޯޓުން ހުކުމްކުރީ 2021 ވަނަ އަހަރު އެވެ.
އެ ހުކުމުގެ ސައްހަކަން ކަށަވަރުކުރަން ދައުލަތުން ސުޕްރީމް ކޯޓަށް ހުށަހެޅުމުން މިއަދު ބޭއްވި އަޑުއެހުމުގައި ދައުލަތުން ފުރަތަމަ ޖަވާބު ދިނީ މިހާރު އަމަލުކުރާ ހެއްކާބެހޭ ގާނޫނުގެ 140 ވަނަ މާއްދާގެ ނ. ގައި މަރުގެ އަދަބު ދެވޭނީ ދެ ފިރިހެނުންގެ ހެކިބަސް ނުވަތަ އަމިއްލަ އިއުތިރާފް ލިބިގެން ކަމަށް ބަޔާންކޮށްފައި އޮންނާތީ އެކަމާ ބެހޭގޮތުން ފަނޑިޔާރުންގެ ބެންޗުން ސުވާލު ކޮށްފައިވާތީ އެވެ.
ދައުލަތުން ބުނިގޮތުގައި އިސްލާމީ ޝަރީއަތުގައި މަރުގެ މައްސަލަތަކުގެ މަރުގެ އަދަބު ދިނުމަށް ބޭނުންވާ ހެކީގެ އަދަދާ މެދު އިސްލާމީ އިލްމުވެރިންގެ މެދުގައި ޚިލާފް އޮވެ އެވެ. އަދި މީގެކުރިން ސުޕްރީމް ކޯޓުން ނިންމާފައިވާ މައްސަލަތަކުގައި ވެސް ބަޔާންކުރާ އުސޫލުން އިސްކަން ދޭންޖެހޭނީ އިސްލާމްދީނުގެ އަސްލެއް ހިމާޔަތް ކުރުމަށްޓަކައި ކަމަށްވާތީ އެ އުސޫލުން ބަލާއިރު ކޮންމެހެން ދެ ފިރިހެނުންގެ ހެކިބަސް އޮތުން ލާޒިމްނުވާ ކަމަށް ދައުލަތުން ބުންޏެވެ.
ދައުލަތުން ބުނިގޮތުގައި މީގެކުރިން ސުޕްރީމް ކޯޓުން ނިންމި މައްސަލަތަކުގައި ވެސް ގަރީނާތަކަށް ބިނާކޮށް މަރުގެ އަދަބު ދެވޭނެ ކަމަށް ނިންމާފައި އެބަހުއްޓެވެ. އަދި މިހާރު ވެސް ހާލަތު އޮތީ އެގޮތަށް ކަމަށް ދައުލަތުން ބުންޏެވެ.
އެހެންވެ، ހެއްކާބެހޭ ގާނޫނުގެ 140 ވަނަ މާއްދާގެ ނ. ގައި އެހެން އޮތަސް، ފިރިހެނުންގެ ހެކިބަސް ނުވަތަ އަމިއްލަ އިއުތިރާފް ލިބިފައި ނެތީސް އެހެން ހެކިތަކަށް ބިނާކޮށް މަރުގެ އަދަބު ދެވިދާނެ ކަމަށް ދައުލަތުން ބުންޏެވެ.
ހެއްކާބެހޭ ގާނޫނުގެ 140 ވަނަ މާއްދާގެ ނ. އާއި އެ ގާނޫނުގެ 141 ވަނަ މާއްދާ އާއި 142 ވަނަ މާއްދާގައި ފުށުއެރުންތަކެއް އެބަހުރި ކަމަށް ދައުލަތުން ބުންޏެވެ. ނަމަވެސް 140 ވަނަ މާއްދާގެ ނ. ބާތިލްކުރަން ދައުލަތުން އެދިފައި ނުވާނެ ކަމަށް ދައުލަތުން އެއްބަސްވި އެވެ.
ނަމަވެސް ޝަހުމްގެ ވަކީލް ވިދާޅުވީ ހެއްކާބެހޭ ގާނޫނުގެ 140 ވަނަ މާއްދާގެ ނ. ގައި ދެ ފިރިހެނުންގެ ހެކިބަސް ނުވަތަ އަމިއްލަ އިއުތިރާފް ބޭނުންވާނެ ކަމަށް އޮންނަ އޮތުން އިސްލާމީ ޝަރީއަތާ ޚިލާފްވާ ގޮތެއް ދައުލަތަށް ބުނެ ނުދެވޭ ކަމަށެވެ. އަދި ގާނޫނުގައި އެކަން ސާފުކޮށް ބަޔާންކޮށްފައިވާ ހާލަތުގައި، ގާނޫނުގެ އެހެން މާއްދާތަކާ އެއްގޮތަށް އެ މާއްދާގެ ސައްހަކަން ވެސް ދަމަހައްޓަން ޖެހޭނެ ކަމަށް ވަކީލް ވިދާޅުވި އެވެ.
މަރުގެ އަދަބަކީ އެންމެ ބޮޑު އަދަބު ކަމަށް ވާއިރު، އެފަދަ ކުށެއް ސާބިތުކުރަން ހަރުކަށި މިންގަނޑެއް ގާނޫނުގައި ކަނޑައެޅުމަކީ ކުރެވިދާނެ ކަމެއް ކަމަށް ޝަހުމްގެ ވަކީލް ވިދާޅުވި އެވެ.
ވަކީލް ވިދާޅުވި ގޮތުގައި ޝަހުމްގެ މައްޗަށް މަރުގެ އަދަބު ދޭން ހުކުމްކުރީ އެފަދަ ކުށް ސާބިތުކުރަން އޮންނަ މިންގަނޑާ ހިލާފަށެވެ. ނަމަވެސް ދައުލަތުން އެދުނީ އެ ހުކުމް ދަމަހައްޓައި ދިނުމަށެވެ.
މިއަދުގެ އަޑުއެހުން ނިންމާލީ އިތުރު ކަމެއް ސާފުކުރަން ނެތްނަމަ ދެން އޮންނާނީ ހުކުމް އިއްވުން ކަމަށް އިއުލާން ކުރެއްވުމަށްފަހު އެވެ.
އެ މައްސަލަ ސުޕްރީމް ކޯޓުން ބައްލަވަނީ ފަނޑިޔާރު ޑރ. މުހައްމަދު އިބްރާހިމާއި ފަނޑިޔާރު އަބްދުﷲ ހަމީދާއި ފަނޑިޔާރު އައިޝާ ޝުޖޫން މުހައްމަދާއި ފަނޑިޔާރު އަލީ ރަޝީދު ހުސައިންގެ އިތުރުން ފަނޑިޔާރު މުހައްމަދު ސަލީމެވެ. އަދި ބެންޗުގެ ރިޔާސަތަކީ ފަނޑިޔާރު ޑރ. މުހައްމަދު އިބްރާހިމެވެ.
އެ މައްސަލައަކީ މަރުވި މީހާ މަރު މަތީގައި އޮވެގެން ބުނި ބަސް (ޑައިން ޑިކްލަރޭޝަން) ރާއްޖޭގައި ބަލައިގަތް ފުރަތަމަ ފަހަރެވެ.
އެ މައްސަލާގައި ޝަހުމްގެ އިތުރުން މއ. ވީނަސްތަރި ހަސަން ޝިމާޒް މުހައްމަދު ސުވާދުގެ މައްޗަށް 15 އަހަރުގެ ޖަލު ހުކުމެއް ހައި ކޯޓުން އޮތީ އިއްވައިފަ އެވެ. އަދި މަރުގެ އެހެން މައްސަލައަކާ ގުޅިގެން ޝަހުމްގެ މައްޗަށް އޭގެކުރިން އޮތީ އުމުރު ދުވަހުގެ ޖަލު ހުކުމެއް ވެސް އިއްވައިފަ އެވެ.