ވެހިކަލްތަކުގެ އަހަރީ ފީ މާލޭ ސިޓީ ކައުންސިލަށް ނުލިބޭ ގޮތަށް ހަދަން ޖެހުނީ އެކަށީގެންވާ ގޮތެއްގައި މާލޭގެ މަގުތައް ހެދުމަށާއި މަރާމާތައް އަދި ޓްރެފިކްގެ މައްސަލަ ހައްލުކުރުމަށް އެ ކައުންސިލުން އެ ފައިސާ ބޭނުން ނުކުރާތީ ކަމަށް އެޓާނީ ޖެނެރަލް އަހްމަދު އުޝާމް މިރޭ ވިދާޅުވެއްޖެ އެވެ.
ރައީސް އޮފީހާއި ދައުލަތުގެ މީޑިއާ ޕީއެސްއެމް ގުޅިގެން ސަރުކާރުގެ މިނިސްޓަރުންނާ އެކު ބާއްވާ "އަހާ" ފޯރަމް 8 ވަނަ އެޕިސޯޑުގައި އުޝާމްގެ އިތުރުން ޑިފެންސް މިނިސްޓަރު ހައްސާން ރަޝީދު އާއި އިކޮނޮމިކް މިނިސްޓަރު މިރޭ ބައިވެރިވެވަޑައިގެންނެވި އެވެ.
އެ ފޯރަމަށް އާންމުންގެ މީހަކު ފޮނުވި ސުވާލެއްގައި ބުނީ އެއްގަމު ދަތުރުފަތުރުގެ އާ ގާނޫނާ އެކު ވެހިކަލް ފީގެ ގޮތުގައި މާލޭ ސިޓީ ކައުންސިލަށް ލިބެމުންދިޔަ އާމްދަނީ ކަނޑާލުމަކީ މާލޭގެ ލާމަރުކަޒީ ހިންގުމަށް އެޅުނު ވަރަށް ބޮޑު ހުރަހެއް ކަމަށް މާލޭގެ މޭޔަރު އާދަމް އާޒިމް ވިދާޅުވާ ކަމަށެވެ. ލާމަރުކަޒީ ނިޒާމު ހަރުދަނާކުރުމަށް ކަމަށް ބުނެ އައި މި ސަރުކާރުން އިސްވެ އޮވެ މިފަދަ ކަމެއް ކުރެއްވީ ކީއްވެތޯ އޭނާ ސުވާލުގައި އެހި އެވެ.
އެ ސުވާލަށް ދެއްވި ޖަވާބުގައި އުޝާމް ވިދާޅުވީ މާލޭގައި ދިރިއުޅޭ މީހުންގެ އެންމެ ބޮޑު ކަންބޮޑުވުމަކީ މާލޭގެ މަގުތައް މިހާރު އޮތް ހާލަތު ކަމަށެވެ. މާލޭގެ ޓްރެފިކްގެ މައްސަލައަށް ހައްލެއް ހޯދުމަށް އެކަށީގެންވާ މަސައްކަތްތަކެއް އަދި ކުރެވިފައި އޮތް ކަމަށް އާންމުން ގަބޫލު ނުކުރާ ކަމަށާއި މި ސަރުކާރުން އާ ގާނޫނެއް ހެދީ ވެސް އެ މައްސަލައަށް ހައްލު ހޯދުމަށް ކަމަށް އޭނާ ވިދާޅުވި އެވެ.
އާ ގާނޫނުގެ ދަށުން ކުރާ އެންމެ މުހިންމު އެއް ކަމަކީ ޓްރާސްޕޯޓް މިނިސްޓަރާއި ހޯމްލޭންޑް މިނިސްޓަރާއި ހައުސިން މިނިސްޓަރާއި އޭޖީ އަދި ޕޮލިސް ކޮމިޝަނަރު އެކުލެވޭ ގޮތަށް ރޯޑް ސޭފްޓީ ކައުންސިލެއް އުފެއްދުން ކަމަށް އުޝާމް ވިދާޅުވި އެވެ.
އުޝާމް ވިދާޅުވީ އެ ގާނޫނުގައި މާލެއަށް ހާއްސަ ބާބެއް އެކުލަވާލީ ރާއްޖޭގައި ޓްރެފިކްގެ މައްސަލަ މިވަގުތު އެންމެ ބޮޑީ މާލޭގައި ކަމަށް ވާތީ ކަމަށެވެ.
މާލެ އާއި ރަށްރަށުގައި ވެސް ވެހިކަލްތަކުން ލިބޭ އަހަރީ ފީ ބޭނުންކުރަން ޖެހޭނީ މަގުތަކުގައި ހުރި އެކި މައްސަލަތައް ހައްލުކުރުމަށް ކަމަށް އޭނާ ވިދާޅުވި އެވެ.
"މިކަމުން ލިބޭ ފައިސާ އަޅުގަނޑުމެން ހަރަދުކުރާނީ އެއްގަމު ދަތުރުފަތުރުގެ މައްސަލަތަކަށް ހައްލެއް ހޯދުމަށް. މިސާލަކަށް ފުލުހުންނަށް އެކަމަށް ބޭނުންވާ ވަސީލަތްތައް ހޯދުމަށް މާލޭގެ މަގުތަކުގެ އެކިއެކި މައްސަލަތައް ދިމާވެއްޖެއްޔާ އެކަމަށް ހަރަދުކުރަންް،" އުޝާމް ވިދާޅުވި އެވެ.
އުޝާމް ވިދާޅުވީ މާލޭގައި ވެހިކަލްތަކުން ލިބޭ އަހަރީ ފީ ޖަމާކުރާނީ ވަކި ފަންޑަކަށް ކަމަށާއި އެ ފައިސާ ހަމައެކަނި ބޭނުންކުރާނީ ވެސް މާލޭގެ މަގުތަކުގައި ހުރި މައްސަލަތައް ހައްލުކުރުމަށް ކަމަށެވެ.
"އެ ފައިސާ މާލޭ ސިޓީ ކައުންސިލުން މިއޮތް ހުރިހާ ދުވަހަކު ބޭނުންކުރަމުން ދިޔައީ އެކަމަކަށް ނޫން. އަޅުގަނޑުމެންނަށް މަގުމަތި ބަލާލީމަ ވަރަށް ސާފުކޮށް ފެންނަން އޮތް ކަމެއް، ރަޖިސްޓްރޭޝަން ފީން އެ ލިބުނު ފައިސާއިން ހަގީގަތުގައި މަގުތައް މަރާމާތުކޮށް ބެލެހެއްޓުމެއް ނޫންކަން އޭގެ ބޮޑު ބައެއް ބޭނުންކުރަމުން އައިސްފައި އޮތީ،" އުޝާމް ވިދާޅުވި އެވެ.
ވެހިކަލްތަކުގެ އަހަރީ ފީ މާލޭ ސިޓީ ކައުންސިލަށް ނުލިބޭ ގޮތަށް ހެދުމުން މާލޭގައި ދިރިއުޅޭ މީހުންނަށް ލިބެމުންދިޔަ ހިދުމަތްތަކަށް ވަރަށް ބޮޑު ހުރަސްތަކެއް އެޅި، އިޔާދަނުކުރެވޭ ބޮޑު ގެއްލުމެއް ލިބޭނެ ކަމަށް މާލޭގެ އާޒިމް ވިދާޅުވެފައިވެ އެވެ.
މިދިޔަ މަހު އާޒިމް އެކްސްގައި ކުރެއްވި ޕޯސްޓެއްގައި ވިދާޅުވީ ވެހިކަލް ފީގެ ގޮތުގައި ލިބެމުން އައި ފައިސާ ބޭނުންކުރީ މާލޭގެ މަގުތައް މަރާމާތުކުރުމާއި މިސްކިތްތައް ބެލެހެއްޓުމާއި ފެންބޮޑުވާ ހާލަތްތަކުގައި ފެން ހިންދުމާއި ޑިޒާސްޓާ ފަދަ ކުއްލި ނުރައްކަލުގެ ހާލަތްތަކުގައި އާންމުންނަށް އެހީތެރިކަން ފޯރުކޮށްދިނުމުގެ އިތުރުން މަގުމަތި ކުނިކަހައި ސާފުކޮށް ބެލެހެއްޓުން ކަހަލަ އިޖުތިމާއީ މުހިންމު ހިދުމަތްތަކަށް ކަމަށެވެ.
އެއްގަމު ދަތުރުފަތުރާ ބެހޭ އާ ގާނޫނުގައިވާ ގޮތުން، މާލޭގައި ދުއްވާ ވެހިކަލްގެ އަހަރީ ފީ ދެން ލިބޭނީ މާލެ ސަރަހައްދުގެ އެއްގަމު ދަތުރުފަތުރާ ގުޅޭ ހުރިހާ ކަމެއް ބަލަހައްޓަން ޓްރާންސްޕޯޓް މިނިސްޓްރީގެ ދަށުން އުފައްދާފައިވާ ގްރޭޓާ މާލެ ޓްރާންސްޕޯޓް އެންޑް މޯބިލިޓީ އޮފީހަށެވެ.