މާލޭގެ ވިޔަފާރި ބަނދަރު ކ. ތިލަފުއްޓަށް ބަދަލުކުރުމަށް ހިންގާ ބިޔަ މަޝްރޫއު ނިމުމާ އެކު، އޭގެ ނަތީޖާއަކީ އާންމު ދިރިއުޅުމުގެ ހަރަދުތައް ކުޑަވެ، ތާޒާކަންމަތީގައި ކާބޯތަކެތި ލިބެން ފެށުން ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
އޭނާ އެހެން ވިދާޅުވީ، ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރޫއު ކުރިއަށް ގެންދާ ގޮތް ބައްލަވައިލެއްވުމަށް ރައީސް ޑރ. މުހައްމަދު މުއިއްޒު ތިލަފުއްޓަށް އިއްޔެ ކުރެއްވި ޒިޔާރަތުގައި މީޑިއާއާ ވާހަކަ ދައްކަވަމުންނެވެ.
ސަރުކާރުން ކަނޑައަޅާފައި ވަނީ އެ މަޝްރޫއުގެ ފުރަތަމަ ފިޔަވަހީގެ މަސައްކަތް ނިންމައި އަންނަ އަހަރުގެ ނޮވެމްބަރު 11 ގައި ތިލަފުށި ޕޯޓް ހުޅުވާށެވެ. މުޅި މަޝްރޫއު ނިންމަން އަމާޒު ހިފާފައި ވަނީ ނޮވެމްބަރު 2028 އަށެވެ. ނަމަވެސް މާލޭގެ ވިޔަފާރި ބަނދަރުގެ ހާލަތު ހުރި ގޮތުން އެކަށީގެންވާ ވަސީލަތްތައް ނެތުމުގެ ދަތިތަކުން އަރައިގަތުމަށްޓަކައި މި މަހުގެ 28 ގައި ތިލަފުށީގައި ޕޯޓް އޮޕަރޭޝަން ފަށާނެކަން އެމްޕީއެލް އިން ވަނީ އިއުލާންކޮށްފަ އެވެ.
މާލޭގެ ވިޔަފާރި ބަނދަރަށް ކައިރިކުރާ ބޯޓުތަކުން މުދާ ހުސްކުރުމަށް މިހާރު 7-14 ދުވަސް ނަގާއިރު އެއީ ރާއްޖޭގައި ބައެއް ބާވަތުގެ މުދަލުގެ އަގު އިންތިހާއަށް އުފުލޭ މައިގަނޑު އެއް ސަބަބެވެ.
މިނިސްޓަރު ސައީދު ވިދާޅުވީ، ތިލަފުށި ޕޯޓް ހުޅުވުމާ އެކު އެންމެ ދުވަހެއްގެ ތެރޭގައި ބޯޓުތައް ހުސްކުރެވޭނެ ކަމަށެވެ.
"މިކަމުގެ އާހިރު ނަތީޖާއަކަށް ވާނީ އާންމު ރައްޔިތުން ގޭގޭގައި ދިރިއުޅުއްވާ ބޭފުޅުންގެ ކޮސްޓް އޮފް ލިވިންއަށް ވަރަށް ބޮޑު ލުޔެއް ލިބިގެންދިއުން. ކާބޯތަކެތި، ތަރުކާރީ މިހެން ގޮސް އެކި ބާވަތްބާވަތް ތާޒާކަންމަތީގައި ބޯޓުފަހަރުން ގެނެސް ވަގުތު ބޭލޭނެ،" އޭނާ ވިދާޅުވި އެވެ.
"މިހާރު [ބަނދަރަށް ބާލަން] ހަތް ދުވަސް ނަގާ މުދާ އެއް ދުވަސް ތެރޭގައި، ކުޑަވަގުތުކޮޅެއްގެ ތެރޭގައި [ބަނދަރަށް] ބޭލި އެ މުދާ މާލެއަށް ގޮސް ޝޮޕް ކުރެވިގެން ހަރުގަނޑަށް އައުން. އަދި އެ ތާޒާކަންމަތީގައި ސުފުރާ މައްޗަށް ދިއުން. މިއީ ހަގީގަތުގައި ވަށާޖެހޭ ތަރައްގީއަކީ."
މިނިސްޓަރު ވިދާޅުވި ގޮތުގައި އެ ހުރިހާ ކަމެއް ހާސިލް ވަނީ އެތައް ދައްޗަކާ އެކު ވެސް ކުޑަ ދުވަސްކޮޅެއްގެ ތެރޭގަ އެވެ.
ތިލަފުއްޓަށް ޕޯޓް ބަދަލުކުރުމުގެ އެންމެ ބޮޑު އުފަލެއް ލިބޭނީ ދިވެހި ވިޔަފާރިވެރިންނަށް ކަމަށް އޭނާ ވިދާޅުވި އެވެ.
ސައީދު ވިދާޅުވީ، ރާއްޖެއަށް ގެންނަ މުދާ ބޭލުމުގައި އޮތީ ވާރުތަވަމުން އައި ދަތިތަކެއް ކަމަށާއި އެކަމަކު ރައީސް މުއިއްޒު ބޭނުންފުޅުވީ ވެރިކަމާ ހަވާލުވެވަޑައިގެން ފުރަތަމަ ދުވަހުން ފެށިގެން ވެސް މައްސަލަ ހައްލު ކުރަން ކަމަށެވެ.
"މިއީ މައްޗަށް އަަރައިގެން ބުރިބުރިއަށް އަރާ ކަހަލަ މަޝްރޫއެއް ނޫން. އެހެން ނަމަވެސް ވާޓިކަލްކޮށް އޮތް މަޝްރޫއަކީ ހަގީގަތުގައި ވަރަށް ބޮޑު ކުރިއެރުމެއް މިއޮތީ އައިސްފައި ހަގީގަތުގައި،" މިނިސްޓަރު ވިދާޅުވި އެވެ.
އޭނާ ފާހަގަކުރެއްވި ގޮތުގައި، މުޅި މަޝްރޫއު ނިމޭއިރު މާލޭގެ ބާޒާރުގައި މިހާރު ހިންގާ އަތޮޅު ފިހާރަތަކާއި ގުދަންތައް ވެސް ތިލަފުއްޓަށް ބަދަލުކޮށް، ފްރީ ޒޯންތައް ގާއިމްކުރާނެ އެވެ.
"އަދި ބްރިޖުން މާލެއާ ގުޅި އޭގެ ތެރެއިން މާލެއަށް އިންބައުންޑް ކާގޯ ވެސް ގެންދެވޭނެ ގޮތަށް އިންތިޒާމްތައް ހަމަޖެހިގެން އަދި ހުޅުމާލެއިން ވެސް އިންބައުންޑް ކާގޯ ވެސް ގެންދެވޭ ގޮތަށް އެއާޕޯޓަށް ސީޓުއެއާ ކާގޯ ވެސް ގެންދެވޭނެ އިންތިޒާމްތައް ހަމަޖެހިގެން، މި ލޮޖިސްޓިކްސް ހައްލެއް މި ގެނެވެނީ،" މިނިސްޓަރު ވިދާޅުވި އެވެ.
ތިލަފުއްޓަށް ޕޯޓް ބަދަލުކުރުމާ ގުޅޭ އިތުރު ބައެއް މައުލޫމާތު
- ތިލަފުއްޓަށް މާލޭ ވިޔަފާރި ބަނދަރު ބަދަލުކުރުމުގެ މަސައްކަތުގައި، އެތެރޭގެ އުޅަނދުފަހަރަށް ހާއްސަ ކީ-ވޯލްގެ ފުރަތަމަ 100 މީޓަރުގެ މަސައްކަތް މިހާރު ވަނީ ނިމިފައި. އަދި އެތެރޭގެ ކީ-ވޯލްގެ ހިއްކި ސަރަޙައްދު ބެކްފިލް ކުރުމުގެ ގާތްގަނޑަކަށް 40 ޕަސެންޓު މަސައްކަތް ވަނީ ނިންމާފައި.
- ކީ-ވޯލަށް ބޭނުންވާ ޕްރީކާސްޓް ކޮންކްރީޓް ބްލޮކްތައް ސައިޓުގައި އުފެއްދުމުގެ މަސައްކަތާއި ބޭނުންވާ މެޝިނަރީ އާއި ވަސީލަތްތައް ހޯދުމުގެ އިތުރުން ޓާމިނަލް އިމާރާތްތައް އަޅާނެ ކޮންޓްރެކްޓަރަކު ހޮވުމުގެ މަސައްކަތް މިހާރު އަންނަނީ ކުރިއަށް.
- ތިލަފުށީގައި ގާއިމުކުރާ 60 ހެކްޓަރުގެ ޖާގައިގެ ބަނދަރު ހުޅުވޭއިރު އަހަރަކު 390،000 ޓީއީޔޫ ކެޕޭސިޓީގައި ކޮންޓެއިނަރު ގެންގުޅުމުގެ ޖާގަ ހަދާނެ. މި އަދަދު އަހަރަކު 1.8 މިލިއަން ޓީއީޔޫ އަށް ކޮންޓެއިނަރުގެ ކެޕޭސިޓީ އިތުރުކުރާނެ.
- ބަނދަރު ހުޅުވާނީ ފުން މިނުގައި 14.6 މީޓަރު ހުންނަ ބައިނަލްއަގުވާމީ ކޮންޓޭނަރު ބޯޓުފަހަރަށް ހާއްސަ 375 މީޓަރު ދިގު ކީ-ވޯލަކާއެކުގައި. މި ކީ-ވޯލް 1.4 ކިލޯމީޓަރަށް ދިގުކުރުމުގެ ޖާގައޮންނާނެ.
- ތިލަފުށި ބަނދަރުގައި ޑޮމެސްޓިކް އުޅަނދުފަހަރަށް ހާއްސަ ގާތްގަނޑަކަށް ދެ ކިލޯމީޓަރަށް ވުރެ ދިގު ކީ-ވޯލެއް ހަދާނެ.
- މި ބަނދަރުގައި ގާއިމުކުރާ ބައިނަލްއަގުވާމީ ކޮންޓޭނަރު ބޯޓުފަހަރަށް ހާއްސަ 375 މީޓަރު ދިގު ކީ-ވޯލް ހެދުމާ އެކު، މުދާ ބަރުކޮށް ބާލައިހެދުން ގާތްގަނޑަކަށް ދެ ދުވަހުގެ "ޓާން އަރައުންޑް ޓައިމްއަކަށް" ކުރުކުރެވޭނެ.
- ތިލަފުށި ބަނދަރު ހުޅުވޭއިރު ޝިޕް-ޓު-ޝޯ ދެ ކީ ކެރޭނާއި އެއް މޮބައިލް ހާބަރު ކެރޭނު ގާއިމުކުރުމަށް ވެސް ވަނީ ކަނޑައަޅާފައި.
ރައީސް މުއިއްޒު އިއްޔެ ވިދާޅުވީ، ތިލަފުށި ޕޯޓް މާލޭގެ ވިޔަފާރި ބަނދަރާ އަޅާ ބަލާއިރު ހަތަރު ގުނަ އިތުރުވާނެ ކަމަށާއި އެއީ ރާއްޖޭގައި މިވަގުތު ހިންގާ އިގުތިސާދީ އެންމެ ބިޔަ މަޝްރޫއު ކަމަށެވެ.