މަޖީދިއްޔާ ސްކޫލަށް 100 އަހަރު ވާން ބާކީ އޮތް 200 ދުވަސް ފާހަގަ ކުރުމުގެ ގޮތުން، އެ ސްކޫލަށް ހިދުމަތް ކުރެއްވި ހުރިހާ ޕްރިންސިޕަލުންގެ ފޮޓޯ ގެލަރީއެއް ނޭޝަނަލް އާޓް ގެލަރީގައި މިރޭ ހުޅުވައިފި އެވެ.
އެ ފޮޓޯ ގެލަރީގައި އެ ސްކޫލުގައި 1927 ވަނަ އަހަރު ހުންނެވި ހުސެއިން ސަލާހުއްދީނުން ފެށިގެން މިހާރުގެ ޕްރިންސިޕަލް އަހުމަދު މުޖާހިދުއާ ހަމައަށް 25 ޕްރިންސިޕަލުންގެ ފޮޓޯ އާއި މައުލޫމާތު ހިމެނެ އެވެ.
ފޮޓޯ ގެލަރީ ހުޅުއްވައި ދެއްވީ އެޑިއުކޭޝަން މިނިސްޓްރީގެ ސްޓޭޓް މިނިސްޓަރު ޑރ. އަހުމަދު މުހައްމަދު އެވެ.
ފޮޓޯ ގެލަރީއާ ގުޅޭގޮތުން، މަޖީދިއްޔާ މުސްކުޅި ދަރިވަރުންގެ ޖަމިއްޔާގެ ރައީސް އަހުމަދު އަފްއާލް ވިދާޅުވީ އެ ޕްރިންސިޕަލުންނަކީ އެ ސްކޫލަށް ހިދުމަތް ކުރެއްވިކަން ރަސްމީ ތާރީހުތަކުންނާއި ލިޔެކިޔުންތަކުން ފެންނަން ހުރި ބޭފުޅުން ކަމަށެވެ.
"އަޅުގަނޑުމެން ސަލާހުއްދީނަށް ކާފަ ކިޔާ ކުދިންގެ ފަރާތުން ވެސް މައުލޫމާތުތައް ހޯދިން އަދި މިހާރު ދުނިޔޭގައި ތިއްބެވި ޕްރިންސިޕަލުންގެ ފަރާތުން ވެސް މައުލޫމާތު ހޯދިން. އެންމެ އުނދަގޫ ކަމަކަށް ދިމާވީ އެ ސްކޫލަށް ހިދުމަތް ކުރެއްވި ރާއްޖެއިން ބޭރުގެ ޕްރިންސިޕަލުންގެ މައުލޫމާތާއި ފޮޓޯ ހޯދަން،" އެ ޖަމިއްޔާއިން ކުރި މަސައްކަތް ފާހަގަ ކުރައްވަމުން އަފްއާލް ވިދާޅުވި އެވެ.
އޭނާ ވިދާޅުވީ ކުރިން ހިދުމަތް ކުރެއްވި ޕްރިންސިޕަލުންގެ ފޮޓޯ ހެދުމުގައި އާޓިފިޝަލް އިންޓެލިޖެންސް (އޭއައި) އާއި ޑިޖިޓަލް އިންހޭންސް ބޭނުން ކޮށްފައިވާނެ ކަމަށެވެ.
މަޖީދިއްޔާ ސްކޫލުން ބުނީ މާދަމާ ހަވީރު 4:00 އިން ހަވީރު 6:00 އަށް އަދި ހޮނިހިރު ދުވަހުގެ ހެނދުނު 10 އިން ރޭގަނޑު 10 އަށް އާންމުންނަށް ގެލެރީ އަށް ވަދެވޭނެ ކަމަށެވެ.
މަޖީދިއްޔާ ސްކޫލަށް އަންނަ އަހަރު 100 އަހަރު ފުރޭތީ، އެ މުނާސަބާ ކުލަގަދަކޮށް ފާހަގަކުރުމަށް އެ ސްކޫލުން އަންނަނީ ތައްޔާރުވަމުންނެވެ. އެ ސްކޫލަށް ގަރުނެއް ފުރުން ފާހަގަކުރުމަށް 2024 ވަނަ އަހަރު ވަނީ ހާއްސަ ކައުންޓްޑައުނެއް ވެސް ފަށައިފަ އެވެ.
އެންމެ ފުރަތަމަ ހަރަކާތަކަށް "މަޖީދިއްޔާ ދަންމަރު"ގެ ނަމުގައި ބާއްވާ ހާއްސަ މިޔުޒިކް ޝޯއެއް ވަނީ ބާއްވައިފަ އެވެ. މިއީ މަޖީދިއްޔާގެ މުސްކުޅި ދަރިވަރުންގެ ތެރެއިން ސްކޫލް ދުވަސްވަރާއި އޭގެ ފަހުން ވެސް މިއުޒިކް ކުޅުނު މީހުން އިސް ނަގައިގެން ބޭއްވި ޝޯ އެކެވެ. އޭގެ ފަހުން ވެސް ތަފާތު ގިނަ ހަރަކާތްތައް އަންނަނީ ބާއްވަމުންނެވެ.
މަޖީދިއްޔާ ސްކޫލުގައި ކިޔަވައިދޭން ފެށީ އޭޕްރީލް 19، 1927 ގަ އެވެ. އެ ސްކޫލަށް 100 އަހަރު ވާނީ އޭޕްރީލް 19، 2027 ގަ އެވެ. މީގެ ކުރިން، މަޖީދިއްޔާއަށް 75 އަހަރު ފުރުމުގެ މުނާސަބަތުގައި ވެސް ކުލަގަދަ ހަރަކާތްތަކެއް މާލޭގައި ބޭއްވި އެވެ.