ކައިވެނިކުރަން ކޮންމެ ކޯޓަކަށް ހުށަހެޅިޔަސް މީގެފަހުން ތެލެސީމިއާ ކާޑު ހުށަހަޅަން ލާޒިމުކޮށްފި އެވެ.
މާލޭގެ ފެމެލީ ކޯޓާއި ބައެއް މެޖިސްޓްރޭޓް ކޯޓުތަކުން މިހާރު ވެސް އަމަލު ކުރަމުންދާ ގޮތުން ތެލެސީމިއާ ކާޑު، ކައިވެނީގެ ފޯމާ އެކު ހުށަހަޅަންޖެހެ އެވެ. އެކަމަކު ބައެއް މެޖިސްޓްރޭޓު ކޯޓުތަކުން މިހާތަނަށް އެގޮތަށް އަމަލެއް ނުކުރެ އެވެ.
ތެލެސީމިއާ ކާޑު ހެދުމަކީ ގިނަ ފަހަރަށް މާލެ އައިސްގެން ކުރެވެން އޮންނަ ކަމަކަށްވާތީ، ކާޑު ހުށަހެޅުން ލާޒިމުކުރުން އޮތީ ކޯޓުތަކަށް އިހުތިޔާރީ ކަމެއްގެ ގޮތުގައި ދޫކޮށްލައިފަ އެވެ.
ނަމަވެސް، މާދަމާ އަމަލުކުރަން ފަށާ މެޖިސްޓްރޭޓް ކޯޓުތަކުގެ ގަވާއިދާ އެކު އެކަން ބަލަލުވެ، ކޮންމެ ކޯޓެއްގައި ކައިވެނި ކުރަން ހުށަހެޅިޔަސް ތެލެސީމިއާ ކާޑު ހުށަހެޅުން ލާޒިމުވާނެ އެވެ.
އާ ގަވާއިދުގައި ބުނެފައިވަނީ ކައިވެނިކުރަން އެދި ހުށަހަޅާއިރު، ކާވެނިކުރަން އެދޭ ދެ މީހުން ތެލަސީމިއާއަށް ޓެސްޓްކޮށް، އޭގެ ނަތީޖާ (ތެލެސީމިއާ ކާޑު) ހުށަހަޅަންވާނެ އެވެ.
އެހެންވެ، މިއަދު ގިނަ މެޖިސްޓްރޭޓް ކޯޓުތަކުން ވަނީ ކޯޓުން ކާވެނިކޮށް ދިނުމަށް ހުށަހަޅާ ފޯމާއެކު މާދަމާއިން ފެށިގެން ތެލެސީމިއާ ކާޑު ހުށަހަޅަން ޖެހޭނެ ކަމަށް އަންގާ އިއުލާންކޮށްފަ އެވެ.
ނަމަވެސް، ކާވެނިކުރަން އެދޭ ދެ މީހުން ކުރެ އެކަކުގެ ކިބައިގައި ތެލެސީމިއާ ވާރުތަކުރާ ގޮތް ނެތްނަމަ، ކާވެނިކުރަން އެދޭ ދެވަނަ މީހާގެ ތެލެސީމިއާ ޓެސްޓުގެ ނަތީޖާ ހުށަހެޅުން ލާޒިމް ނުވާނެ ކަމަށް ގަވާއިދުގައިވެ އެވެ.
ތެލަސީމިއާ ވާރުތަކުރާ ގޮތް ހުންނަ ދެ މީހަކު ނުވަތަ ދެ ކެރިއަރުން ކައިވެނި ކުރުމުން، ލޭ އަޅަންޖެހޭ ކުއްޖަކު ނުވަތަ ތެލަސީމިއާ މޭޖާ ކުއްޖަކު އުފަންވުމުގެ ފުރުސަތު އޮވެ އެވެ.
ތެލަސީމިއާ މޭޖާ ކުއްޖަކު ލިބޭނީ ތެލަސީމިއާ ވާރުތަކުރާ ގޮތް ހުންނަ ދެ މީހަކަށެވެ. އޭގެ ދެ މީހަކަށްނަމަ، ބަލިވެ އިންނަ ކޮންމެ ފަހަރު، ތެލަސީމިއާ ކުއްޖަކު އުފަންވުމަށް 25 ޕަސެންޓް ފުރުސަތު އޮވެ އެވެ. އަދި ތެލަސީމިއާ ވާރުތަކުރާ ގޮތް ހުންނަ ދަރިއަކު އުފަންވުމަށް 50 ޕަސެންޓް ފުރުސަތު އޮވެ އެވެ.
އެންމެ ފަހުން 2024 ވަނަ އަހަރު އާންމުކުރި ހިސާބުތަކުން ވެސް އެނގޭ ގޮތުގައި އެ އަހަރު އެކަނި ވެސް ތެލަސީމިއާ ދަފްތަރުގައި 13 ކުއްޖަކު އަލަށް ރަޖިސްޓްރީކުރި އެވެ. އޭގެ ކުރީގެ އަހަރު 10 ކުދިން އަދި 2022 ވަނަ އަހަރު 16 ކުއްޖަކު އިތުރުވި އެވެ.