ރަސްމާލޭގައި ޔޫއޭއީގެ އީގަލް ހިލްސް އިން ހިންގާ "މޯލްޑިވްސް ވޯޓާފްރޮންޓް އެންޑް މެރީނާ" މަޝްރޫއާ ގުޅޭ މައުލޫމާތު ސާފުކުރަން އަދާލަތު ޕާޓީން، އިންފްރަސްޓްރަކްޗާ މިނިސްޓަރު ޑރ. އަބްދުﷲ މުއްތަލިބާ އިއްޔެ ބައްދަލުކޮށްފި އެވެ.
އެ ޕާޓީން ސޯޝަލް މީޑިއާގައި ކުރި ޕޯސްޓުގައި ބުނީ މުހިންމު މައުލޫމާތު ސާފުކޮށް، ކަންކަން އޮޅުންފިލުވަން ޕާޓީގެ ރައީސް މުހައްމަދު ޝިފާން އަދި އިސް ލީޑަޝިޕުން މިނިސްޓަރު މުއްތަލިބާ ބައްދަލުކޮށްފައިވާ ކަމަށެވެ.
އެކަމުގެ އެ ބައްދަލުވުމާ ގުޅޭ އިތުރު ތަފްސީލެއް ދީފައެއް ނުވެ އެވެ.
ޓޫރިޒަމާއި ރިއަލްއެސްޓޭޓް ވިޔަފާރި ހިމެނޭހެން 500 ހެކްޓަރުގެ ބިމެއްގައި ބޮޑު މަޝްރޫއެއް ހިންގަން އީގަލް ހިލްސްއާ އެކު ސަރުކާރުން ކޮމާޝަލް ޓާމްސް އެގްރިމެންޓެއްގައި ސޮއިކޮށްފައި ވާއިރު އެކަމާ ގުޅޭ މައުލޫމާތު އަދާލަތު ޕާޓީގެ އިތުރުން އެހެން ބައެއް ފަރާތްތަކާ ވެސް މިނިސްޓްރީން ވަނީ ހިއްސާކޮށްފަ އެވެ.
ވިހި ބިލިއަން ޑޮލަރުގެ އެ މަޝްރޫއުގެ ތެރެއިން އީގަލް ހިލްސް އިން ހުޅުމާލޭގައި 5،000 ހައުސިން ޔުނިޓު އަޅަން ވެސް ނިންމާފައި ވާއިރު މުޅި މަޝްރޫއުގެ 10 އަހަރުގެ މުއްދަތުގެ ތެރޭގައި ދައުލަތަށް 11 ބިލިއަން ޑޮލަރު (169 ބިލިއަން ރުފިޔާ) އަށްވުރެ ބޮޑު އާމްދަނީއެއް ލިބޭނެ ކަމަށް ވަނީ ލަފާކޮށްފަ އެވެ. ރަސްމާލެ މަޝްރޫއުން އަހަރަކު ލިބޭނެ ކަމަށް ލަފާކުރާ އާމްދަނީއަކީ ރާއްޖޭގެ 179 ރިސޯޓާއި 16 ހޮޓަލާއި 920 ގެސްޓްހައުސްގެ އިތުރުން 165 ސަފާރީ އުޅަނދުން ދައުލަތަށް މިހާރު ލިބޭ ޖުމްލަ އާމްދަނީއަށްވުރެ އިތުރު އަދަދެއް ކަމަށް ފިނޭންސް މިނިސްޓަރު ހަސަން ޒަރީރު ވަނީ ވިދާޅުވެފަ އެވެ.
ސިޔާސީ ގޮތުން ވަކި ފިކުރަކަށް މި ވަގުތު ތާއީދު ނުކޮށް އޮތް އަދާލަތު ޕާޓީން ވަނީ "މޯލްޑިވްސް ޕާލް ރެސިޑެންސީ"ގެ ނަމުގައި ބޭރުގެ އިންވެސްޓަރުންނަށް ހާއްސަކޮށްގެން ތައާރަފްކުރަން އުޅޭ ވިސާގެ މައުލޫމާތު ސާފުކުރަން ވެސް އިކޮނޮމިކް މިނިސްޓަރު މުހައްމަދު ސައީދުއާ މިދިޔަ އާދިއްތަ ދުވަހު ބައްދަލުކޮށްފަ އެވެ.
ޕާލް ރެސިޑެންސީ ޕްރޮގްރާމަކީ ރާއްޖޭގެ އިގުތިސާދު ޑައިވާސިފައިކޮށް، ބޭރުގެ އިންވެސްޓަރުންގެ ޝައުގުވެރިކަން ހޯދަން ރާއްޖެއަށް ސަރުކާރުން ތައާރަފުކޮށްފައިވާ "ރެސިޑެންސީ ބައި އިންވެސްޓްމަންޓް" ޕްރޮގްރާމެކެވެ. އެ ޕްރޮގްރާމްގެ މައިގަނޑު މަގުސަދަކީ ރާއްޖެއަށް ބޭރު ފައިސާ އިތުރުކޮށް، އިގްތިސާދީ ދަތިތަކަށް ހައްލު ހޯދުން ކަމަށް ސަރުކާރުން ބުނެ އެވެ.