ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލެ 2 ގައި އިމާރާތް ކޮށްފައިވާ ފްލެޓުތަކުގެ ޔުޓިލިޓީ ބެލްކަންޏަށް ގެނެސްފައިވާ ބަދަލުތައް އަންނަ މަހުގެ 28 ގެ ކުރިން އުސޫލާ އެއްގޮތަށް ބަދަލުކުރަން އެ ކުންފުނިން އަންގައިފި އެވެ.
އެ ފްލެޓްތަކުގައި މީހުން ދިރިއުޅެން ފަށައި އެކި ގޮތްގޮތަށް ބެލްކަންޏަށް ބަދަލު ގެންނާތީ އުސޫލާ ހިލާފަށް އެކަން ނުކުރަން އެފްޑީސީން އަންގައި އިސްލާހު ކުރަން މީގެ ކުރިން ވެސް އެންގި އެވެ. އެކަމަކު ބައެއް ފަރާތްތަކުން އެ އެންގުމާ އެއްގޮތަށް އަމަލެއް ނުކުރެ އެވެ.
އެފްޑީސީން ނެރުނު އިއުލާނެއްގައި ބުނި ގޮތުގައި އަންނަ މަހުގެ 28 ގެ ކުރިން ބެލްކަނިތައް އުސޫލަށް ފައްތަން ޖެހޭނެ އެވެ. އެއީ ފަހު ފުރުސަތު ކަމަށާއި އެ މުއްދަތުގައި ބެލްކަނިތައް ބަދަލުނުކުރާ ފަރާތްތައް އެއްބަސްވުމާ އެއްގޮތަށް ޖޫރިމަނާކޮށް ފިޔަވަޅު އަޅާނެ ކަމަށް އެފްޑީސީން ބުންޏެވެ.
އެފްޑީސީން ބުނި ގޮތުގައި ކަނޑައަޅާފައިވާ މިންގަނޑުތަކާ ހިލާފަށް ކުޑަދޮރު ހަރުކޮށްފައިވާ ފަރާތްތަކުން އެފްޑީސީގެ އުސޫލުތަކާ އެއްގޮތްވާ ގޮތުގެ މަތިން އެ ތަންތަން ބަދަލުކުރަން ޖެހޭނެ އެވެ. އެ ކުންފުނީގެ ވެބްސައިޓުގައިވާ ގަވާއިދުގައި ބަޔާންކުރާ ގޮތުގެ އިތުރުން އެއްވެސް ބަދަލެއް ގެނައުމަކީ މަނާކަމެއް ކަަމަށް ވެސް އެ ކުންފުނިން ބުންޏެވެ.
އެފްޑީސީން ހުއްދަ ދީފައިވަނީ ދެ ގޮތަކަށް އެކަން ކުރުމަށެވެ. އެއީ ސްލައިޑިން ލޫވާ ފިކްސިން އާއި ގްރިލް އެންޑް ނެޓް ފިކްސިން އެވެ.
އެ ކުންފުނިން ބުނީ އެ ދެ ގޮތަށް ހުއްދަ ދޫކޮށްފައި ވަނީ ސަލާމަތީ ރައްކާތެރިކަން ކަށަވަރުކުރުމަށާއި އެކަށީގެންވާ މިންވަރަށް ވައި ދައުރުކުރުމަށް މަގުފަހިކުރުމުގެ ގޮތުން ކަމަށެވެ.
ހުޅުމާލެ 2 ގައި ދެ އިމާރާތަކުން ދެ ކުއްޖަކު ވެއްޓުނު ހާދިސާއެއް މިދިޔަ މަހު ހިނގުމާ އެކު އިމާރާތްތަކުގެ ސަލާމަތީ ކަންކަން ރަނގަޅުކުރުމުގެ މަސައްކަތް ވަނީ ފަށައިފަ އެވެ. ހުޅުމާލެ ބަލަހައްޓާ އެޗްޑީސީން ވެސް، މިކަމަށް އެދޭ މީހުންނަށް ފުރުސަތު ހުޅުވާލައި އެކި ފްލެޓްތަކަށް ބޭނުންވާ ރައްކާތެރިކަމުގެ އެކި ވަސީލަތްތައް ގެންދަނީ ގާއިމުކޮށްދެމުންނެވެ.
އެޗްޑީސީން އިމާރާތްތަކުގެ ކުޑަދޮރުތަކާއި ބެލްކަނީގައި ރެއިލިން ހަރުކުރުމާއި ބެލްކަނިތައް 1.4 މީޓަރަށް އުސްކޮށްދިނުމުގެ މަސައްކަތް ކޮށްދޭން ވަނީ ނިންމައިފަ އެވެ.
ހާއްސަ އެހީއަށް ބޭނުންވާ ކުދިން އުޅޭ ގެތަކުގެ ބެލްކަނިތައް 1.4 މީޓަރަށް އުސްކޮށްދޭން ނިންމާފައި ވާއިރު ބަލިތަކުގައި ސީރިއަސް މީހުން ދިރިއުޅޭ ގެތަކުން ބޭނުންވާ ނަމަ، އެޗްޑީސީގެ ސީއެސްއާރުގެ ދަށުން ބެލްކަނި އެއްކޮށް ބަންދުކޮށްދިނުމުގެ މަސައްކަތް ވެސް ކޮށްދޭން ވަނީ ނިންމައިފަ އެވެ.
އެޗްޑީސީން ވެސް ލޮކިން ސިސްޓަމަކާއި ގްރިލިން ސިސްޓަމް ހަރުކޮށްދޭން ނިންމާފައިވެ އެވެ. ލޮކިން ސިސްޓަމު ހަރުކުރުމުން، ކުޑަދޮރު ހުޅުވޭނީ ކުޑަކުއްޖަކު ނުވަތަ މީހަކު ނުވެއްޓޭ ވަރަށް ކަމަށް އެފްޑީސީން ބުންޏެވެ.