އަނިޔާވެރި ގޮތަކަށް މަރާލި ޔާމީން ރަޝީދުގެ މަރުގެ މައްސަލާގެ ތަހުގީގު ކާމިޔާބު ކުރެވޭނެ ކަމުގެ އުއްމީދު ބޮޑު ކަމަށް ފުލުހުން މިއަދު ބުނެފި އެވެ.
ޔާމީން ދިރިއުޅުނު ގޭގެ ސިޑި ގޮޅި ތެރޭގައި ތޫނު އެއްޗެހިން އޭނާ އަށް ބޮޑެތި ހަމަލާދީ މަރާލި މައްސަލާގައި އިތުރު ހަތަރު މީހަކު ހައްޔަރު ކުރުމާ ގުޅިގެން ފުލުހުން މިއަދު ނެރުނު ބަޔާނެއްގައި ވަނީ ތަހުގީގު ހަލުވިކަމާ އެކު ބާރަށް ކުރިއަށްދާ ކަމަށެވެ. މިހާރު ލިބެމުންދާ ކުރިއެރުންތަކާ އެކު ތަހުގީގު ކާމިޔާބު ވާނެ ކަމުގެ އުއްމީދު ބޮޑު ކަމަށް އެ ބަޔާނުގައިވެ އެވެ.
"މި ރަހުމް ކުޑަ އަމަލު ހިންގުމުގައި ބައިވެރިވި އެންމެހައި ފަރާތްތައް އިންސާފުގެ ކުރިމައްޗަށް ގެންދެވޭނެ ކަމުގެ ފުރިހަމަ ޔަގީންކަން ދިވެހި އެންމެހައި ރައްޔިތުންނަށް އަރުވަމެވެ،" އެ ބަޔާނުގައިވެ އެވެ.
ޔާމީންގެ މަރާ ގުޅިގެން ކުރިން ވެސް ވަނީ ދެ މީހަކު ހައްޔަރުކޮށްފަ އެވެ. އެހެންވެ މިހާރު އެ މައްސަލާގެ ތުހުމަތުގައި ބަންދުގައި ތިބި މީހުންގެ އަދަދު ހަޔަކަށް ވަނީ އަރައިފަ އެވެ. އެ ތަހުގީގުގައި ބޭރު ގައުމުތަކުގެ އެހީތެރިކަން ހޯދަމުންދާ ކަމަށް ފުލުހުން ވަނީ ބުނެފަ އެވެ.
ޔާމީނަށް އިންސާފު ހޯދަން އޭނާގެ އާއިލާ އާއި ރަހުމަތްތެރިން އަންނަނީ ގިނަ ހަރަކާތްތަކެއް ހިންގަމުންނެވެ. އޭނާ މަރާލުން ބޭރުގެ ގައުމުތަކުން ވަނީ ކުށްވެރިކޮށްފަ އެވެ. އެ މައްސަލާގެ ފުރިހަމަ ތަހުގީގެއް ހިންގަން އެ ގައުމުތަކުން ވަނީ ގޮވާލައިފަ އެވެ.