ޓޫރިސްޓުން ރާއްޖެއަށް ކުރާ އިތުބާރު ބިނާވާނީ ސަލާމަތާއި ރައްކާތެރިކަން އޮންނަ މިންވަރުގެ މައްޗަށް ކަަމަށާއި ސަލާމަތާއި ރައްކާތެރިކަން ކަށަވަރުކުރުމަކީ ހަމައެކަނި ސަރުކާރުގެ ޒިންމާއެއް ނޫން ކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ.
މޯލްޑިވްސް އެސޯސިއޭޝަން އޮފް ފަޔާ ސެކިއުރިޓީ އެންޑް ސޭފްޓީ އިންޑަސްޓްރީ (މަފްސީ) އިން އިންތިޒާމް ކޮށްގެން ކުރިއަށް ގެންދާ "ސޭފްޓީ އެންޑް ސެކިއުރިޓީ ކޮންފަރެންސް މޯލްޑިވްސް 2026" ފަށަން ބާސެލޯ ނަސަންދުރާގައި ބޭއްވި ރަސްމިއްޔާތުގައި މިނިސްޓަރު ވިދާޅުވީ ޓޫރިސްޓުން ރާއްޖެ އިހުތިޔާރުކުރަނީ ރީތިކަމަށް ބައިލައިގެން ކަމަށާއި އެކަމަކު އެ މީހުން ރާއްޖެއަށް ކުރާ އިތުބާރު ބިނާވާނީ ރައްކާތެރިކަން އިހުސާސްކުރެވޭ މިންވަރުގެ މައްޗަށް ކަމަށެވެ.
ރާއްޖެއަކީ މުޅި ދުނިޔޭގައި ވެސް އެންމެ ބޮޑަށް ފާހަކޮށްލެވޭ، އެންމެ ކާމިޔާބު ޓޫރިޒަމް އިންޑަސްޓްރީ ކަމަށާއި ރާއްޖެއަށް ޒިޔާރަތްކުރާ ޓޫރިސްޓުން ތަޖުރިބާކުރާ ހިތްފަސޭހަކަމުގެ ފަހަތުގައި އޮތް އެއް ކަމަކީ ރައްކާތެރިކަން ކަމަށް އޭނާ ވިދާޅުވި އެވެ.
"އެހެންވީމާ ރައްކާތެރިކަމަކީ ހަމަ އެކަނި ސަރުކާރުގެ ނުވަތަ ސަލާމަތީ ހިދުމަތްތަކުގެ ޒިންމާއެއް ނޫން. ރައްކާތެރިކަން އެއީ އަޅުގަނޑުމެންގެ ޓޫރިޒަމް ޕްރޮޑަކްޓްގެ ބައެެއް. އެއީ ރާއްޖޭގެ މަޝްހޫރުކަމުގެ ވެސް ބައެއް. އެކަން ހިމާޔަތްކުރުމަކީ މިއަދު މިތަނަށް ވަޑައިގެން ތިއްބެވި ހުރިހާ ބޭފުޅުންގެ ވެސް ޒިންމާއެއް،" އިހުސާން ވިދާޅުވި އެވެ.
މިނިސްޓަރު ވިދާޅުވި ގޮތުގައި ޓޫރިޒަމް އިންޑަސްޓްރީގެ ވަަށައިގެންވާ ސަލާމަތާއި ރައްކާތެރިކަމުގެ މާހައުލު ދަނީ ބަދަލުވަމުންނެވެ. އެ އިންޑަސްޓްރީގެ ރައްކާތެރިކަމުގެ ވާހަކަ ދައްކާ އިރު މިހާރު އެއީ ހަމަ އެކަނި އާއްމުކޮށް ހިނގާފާޑުގެ ކުށްތަކާ ގުޅޭ ވާހަކައެއް ނޫން ކަމަށް ވެސް އޭނާ ވިދާޅުވި އެވެ.
"އަޅުގަނޑުމެން މި ދައްކަނީ އަލިފާނުގެ ހާދިސާތަކާއި އެކްސިޑެންޓްތަކުގެ ވާހަކަ. ކަނޑުމަތީގެ ހާދިސާތަކުގެ ވާހަކަ، އާދަޔާހިލާފު މޫސުމީ ކަންތައްތަކާއި ގުދުރަތީ ކާރިސާތަކުގެ ވާހަކަ، ސައިބާ އެޓޭކްތަކާއި ޑޭޓާ ބްރީޗްތަކުގެ ވާހަކަ، އޮންލައިން ފްރައުޑާއި ޑްރަގާ ގުޅޭ ކުށްތަކާއި އާއްމު ސިއްހަތުގެ ކުއްލި ހާލަތްތަކުގެ ވާހަކަ،" އިހުސާން ވިދާޅުވި އެވެ.
އަަލަށް ތައާރަފްވާ ކުށުގެ ބާވަތްތަކާއި ނުރައްކާތައް ހަމަ އެހާމެ އަވަހަށް ބޯޑަރުތައް ހުރަސްކޮށް، އެކި ގައުމުތަކަށް ފެތުރޭކަން އޭނާ ފާހަގަކުރެއްވި އެވެ.
"އަޅުގަނޑުމެން ކަހަަލަ ޖަޒީރާ ގައުމަކަށް މިފަދަ ގޮންޖެހުންތައް ވަކިން ބޮޑަށް އުނދަގޫވޭ،" މިނިސްޓަރު ވިދާޅުވި އެވެ.
ރާއްޖޭގެ ރިސޯޓްތައް ކަނޑުގެ ބޮޑު ސަރަހައްދަކަށް ފެތުރިފައި ވާއިރު އެއިން ރިސޯޓެއްގައި ހިނގާ ކަމަކަށް އެޑްރެސް ކުރެވޭނީ އޭނާ ވިދާޅުވި ގޮތުގައި އެންމެން ގުޅިގެން ކުރާ މަސައްކަތަކުންނެވެ. ހާދިސާއެއް ހިނގުމުން އެކަމަކަށް ފިޔަވަޅުއެޅުމުގެ ބަދަލުގައި ހިނގާފާނެ ކަމަކުން ރައްކާތެރިވާން ދުރާލައި މަސައްކަތް ކުރުން މުހިއްމު ކަމަށް ވެސް އޭނާ ވިދާޅުވި އެވެ.