އާންމުންގެ ހިތްތަކުގައި ބިރުވެރިކަން އުފެދޭގޮތަށް ނުރައްކާތެރި ވެހިކަލް ދުއްވާ މީހުންގެ ތެރޭގައި ސަރުކާރުގެ މުއައްސަސާތަކާއި ކުންފުނިތަކުގެ މުވައްޒަފުން ހިމެނޭކަން ފާހަގަވެފައިވާ ކަމަށް ފުލުހުން މިއަދު ބުނެފި އެވެ.
ނުރައްކާތެރިކޮށް ވެހިކަލް ދުއްވާ މީހުންނަށް ހަރުކަށި ފިޔަވަޅު އެޅުމުގެ މަސައްކަތް ފަށާފައިވާކަން ހާމަކޮށް ފުލުހުން ނެރުނު ބަޔާނެއްގައި ބުނީ އެފަދަ އަމަލުތަކުގައި ސަރުކާރުގެ މުއައްސަސާތަކާއި ކުންފުނިތަކުގެ މުވައްޒަފުން ޝާމިލުވާކަން ދިވެހި ފުލުހުންނަށް ފާހަގަކުރެވިފައިވާ ކަމަށާއި އެހެންވެ، އެ ފަރާތްތަކާމެދު އެޅެންހުރި އިދާރީ ފިޔަވަޅުތައް އެޅުމަށް އެ މުއައްސަސާތަކަށް އެ މައުލޫމަތު ހިއްސާކުރަމުންދާނެ ކަމަށެވެ.
އެ ބަޔާނުގައި ބުނީ ނުރައްކާތެރިކޮށް އުޅަނދު ދުއްވާ މީހުން ދެނެގަނެ، އެ ފަރާތްތަކުގެ މައުލޫމާތު ޕްރޮފައިލްކުރުމުގެ މަސައްކަތް ކުރަމުން އަންނަ ކަމަށެވެ. އެފަދަ ފަރާތްތައް ފުލުހަށް ހާޒިރުކޮށް ނަސޭހަތްތެރިވުމަށްފަހު، އެ އަމަލުތައް ތަކުރާރުކުރާ ފަރާތްތަކާމެދު، ޓްރެފިކް ގާނޫނާއި ގަވާއިދުތަކުގެ ދަށުން ކުރިން ކުރަމުން އައި ޖޫރިމަނާގެ އިތުރުން، އިތުރު އިންޒާރަކާ ނުލައި ޖިނާއީ ތަހުގީގު ހިންގާނެ ކަމަށް ވެސް ބުންޏެވެެ.
ފުލުހުން ބުނީ ފިޔަވަޅު އެޅުމަށް ހަމަޖެހިފައި ވަނީ ބިރުވެރިކަން އުފެދޭގޮތަށް ޒިގްޒެގްކޮށް ދުއްވާ މީހުންނާއި އުޅަނދަށް ބަދަލުގެނެސް ސައިލެންސަރު އަޑުގަދަކޮށް ދުއްވުމާއި ހަރު ބިންމަތީގައި ގާނަމުން ދުއްވުމުގެ އިތުރުން ސްޕީޑް ބްމްޕަރަށް މަޑުނުކޮށް ބާރު ސްޕީޑުގައި ދުއްވާ މީހުންނަށް ކަމަށެވެ.
ފުލުހުން ބުނި ގޮތުގައި ކަމާގުޅޭ އިދާރާތަކުގެ ހުއްދަ ނުނަގައި ރޭސްޖެހުމާއި ހުނަރުދެއްކުމާއި ނުރައްކާތެރިކޮށް އޯވަޓޭކްކުރުމާއި މަސްތުގެ ހާލަތުގައި ދުއްވުން އަދި ފުލުހުން މަޑުކުރަން އެންގުމުން މަޑުނުކޮށް ފިލުމާއި ފިލަން މަސައްކަތްކުރާ ފަރާތްތަކާމެދު ވެސް ފިޔަވަޅު އަޅާނެ އެވެ.
ނުރައްކާތެރިކޮށް ދުއްވާ އުޅަނދުތައް ހޯދައި އުޅަނދު ދުއްވި ފަރާތުގެ އިތުރުން އުޅަނދުގެ ވެރިފަރާތާމެދުވެސް ފިޔަވަޅު އަޅާނެކަން ފުލުހުން ވަނީ ބަޔާނުގައި ހަނދާންކޮށްދީފަ އެވެ.
ނުރައްކާތެރިކޮށް ވެހިކަލް ދުއްވާ މީހުންނަށް ހަރުކަށި ފިޔަވަޅު އަޅާނެކަމަށް ފުލުހުން ބުނެފައި މިވަނީ މި ފަހުން ސޯސަން މަގުގައި ހިނގި ނުރައްކާތެރި އެކްސިޑެންޓެއްގައި ވެސް ޒުވާން އަންހެނަކު ނިޔާވެފައިވަނިކޮށެވެ.
އޭނާ ވެސް އެކްސިޑެންޓުވީ ޒިގްޒެގްކޮށް ދުއްވަމުން އައި ސައިކަލެއްގައި ޖެހިގެންނެވެ. އެ ސައިކަލު ދުއްވަން އިން މީހާއަކީ ލައިސަންސް ނެތް މީހަކަށްވާތީ މިއަހަރު ހަތަރު ފަހަރު ހުއްޓުވައި އޭނާ ޖޫރިމަނާ ވެސް ކޮށްފައިވެ އެވެ.
އެ މައްސަލައާ ގުޅިގެން އެމީހާ ވަނީ ހައްޔަރުކޮށް ބަންދުކޮށްފަ އެވެ.