މާލެ އިން ފުރައިގެން އދ. ރަންވެލި ރިސޯޓަށް ދަތުރުކުރަނިކޮށް މާލެ އަތޮޅު ފިހާޅޮހި ރިސޯޓް ކައިރި އަށް މިއަދު ހެނދުނު އަޑި އަށް ދިޔަ ދޯނީގައި ތިބި މީހުން ކަނޑުމަތިން އޮޔާ ދަނިކޮށް ސަލާމަތް ކޮށްފި އެވެ.
އެމްއެންޑީއެފުން ބުނީ "ރޯދި" ދޯނީގައި ތިބި ފަސް މީހުން ވެސް ލޯންޗަކަށް ނަގާފައިވާ ކަމަށާއި އެ ހުރިހާ އެންމެންގެ ހާލު ވެސް ރަނގަޅު ކަމަށެވެ.
އެމްއެންޑީއެފުން ކުރިން ބުނި ގޮތުގައި އަޑި އަށް ދިޔަ ދޯނީގައި ތިބީ ތިން މީހުން ކަމަށެވެ. ނަމަވެސް ފަހުން ލިބުނު މައުލޫމާތުތަކުން އެ ދޯނީގައި ފަސް މީހުން ތިބި ކަމަށް އެމްއެންޑީއެފުން ބުންޏެވެ.
"މިހާތަނަށް ލިބުނު މައުލޫމާތުތަކުން ފަސް މީހުން ތިބި ކަމަށް އެނގިފައިވަނީ. އަދި ވެސް ބަލަމުން މިދަނީ،" އެމްއެންޑީއެފްގެ މީޑިއާ އޮފިޝަލް ވިދާޅުވި އެވެ.
އެ މީހުން ސަލާމަތްކުރީ ދަނގެތިން ދިޔަ ލޯންޗަކުންނެވެ. އެ މީހުން ކަނޑުމަތިން ފެނުނު އިރު ތިބީ ލައިފްޖެކެޓް އަޅައިގެންނެވެ.
އަޑި އަށް ދިޔައީ އދ. ދަނގެތީ މީހަކު ދުއްވާ "ރޯދި" ނަމަކަށް ކިޔާ ދޯންޏެކެވެ. މި ދޯނި ދުއްވަނީ ރަންވެލި ރިސޯޓުގެ ސަޕްލައި ދޯންޏެއްގެ ގޮތުގަ އެވެ.