ވެލާނާ އިންޓަނޭޝަނަލް އެއާޕޯޓުން ގއ. ކޫއްޑުއަށް ފުރަންދިޔައިރު ދެ ފައިގެ ފަލަމަސްގަނޑުގައި ޑަކްޓް ޓޭޕް އަޅައި އޭގެ ތެރޭގައި ޑްރަގް ގެންދަން އުޅުނު މައްސަލައެއްގައި ހައްޔަރުކުރި މީހަކު 50 އަހަރަށް ޖަލަށް ލާން ހުކުމްކޮށްފި އެވެ.
މި މައްސަލާގައި ށ. ނޫމަރާ، ހަވީރީގެ، އަބްދުﷲ ފަސީހުގެ މައްޗަށް ދައުލަތުން އުފުލި ދެ ދައުވާ ވެސް ވަނީ ސާބިތުވެފަ އެވެ. އޭނާ 50 އަހަރަށް ޖަލަށްލުމާ އެކު 200,000 ރުފިޔާއިން ޖޫރިމަނާކުރަން ކްރިމިނަލް ކޯޓުން ވަނީ ހުކުމްކޮށްފަ އެވެ.
ފަސީހު ހައްޔަރުކުރީ އޮކްޓޫބަރު 7، 2024 ގައި ވެލާނާ އިންޓަނޭޝަނަލް އެއާޕޯޓުން ގއ. ކޫއްޑޫއަށް ފުރަން ގޮސް ހުއްޓަ އެވެ. ފަސީހުގެ ހަށިގަނޑު ބަލައިފާސްކުރިއިރު، އޭނާގެ ދެ ފައިގެ ފަލަމަސްގަނޑުގައި ޑަކްޓޭޕް އަޅައިގެން ފޮރުވާފައި ހުރި ގިނަ އަދަދެއްގެ މަސްތުވާތަކެތި ވަނީ ފެނިފައިވެ އެވެ.
ކްރިމިނަލް ކޯޓުގައި ގާޒީ އަލީ ނަދީމް ކުރެއްވި ހުކުމުގައިވާ ގޮތުން ފަސީހުގެ މައްޗަށް ސާބިތުވެފައިވަނީ:
- ޑައިމޯފިން ޓްރެފިކްކުރުމުގެ ދައުވާ: ފަލަމަސްގަނޑުގައި ތަތްކޮށްފައި ހުރި ޓޭޕްގެ ދަށުން 23.5 ގްރާމްގެ ޑައިމޯފިން ފެނުނު މައްސަލައިގައި އޭނާ އުމުރަށް ޖަލަށްލުމާ އެކު 100,000ރ. އިން ޖޫރިމަނާކޮށްފައިވެ އެވެ. މި މައްސަލައިގައި ބަންދުގައި ހޭދަކުރި ހަތް މަހާއި 27 ދުވަސް އުނިކުރުމުން، ތަންފީޒުކުރަންޖެހޭނީ 24 އަހަރާއި ހަތަރު މަހާއި ތިން ދުވަހުގެ ޖަލު ބަންދެކެވެ.
- ކެނެބިސް ޓްރެފިކްކުރުމުގެ ދައުވާ: ތަތްކޮށްފައި ހުރި ޓޭޕްގެ ތެރެއިން ފެނުނު 10 ފިލްމު ދަޅުން 252 ގްރާމްގެ ކެނެބިސް ފެނުނު މައްސަލައިގައި ވެސް އޭނާ އުމުރަށް ޖަލަށްލުމާ އެކު 100,000ރ. އިން ވަނީ ޖޫރިމަނާކޮށްފަ އެވެ.
މި ދެ މައްސަލައިގެ ޖުމްލަ 200,000ރ. އިން ޖޫރިމަނާކޮށް އެ ފައިސާ، ހުކުމްކުރި ދުވަހުން ފެށިގެން 12 މަސްދުވަހުގެ ތެރޭގައި މީރާ އަށް ދެއްކުމަށް ކޯޓުން ވަނީ އަންގައިފަ އެވެ.
ޝަރީއަތުގެ މަރުހަލާގައި ދިފާއުން ބުނެފައިވަނީ އެކަމަކީ ފަސީހަށް މަޖުބޫރުކުރުވައިގެން މީހަކު ކުރުވި ކަމެއް ކަމަށާއި އޭނާއަކީ ހިއުމަން ޓްރެފިކިންގެ ވިކްޓިމެއް ކަމަށެވެ.
ނަމަވެސް އެކަން ސާބިތުކޮށްދޭނެ އެއްވެސް ހެއްކެއް ހުށަހެޅިފައި ނުވާތީ އާއި، ތަހުގީގުގައި ވެސް އޭނާ ހަނުހުރެފައިވާތީ އެ ދިފާއަށް ބުރަދަނެއް ދެވެން ނެތް ކަމަށް ކޯޓުން ނިންމީ އެވެ.