ރާއްޖެއަށް ހިޖުރަކުރާ ދޫނީގެ އަދަދު ކޮންމެ އަހަރަކު މަދުވަމުންދާ ކަމަށާއި ދޫނި ހިފައި ގެންގުޅެ އޭގެ ވިޔަފާރިކުރާ މީހުން ޖޫރިމަނާކުރާނެ ކަމަށް އެންވަޔަރަމަންޓަލް ރެގިއުލޭޓަރީ އޮތޯރިޓީ (އީއާރުއޭ) އިން ދީފި އެވެ.
އީއާރްއޭއިން މިއަދު ކުރި އިއުލާނެއްގައި ބުނީ ކޮންމެ އަހަރެއްގެ ވެސް މި ދުވަސްވަރު، އިރުވައި މޫސުމާ ދިމާކޮށް ގިނަ ބާވަތްތަކެއްގެ ދޫނި މަޅިފަތި ޖަހައިގެން ހިފުމާއި، ފިޔަކޮށައި ކޮށިތަކުގައި ބަންދުކޮށްގެން ގެންގުޅޭކަން ފާހަގަކުރެވިފައިވެ އެވެ.
އެ ދޫނިތައް އޮޅުދޫނީގެ ގޮތުގައި ގެންގުޅުމުގެ އިތުރުން ވިޔަފާރީގެ ގޮތުގައި ބޭނުންކުރާކަން ވެސް ފާހަގަކުރެވިފައިވާކަމަށް އީއާރްއޭއިން ބުންޏެވެ.
އީއާރުއޭއިން މިދިޔަ އަހަރު ކޮށްފައިވާ ދިރާސާއަކާ ހަވާލާދީ ބުނީ ރާއްޖެއަށް ހިޖުރަކުރާ ދޫނީގެ އަދަދު މިހާރު މަދުވަމުންދާ ކަމަށެވެ. މިއީ ރާއްޖޭގެ ވެއްޓަށް ކުރާ ފައިދާތަކާއި މުއްސަނދިކަމަށް އެޅޭ ހުރަހެއް ކަމަށް ވެސް ބުންޏެވެ.
ރާއްޖެއަށް ހިޖުރަކުރާ ދޫނިތަކަކީ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން ހަދާފައިވާ، ގުދުރަތީ ގޮތުގައި ނުވަތަ ތަބީއީ ގޮތުގައި ހިމާޔަތްކޮށް ރައްކާތެރިކުރާ ދިރޭ ތަކެއްޗާބެހޭ ގަވާއިދުގެ ދަށުން ހިމާޔަތްކޮށްފައިވާ ދިރުންތަކެކެވެ.
ދޫނި ހިފައި ގެންގުޅުމަކީ އެ ގަވާއިދުގެ 17 ވަނަ މާއްދާގެ ދަށުން މަނާކަމެކެވެ.
ހިޖުރަކުރާ ދޫނި ހިފުމަކީ ރާއްޖެއިން ބައިވެރިވެފައިވާ ބައިނަލްއަގުވާމީ މުއާހަދާ، "ކޮންވެންޝަން އޮން މައިގްރޭޓަރީ ސްޕީޝީޒް"އާ ވެސް ހިލާފު އަމަލެއް ކަމަށާއި ހިޖުރަކުރާ ދޫނިތަކަށް ރައްކާތެރިކަން ފޯރުކޮށްދިނުމަކީ އެ މުއާހަދާގެ ދަށުން ރާއްޖޭގެ ޒިންމާއެއް ކަމަށް ވެސް ބުންޏެވެ.
ގަވާއިދާ ހިލާފަށް ދޫނި ހިފައި، ގެންގުޅެ އަދި ވިޔަފާރިކުރާ ފަރާތްތަކަށް އީއާރުއޭއިން ވަނީ އެ އަމަލުތަކުން ދުރުހެލިވުމަށް ނަސޭހަތްތެރިވެފައި އެވެ. އަދި މިހާރު ހިފާފައިވާ ދޫނިތައް ދޫކޮށްލުމަށް ވެސް އެ އޮތޯރިޓީން އެންގި އެވެ.
އެފަދަ އަމަލުތައް ހިންގާ ފަރާތްތައް، ހިމާޔަތްކޮށް ރައްކާތެރިކުރާ ދިރޭ ތަކެއްޗާބެހޭ ގަވާއިދުގެ ދަށުން ޖޫރިމަނާކުރާނެ ކަމުގެ އިންޒާރާ އެކު އެ އޮތޯރިޓީން ވަނީ ދޫނި ހިފައި ގެންގުޅޭ ފަރާތްތަކުގެ މައުލޫމާތު އެނގޭނަމަ، އެކަން އީއާރުއޭއަށް ރިޕޯޓުކުރުމަށް އެދިފަ އެވެ.
ޝަކުވާ ހުށަހަޅާއިރު، ދޫނި ގެންގުޅޭ ފަރާތުގެ މައުލޫމާތާއި އެތަކެތި ގެންގުޅޭ ތަނުގެ ތަފުސީލާއި ހިފާފައިވާ ދޫނީގެ ބާވަތުގެ އިތުރުން މައްސަލައާ ގުޅުންހުރި ފޮޓޯ ނުވަތަ ވީޑިއޯ ހުށަހެޅުމަށް އީއާރުއޭއިން އެދިފައިވެ އެވެ.
މައުލޫމާތު ހިއްސާކުރާނީ އެ އޮތޯރިޓީގެ ނަމްބަރު 3335949 އަށް ގުޅައިގެން ނުވަތަ އީމެއިލް މެދުވެރިކޮށްވެ.