އާންމު އިޖުތިމާއީ މިންގަނޑާ ހިލާފަށް، ނިވާކަން ކުޑަކޮށް ހެދުން އަޅައިގެން އާންމު ތަންތަނުގައި އުޅޭ ބިދޭސީންނަށް ފިޔަވަޅު އަޅާނެ ކަމުގެ އިންޒާރު ފުލުހުން ދީފި އެވެ.
ފުލުހުން މިއަދު ކުރި އިއުލާނެއްގައި ބުނީ ރާއްޖޭގައި ދިރިއުޅޭ ބައެއް ބިދޭސީން އާންމު އިޖުތިމާއީ މިންގަނޑުތަކާ ހިލާފަށް މިހާރަކަށް އައިސް، ނިވާކަން ކުޑަކޮށް ހެދުން އަޅައިގެން މަގުމަތީގައި އަދި އާންމު ތަންތަނުގައި އުޅޭކަން ފާހަގަކުރެވިފައިވާ ކަމަށެވެ.
ބައެއް ބިދޭސީންގެ މިފަދަ އަމަލުތަކަކީ މުޖުތަމައުގެ އާންމު ސުލޫކު އަދި އަހުލާގީ މިންގަނޑުތަކާ ހިލާފު އަމަލުތަކެއް ކަމަށާއި އޭގެ ސަބަބުން މުޖުތަމައުގެ އަމާންކަމާއި ސުލްހަ މަސަލަސްކަމަށް ނޭދެވޭ އަސަރުކޮށްފާނެ ހާލަތްތަކެއް ކުރިމަތިވުމުގެ ކުރިން، އެފަދަ ކަންކަން ހުއްޓުވުމަށް އެޅެން ހުރި ފިޔަވަޅުތައް އަޅާނެކަމަށް ފުލުހުން ބުންޏެވެ.
"އެފަދަ ކަންކަން ހުއްޓުވުމަށް މި ހިދުމަތަށް މަތިކޮށްފައިވާ ގާނޫނީ ޒިންމާ އަދާކޮށް އެފަދަ ފަރާތްތަކާމެދު ގާނޫނު ނަމްބަރު 2010/11 (އާންމު އިޖުތިމާއީ މިންގަނޑުތަކާ ހިލާފު އަމަލުތައް ހުއްޓުވުމުގެ ގާނޫނު)ގެ ދަށުން އެޅެންހުރި ފިޔަވަޅުތައް އަޅާނެކަމުގައި ދަންނަވަމެވެ،" އެ އިއުލާނުގައިވެ އެވެ.
ފުލުހުން ވަނީ ބިދޭސީންގެ ކިބައިން މިފަދަ އަމަލުތައް ނުފެންނާނެ ގޮތަކަށް އަމަލުތައް ބެހެއްޓުމަށް މައުލޫމާތުދީ ހޭލުންތެރިކުރުވުމަށް، ބިދޭސީން ގެންގުޅޭ ފަރާތްތަކަށް އިލްތިމާސްކޮށްފަ އެވެ.
ރާއްޖޭގައި އުޅޭ މީހުންނާއި ރާއްޖެއަށް ޒިޔާރަތްކުރާ ޓޫރިސްޓުންނަށް ހާއްސަކޮށްފައުވާ ސަރަހައްދުތައް ފިޔަވައި، އެނޫން އާންމު ތަންތަނާއި މަގުތަކުގައި އުޅޭއިރު ދިވެހި މުޖުތަމައުގެ ސަގާފަތާއި އާދަކާދައަށް ބިދޭސީން އިހުތިރާމުކުރުމަށް ފުލުހުން އިލްތިމާސް ކޮށްފައިވެ އެވެ.
ފުލުހުން ބުނީ މިއާ ހިލާފަށް އަމަލުކުރާ މީހުންނާ މެދު ވެސް ގާނޫނީ ފިޔަވަޅު އަޅާނެ ކަމަށެވެ.