ސިޔާސީ ވަކި ފިކުރެއް ޕްރޮމޯޓުކުރަން ކައުންސިލްތަކުގެ މުދާ ބޭނުންކުރުމަކީ ލާމަރުކަޒީ ގާނޫނާ ހިލާފު ކަމެއް ކަމަށާއި އެގޮތަށް އަމަލުނުކުރަން ލޯކަލް ގަވަމެންޓް އޮތޯރިޓީ (އެލްޖީއޭ) އިން ކައުންސިލްތަކަށް އިއްޔެ އިލްތިމާސްކޮށްފި އެވެ.
މި ހަފުތާ ބަންދުގައި އިދިކޮޅު އެމްޑީޕީގެ ކޮންގްރެސް ބާއްވަން މާލެ ސިޓީ ކައުންސިލްގެ އާއްމު ހިދުމަތްތަކާ ބެހޭ ބައި ދީފައިވަނިކޮށް އެލްޖީއޭގެ ސީއީއޯ މުހައްމަދު ނިމާލް ސޮއިކުރައްވައި ސިޓީތަކާއި ރަށު ކައުންސިލްތަކުގެ ރައީސުންނަށް ފޮނުއްވި ސިޓީގައި ވިދާޅުވީ ކައުންސިލްތަކުގެ ބެލުމުގެ ދަށުގައި ހުރި މުދަލާއި ވަސީލަތްތައް ބޭނުންކުރަން ޖެހޭނީ ލާމަރުކަޒީ ގާނޫނުން މަތިކޮށްފައިވާ ޒިންމާ އާއި މަސްއޫލިއްޔަތު އަދާކުރަން ކަމަށެވެ.
އެ މުދަލާއި ވަސީލަތްތައް ބޭނުންކުރާއިރު މީހަކު ނުވަތަ ބަޔަކު ނިސްބަތްވާ ކުލައަކަށް ނުވަތަ އާއިލާއަކަށް ނުބަލާ ހަމަހަމަ އުސޫލު ގެންގުޅެންޖެހޭނެ ކަމަށް ވެސް ގާނޫނުގައި ބުނާ ކަމަށް ސިޓީގައިވެ އެވެ.
އޭގެ އިތުރުން ކައުންސިލްގެ މުދާ، ހާއްސަކޮށް އެ އިދާރާގެ ގޯއްޗާއި އާއްމު ހިދުމަތްތަކަށް ކަނޑައަޅާފައިވާ ބިންތައް ބޭނުންކޮށްގެން ސިޔާސީ ޕާޓީއެއްގެ ފިކުރު ޕްރޮމޯޓުކުރުމަކީ އެލްޖީއޭއިން ދެކޭގޮތުގައި ލާމަރުކަޒީ ގާނޫނާ ހިލާފު ކަމެެކެވެ.
"ކައުންސިލް އިދާރާއަކީ ރައްޔިތުން ހިދުމަތް ހޯދުމަށް އަންނަ މުހިއްމު އިދާރާއެއްކަމުން އެފަދަ ތަންތަނުގައި ސިޔާސީ ހަރަކާތްތައް ހިންގުމަކީ ރައްޔިތުންގެ ހިތުގައި ނުތަނަވަސްކަން އުފެދިގެންދާނެ ކަމެއް ކަމުގައި ވެސް ދެކެމެވެ،" ސިޓީގައި ވެ އެވެ.
"ކައުންސިލްތަކަކީ ލާމަރުކަޒީ އުސޫލުން ދައުލަތުގެ ހިދުމަތްތައް ދިނުމަށް ގާނޫނުން ގާއިމްކޮށްފައިވާ ފަށަލައަކަށްވާއިރު ކައުންސިލުން ފޯރުކޮށްދޭ ހިދުމަތްތައް ދިނުމުގައި ސިޔާސީ ފިކުރެއް ޕްރޮމޯޓުނުވާނެހެން ކައުންސިލްތައް އަމަލުކުރުމަކީ މި ނިޒާމަށް ރައްޔިތުން ކޮށްފައިވާ އިތުބާރު ގެއްލޭނެ އަމަލެއްކަމުގައި މި އޮތޯރިޓީން ދެކެމެވެ."
އެ ސިޓީގައި ވަނީ އެފަދަ ކަންކަމަކީ، ކައުންސިލްގެ ކައުންސިލަރުންގެ ސުލޫކީ މިންގަނޑާ ހިލާފު އަމަލަކަށް ވާތީ ސިޔާސީ އެއްވެސް ހަރަކާތެއް ނުހިންގަން ކައުންސިލްތަކަށް އިލްތިމާސްކޮށްފަ އެވެ.
މިދިޔަ ބުރާސްފަތި ދުވަހުގެ ރެއިން ފެށިގެން މިރެއާ ހަމައަށް ބޭއްވި އެމްޑީޕީގެ ފަސް ވަނަ ކޮންގްރެހަށް ސަރުކާރުގެ އިމާރާތްތަކެއް ހަމަޖައްސައިދިނުމަށް އެ ޕާޓީން އެދުނެވެ. ކައުންސިލްގެ އިމާރާތުގައި ކޮންގްރެސް ބޭއްވީ އެހެން ތަނެއް ނުލިބުމުން ކަމަށް އެމްޑީޕީން ބުންޏެވެ.