ސަލާމަތީ ކަންތައްތައް ބަލަހައްޓާ އަމިއްލަ ކުންފުނިތަކުންދޭ ހިދުމަތް (ޕްރައިވެޓް ސެކިއުރިޓީ) އަކީ އަކީ މިހާރަށް ވުރެ ޕްރޮފެޝަނަލް ހިދުމަތަކަށް ހަދަން ސަރުކާރުން އެހީތެރިވާނެ ކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ.
މޯލްޑިވްސް އެސޯސިއޭޝަން އޮފް ފަޔާ ސެކިއުރިޓީ އެންޑް ސޭފްޓީ އިންޑަސްޓްރީ (މަފްސީ) އިން އިންތިޒާމް ކޮށްގެން ކުރިއަށް ގެންދާ "ސޭފްޓީ އެންޑް ސެކިއުރިޓީ ކޮންފަރެންސް މޯލްޑިވްސް 2026" ފަށަން ބާސެލޯ ނަސަންދުރާގައި ބޭއްވި ރަސްމިއްޔާތުގައި މިނިސްޓަރު ވިދާޅުވީ ރާއްޖޭގެ ޓޫރިޒަމް އިންޑަސްޓްރީ އާއި އެހެން ދާއިރާތަކުގައި ވެސް އެންމެ ކުރީސަފުގައި ތިބޭ ބަޔަަކީ ޕްރައިވެޓް ސެކިއުރިޓީގެ މުވައްޒަފުން ކަމަށާއި އެއީ ހާދިސާއެއް ހިނގާ އިރު އެ ތަނުގައި އެންމެ ފުރަތަމަ ތިބޭ މީހުން ކަމަށެވެ. އެހެންވީމާ އެއީ ސަލާމަތާއި ރައްކާތެރިކަމުގެ ގައުމީ އޮނިގަނޑުގައި މުހިއްމަު ބައެއްގެ ގޮތުގައި ބަލައިގަންނަން ޖެހޭ ކަމަށް ވެސް އޭނާ ވިދާޅުވި އެވެ.
"އެ ގޮތަށް ބަލައިގަތުމާ އެކު އަންނަންޖެހޭ ކަމަކީ ޕްރޮފެޝަނަލައިޒޭޝަން. އެ މީހުންނަށް އަޅުގަނޑުމެން ވަރުގަދަ ތަމްރީނުތައް ދޭންޖެހޭ. ގާބިލުކަން ވަޒަން ކުރާނެ އޮޅުމެއް ނެތް މިންގަނޑުތަކާއި ޕްރޮފެޝަނަލް އަހުލާގީ މިންގަނޑުތަައް ކަނޑައަޅަންޖެހޭ،" އިހުސާން ވިދާޅުވި އެވެ.
މިނިސްޓަރު ވިދާޅުވި ގޮޮތުަގައި ޕްރައިވެޓް ސެކިއުރިޓީ މުވައްޒަފުންނަށް އެކަށީގެންވާ ސެޓްފިކެޓް ދޭނެ ނިޒާމަކާއި ކެރިއާ ބިނާކުރާނެ ފުރުސަުތުތައް ވެސް ހޯދައިދޭން ޖެހެ އެވެ.
"އަޅުގަނޑު އުފާވޭ ޕްރައިވެޓް ސެކިއުރިޓީ ޕްރޮފެޝަނަލް ކުރަން މޯލްޑިވްސް އެސޯސިއޭޝަން އޮފް ފަޔާ ސެކިއުރިޓީ އެންޑް ސޭފްޓީ އިންޑަސްޓްރީ، މަފްސީ އިން މަސައްކަތް ކުރާތީ. އަޅުގަނޑު މިއަދު ތިޔަބޭފުޅުންނަށް މިދެނީ މިކަމަށް އަޅުގަނޑުމެން [ހޯމް މިނިސްޓްރީން] އެހީތެރިވާނެ ކަމުގެ ޔަގީންކަން،" އޭނާ ވިދާޅުވި އެވެ.
އެ މަސައްކަތް އިތުރަށް ކުރިއަރުވަން މަފްސީ އާއި އެކަމުގައި ބައިވެރިވާ އެހެން ފަރާތްތަކާ އެކު ހޯމް މިނިސްޓްރީން ގާތުން މަސައްކަތް ކުރާނެ ކަމަށް ވެސް މިނިސްޓަރު ވިދާޅުވި އެވެ.
އިހުސާން ވިދާޅުވި ގޮތުގައި އެ މަސައްކަތުގެ މަގުސަދަކަށް ވާންވާނީ ޕްރައިވެޓް ސެކިއުރިޓީއަކީ މީހުން ބަލައިގަންނަ، އެކަށީގެންވާ ތަމްރީނުދޭ، ހަރުދަނާ މިންގަނޑުތަކާއި ޒިންމާދާރުކުރުވޭ ނިޒާމެއް އޮންނަ ޕްރޮފެޝަނަލް ދާއިރާއަކަށް ހެދުމެވެ. އެއީ ކުރިއަށް ދާނެ ފުރުސަތުތައް އޮންނަ ދާއިރާއަކަށް ހެދުމަކީ ވެސް މަގުސަދަތަކަށް ވާން ޖެހޭނެ ކަމަށް އޭނާ ވިދާޅުވި އެވެ.
"ޓޫރިޒަމް އިންޑަަސްޓްރީއަށް މިއީ އަދި ވަކިން ބޮޑަށް މުހިއްމު ކަމެއް. ރަނގަޅަށް ތަމްރީން ވެފައިވާ ސެކިއުރިޓި އޮފިސަރަކު ވެގެން ނުވާނެ ދޮރެއްގެ ކައިރީ ހަމަ އެކަނި ކޮޅަށް ހުންނަ މީހަކަށް. އެ މީހުންނަަކީ އިމަޖެންސީ ރެސްޕޮންސް ދަންނަ މީހުންނަށް ވާން ޖެހޭނެ،" އިހުސާން ވިދާޅުވި އެވެ.
ހާދިސާއެއް ހިނގައިގެން އުޅޭ ތަނަކުން މީހުން ހުސްކުރުމުގައި އަމަލުކުރަންޖެހޭ އުސޫލުތައް އެ މީހުންނަށް އެނގެން ޖެހޭނެ ކަމަށް ވެސް މިނިސްޓަރު ވިދާޅުވި އެވެ.