މާލޭގެ ގެއަކުން ފެން މީޓަރެއް ވަގަށް ނެގި މައްސަލައެއްގައި އއ. ތޮއްޑޫ މީހެއްގެ މައްޗަށް އުފުލި ވައްކަމުގެ ދައުވާ ސާބިތުވެ، އޭނާ 21,600ރ. އިން ޖޫރިމަނާކުރުމަށް ކްރިމިނަލް ކޯޓުން ހުކުމްކޮށްފި އެވެ.
ޕްރޮސިކިއުޓާ ޖެނެރަލް (ޕީޖީ) އޮފީހުން ކޯޓަށް ހުށަހެޅި މައްސަލައިގައިވާ ގޮތުން، އޭނާ ފެން މީޓަރު ވަގަށް ނަގާފައިވަނީ މި އަހަރުގެ އެޕްރީލް 16 ވަނަ ދުވަހުގެ ހަވީރު 4:00 ހާއިރު، އޯކިޑްމަގުގައި ހުންނަ މ. މާކޮޅުގެއިންނެވެ.
މި މައްސަލައިގެ އިބްތިދާއީ އަޑުއެހުމުގައި އޭނާ ވަނީ ދައުވާއަށް އިއުތިރާފުވެފަ އެވެ. އެހެންވެ، އޭނާގެ އިއުތިރާފުގެ މައްޗަށް ބިނާކޮށް ކޯޓުން ވަނީ ކުށް ސާބިތުވާ ކަމަށް ކަނޑައަޅައިފަ އެވެ.
ގާނޫނުލްއުގޫބާތުގެ ދަށުން މި ކުށުގެ އަސާސީ އަދަބަކީ ޖަލަށްލުން ކަމަށްވާތީ، މައްސަލައިގެ ކަންކަމަށް ރިއާޔަތްކުރުމަށް ފަހު ކޯޓުން ފުރަތަމަ ކަނޑައެޅީ ތިން މަހާއި 18 ދުވަހުގެ ޖަލު އަދަބެކެވެ.
ނަމަވެސް، އޭނާއަކީ ވަޒީފާއެއްގައި އުޅޭ މީހަކަށްވާތީ އާއި، ޖަލު އަދަބުގެ ބަދަލުގައި ޖޫރިމަނާގެ އަދަބެއް ދިނުމަށް އެދިފައިވާތީ، ގާނޫނުލްއުގޫބާތާއި ސުޕްރީމް ކޯޓުގެ އުސޫލުތަކުގެ ދަށުން އަދަބު ވަނީ ޖޫރިމަނާއަށް ބަދަލުކޮށްދީފަ އެވެ.
ކްރިމިނަލް ކޯޓުގެ އިސް ގާޒީ އާދަމް މުހައްމަދު ކުރެއްވި ހުކުމުގައި ވަނީ:
- ޖަލު އަދަބުގެ ބަދަލުގައި 21،600ރ. އިން ޖޫރިމަނާކުރުމަށް
- މި ފައިސާ މި މަހުގެ އެއް ވަނަ ދުވަހުން ފެށިގެން 12 މަސް ދުވަހުގެ ތެރޭގައި މީރާއަށް ދެއްކުމަށް
- ކަނޑައެޅިފައިވާ މުއްދަތުގައި ފައިސާ ނުދައްކައިފިނަމަ، އަލުން ޖަލު އަދަބު ތަންފީޒު ކުރަން ޖެހޭނެ