ރާއްޖޭގައި ކަރަންޓާއި ވައިގެ ދަތުރުފަތުރުގެ އަގުތައް ދަށަށް ދިއުމާ އެކު، މިދިޔަ މަހުގެ ކޮންސިއުމާ ޕްރައިސް އިންޑެކްސް (ސީޕީއައި) ޖުމްލަކޮށް ދަށަށް ގޮސްފައިވާ ކަމަށް ތަފާސްހިސާބުތަކުން ދައްކައިފި އެވެ.
މޯލްޑިވްސް ބިއުރޯ އޮފް އެސްޓެޓިސްޓިކްސް (އެމްބީއެސް)އިން ޝާއިއު ކޮށްފައިވާ ތަފާސްހިސާބުތައް ދައްކާ ގޮތުގައި، މިދިޔަ ޖުލައި މަހާ އަޅާބަލާއިރު އޮގަސްޓް މަހު ރާއްޖޭގެ ސީޕީއައި 1.15 ޕަސެންޓު ދަށަށް ދިއުމުގެ މައިގަނޑު ސަބަބަކީ ކަރަންޓާއި ވައިގެ ދަތުރުފަތުރުގެ އަގުތައް ހެޔޮވުމެވެ.
އޮގަސްޓް މަހު ކަރަންޓުގެ އަގު 3.21 ޕަސެންޓު ދަށަށް ގޮސްފައިވާއިރު، ވައިގެ ދަތުރުފަތުރުގެ އަގުތައް ވަނީ 2.80 ޕަސެންޓު ހެޔޮވެފަ އެވެ. އަދި ދުންފަތުގެ ބާވަތްތަކުގެ އަގު ވަނީ 25.45 ޕަސެންޓު ދަށަށް ގޮސްފަ އެވެ.
ތަފާސްހިސާބުތައް ދައްކާ ގޮތުގައި، ބައެއް ބާވަތްތަކުގެ ކާބޯތަކެއްޗާއި ހިދުމަތްތަކުގެ އަގު ބޮޑުވެފައިވިޔަސް، ޖުލައި މަހާ އަޅާބަލާއިރު އޮގަސްޓް މަހު ރާއްޖޭގެ އަގުތަކުގެ އިންޑެކްސް 1.15 ޕަސެންޓު ވަނީ ދަށަށް ގޮސްފަ އެވެ.
މި އަހަރުގެ ޖުލައި މަހާ އަޅާބަލާއިރު އަގުތައް ދަށަށް ދިޔަ ނަމަވެސް 2025 ވަނަ އަހަރުގެ އޮގަސްޓް މަހަށް ބަލާ ނަމަ މި އަހަރުގެ އޮގަސްޓް މަހުގެ އަގުތައް ހުރީ 0.76 ޕަސެންޓު މަތީގަ އެވެ. މަހުންމަހަށް ބަލާއިރު އަގުތައް ދަށްވި ނަމަވެސް، އަހަރުން އަހަރަށް އަޅާކިޔާލާއިރު އަގުތަކަށް ކުޑަ އިތުރުވުމެއް އައިސްފައިވާ ކަމަށް ރިޕޯޓުގައި ފާހަގަކޮށްފައިވެ އެވެ.
މަހުން މަހަށް އައި މި ބަދަލަކީ ގޭބިސީތަކުން އާންމުކޮށް ގަނެއުޅޭ ތަކެތީގެ އަގަށް އައި އެވްރެޖް ބަދަލެކެވެ. ބައެއް ތަކެތީގެ އަގު އޮގަސްޓް މަހު ވަނީ އުފުލިފަ އެވެ. އެގޮތުން ކިރާއި ކިރުގެ އުފެއްދުންތަކުގެ އިތުރުން ބިހުގެ އަގު 1.99 ޕަސެންޓު އުފުލިފައިވާއިރު، މޭވާ އާއި ތަރުކާރީގެ އަގު ވަނީ 1.19 ޕަސެންޓު ބޮޑުވެފަ އެވެ. އަދި މަހުގެ ބާވަތްތަކުގެ އަގު ވަނީ 0.83 ޕަސެންޓު އުފުލިފަ އެވެ.
ހިދުމަތްތަކުގެ އަގަށް ބަލާއިރު، މުވާސަލާތީ ހިދުމަތުން 2.23 ޕަސެންޓު، ގެސްޓްހައުސްތަކުގެ އަގުތަކުން 2.72 ޕަސެންޓު، ކާބޯތަކެތީގެ ހިދުމަތްދޭ ތަންތަނާއި ހޮޓާތަކުގެ އަގުތަކުން 0.68 ޕަސެންޓު އަދި ސިއްހީ ހިދުމަތްތަކުގެ އަގު ވަނީ 0.99 ޕަސެންޓު އުފުލިފަ އެވެ.
ރާއްޖޭގެ ސީޕީއައި ޖުމްލަކޮށް ދަށަށް ގޮސްފައިވާއިރު، މާލޭގެ ސީޕީއައި އިންޑެކްސް ވަނީ ޖުލައި މަހާ އަޅާބަލާއިރު 1.57 ޕަސެންޓު ދަށްވެފަ އެވެ. އަދި އަތޮޅުތެރޭގައި މި އަދަދު ވަނީ 0.54 ދަށްވެފަ އެވެ.
ކޮންސިއުމާ ޕްރައިސް އިންޑެކްސްއަކީ ގޭބިސީތަކުން ބޭނުންކުރާ ތަކެއްޗާއި ހިދުމަތްތަކުގެ އަގަށް އަންނަ ބަދަލުތައް ދެނެގަތުމަށް ބޭނުންކުރާ މިންގަނޑެކެވެ.
އިންފްލޭޝަން ނުވަތަ ތަކެތީގެ އަގު އުފުލޭ މިންވަރު ބެލުމަށް އެމްބީއެސް އިން ކޮންމެ މަހަކު މާލެއާއި އަތޮޅުތެރެ ހިމެނޭހެން 9,500 އަށްވުރެ ގިނަ ތަކެއްޗާއި ހިދުމަތުގެ އަގުތައް އެއްކުރެ އެވެ.