ކ. ތުލުސްދޫން ފުރައިގެން ލ. ގަމަށް ދަތުރުކުރަނިކޮށް ބެހުނު ކޮޅުވެއްޓި، އޭގައި ތިބި ހަ މީހުންނާ އެކު، މިހާރު މާލެ އަންނަން މިސްރާބު ޖަހައިފި ކަމަށާއި އެ ދަތުރުކުރަނީ އިންޑިއާ މަނަވަރު ކައިރީގައި އޮވެގެން ކަމަށް، އެމްއެންޑީއެފުން މިއަދު ބުނެފި އެވެ.
ސްރީ ލަންކާ ކުންފުންޏެއް ކަމަށްވާ ސެނޯކްގެ "މާރިޔާ-3" ބެހުނީ އޭގެ ރޭމްޕް ހަލާކުވެގެން އެ މައްޗަށް ނެގޭނެ ގޮތެއް ނެތި ދިމާވި މައްސަލަތަކުގަ އެވެ. އިންޑިއާގެ އަސްކަރީ މަތިންދާބޯޓަކަށް ކޮޅުވެއްޓި ފެނުނު އިރު އޭތި އޮތީ ލ. އިސްދޫ އިރުއުތުރުން 120 މޭލު ދުރުގަ އެވެ.
ރޭޕް ހަލާކުވުން ފިޔަވައި ކޮޅުވެއްޓިއަށް އިތުރު ގެއްލުމެއް ނުލިބެ އެވެ. އޭގެ އިންޖީނު ވެސް ރަނގަޅެވެ.
އެމްއެންޑީއެފްގެ އިންފޮމޭޝަން އޮފިސަރު ކެޕްޓަން އިބްރާހިމް އާޒިމް ވިދާޅުވީ ކޮޅުވެއްޓި އަށް ދަތުރުކުރެވެނީ ވަރަށް މަޑުން ކަމަށް ވާތީ މާލެ އަށް އާދެވޭނެ އިރެއް އަދި ނޭނގޭ ކަމަށެވެ.
ކޮޅުވެއްޓީގައި ތިބި ދިވެހި ދެމަފިރިންނަކީ ކައްޕި އާދަމް ނައީމާއި އޭނާގެ އަންހެނުން ޒުލޭހާ އުސްމާނެވެ. ދެން ތިބީ އޭގައި މަސައްކަތްކުރާ ބިދޭސީ ހަތަރު މީހެކެވެ.
"ކޮޅުވެއްޓި އޮތް ހިސާބަށް އަދި ފޯނު ރޭންޖެއް ވެސް ނުލިބޭ. މޫސުމް ވަރަށް ގޯސް. އެހެންވެ، އެ އުޅަނދުތަކަށް މާލެ އާދެވޭނެ އިރެއް ނޭނގެ،" އާޒިމް ވިދާޅުވި އެވެ.
ކޮޅުވެއްޓި އަށް އެހީތެރިކަން ފޯރުކޮށްދީ، އެ އުޅަނދާ އެކު ދަތުރުކުރަމުން އަންނަނީ އިންޑިއާގެ މަނަވަރު "ކިރްޗް" އެވެ.
"މާރިޔާ-3" ގެއްލުނީ ތުލުސްދޫ ބަނދަރު ހަދަން ބޭނުންވާ ސާމާނުތަކެއް ހުސްކުރުމަށް ފަހު މިދިއަ އަންގާރަދުވަހުގެ ހަވީރު ލ. ގަމަށް ދަތުރުކުރަނިކޮށެވެ. އެކަމަކު އެ ދަތުރުގައި ކައްޕީގެ އަންހެނުން ޒުލޭހާ، ތ. ވިލިފުއްޓަށް ބާލަން ފުރަތަމަ މިސްރާބު ޖެހީ ތ. އަތޮޅަށް ކަމަށްވެ އެވެ.
ކޮޅުވެއްޓީގެ ހަބަރެއް ނުވެގެން އެމްއެންޑީއެފަށް ސެނޯކުން އެންގީ ގެއްލުނުތާ ދެ ދުވަސް ކައިރިވާން އުޅެނިކޮށް މިދިއަ ބުރާސްފަތިދުވަހު ހަވީރު އެވެ.
ކޮޅުވެއްޓި ހޯދަން އެމްއެންޑީއެފް އާއި އިންޑިއާ އަދި ސްރީ ލަންކާ ސިފައިން ވަރަށް ފުޅާ ދާއިރާއެއްގައި މަސައްކަތްކުރި އެވެ.