އެމްޑީޕީން މިރޭ ބޭއްވި ޖަލްސާގައި ޝިފާޒް ވާހަކަ ދައްކަވަނީ.
10 ޖޫން 2017 - 00:13
ރައީސް އަބްދުﷲ ޔާމިނާއި އެ މަނިކުފާނަށް ވާގިވެރިވާ މީހުން ދިވެހި ރައްޔިތުންނަށް ބޭއިންސާފުން އަނިޔާ ކުރަމުންދާ ނަމަ، އެ މަނިކުފާނާ ހަމައަށް ވެސް ކޮންމެވެސް ދުވަހަކުން ގާނޫނީ ދިގު އަތް ފޯރާނެ ކަމަށް އެމްޑީޕީގެ ނައިބު ރައީސް މުހައްމަދު ޝިފާޒް މިރޭ ވިދާޅުވެއްޖެ އެވެ.
ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހުމަދު މަހްލޫފް ޖަލުން މިނިވަންވުމާ ގުޅިގެން އޭނާގެ ޝަރަފުގައި އެމްޑީޕީގެ ހަރުގޭގައި ބޭއްވި ޖަލްސާގައި ޝިފާޒް ވިދާޅުވީ އިންސާފު ހޯދަން ނުކުތް ދަތުރުގައި މިހާތަނަށް އެތައް ބަޔަކަށް ނުހައްގުން، މި ސަރުކާރުން އަނިޔާ ދީފައިވާ ކަމަށެވެ.
"އެތައް ބަޔަކު އަދިވެސް މާފުށީ ޖަލުގަގައި އެބަތިބި. އަދި ދޫނިދޫ ޖަލުގައި ވެސް އެބަތިބި،" އޭނާ ވިދާޅުވި އެވެ.
ޝިފާޒް ވިދާޅުވި ގޮތުގައި އެމްޑީޕީ އާއި އަދި އެ ޕާޓީއާ ގުޅިގެން މަސައްކަތް ކުރާ އެއްވެސް ސިޔާސީ ޕާޓީއަކުން ބޭއިންސާފުން އަނިޔާ ލިބޭ އެއްވެސް ރައްޔިތަކު އެކަހެރިއެއް ނުކުރާނެ އެވެ.
"މިއަދު ވެސް މާދަމާ ވެސް އަދި އަނެއް ދުވަހު ވެސް އިންސާފު ގާއިމު ކުރުމަށްޓަކައި ކުރަން ޖެހޭ ކޮންމެ މަސައްކަތެއް އަޅުގަނޑުމެން ސާބިތުވެ ކުރާނެ ކަމުގެ ފުރިހަމަ ޔަގީންކަން އަރުވަން،" ވަރަށް ގިނަ އަދަދެއްގެ ބަޔަކު ދިޔަ ޖަލްސާގައި އޭނާ ވިދާޅުވި އެވެ.
ޝިފާޒް ވިދާޅުވީ އަނިޔާވެރި ވެރިންގެ ކުރިމަތީގައި ހިތްވަރު ކުރުމަކީ އުނދަގޫ ކަމެއް ކަމަށެވެ. އެހެން ނަމަވެސް އެފަދަ ވެރިންގެ ކުރިމަތީގައި ކާމިޔާބީީއެއް ލިބޭނެ ގޮތަކީ ނުގުޑާ ފަދަ އަޒުމެއް ކަމަށް ވިދާޅުވި އެވެ.
ޝިފާޒް ވިދާޅުވީ ޖަލުގައި 10 މަހާއި 24 ދުވަސް ހޭދަ ކުރައްވައި މަހްލޫފް ސާބިތުކޮށް ދެއްވީ އެ ހިތްވަރާއި އަޒުމް ކަމަށެވެ.
"ރައީސް ޔާމީންގެ އެެފަދަ ހިތްވަރެއް ނެތް. އަޅުގަނޑުމެން ގުޅިފައިވާ ސިޔާސީ ޕާޓީތަކުގެ ލީޑަރުން ކުރައްވާ މި މަސައްކަތް ބަލިކަށި ކޮށްލެވޭނެ އެއްވެސް ހިތްވަރެއް ރައީސް ޔާމީން ގެއެއް ނެތް،" ޝިފާޒް ވިދާޅުވި އެވެ.
އޭނާ ވިދާޅުވީ ރައީސް ޔާމީން މިހާރު ކުރައްވާހާ ވެސް ކަމަކީ ސިޔާސީ މީހުން ހައްޔަރުކޮށް ނުހައްގުން އަނިޔާ ދެއްވުން ކަމަށެވެ.
"ހައްޔަރު ކުރަންވީމާ މި ފެންނަނީ އިންޓެލިޖެންސް ރިޕޯޓެއް. އެ ފެންނަ ރައްޔިތަކު ނޫޅޭ. އޭގައި އޮންނަ އެއްޗެއް އެނގޭ ރައްޔިތަކު ވެސް ނެތް. ހައްޔަރުކޮށްފައި ބަހައްޓަންވީމަ ހެކި ފޯރުވާނެތީ، ނުފޫޒް ފޯރުވަފާނެތީ ހައްޔަރުކޮށްފައި ބަހައްޓަނީ،" ޝިފާޒް ވިދާޅުވި އެވެ.
"މިއަށް ވުރެ ތަހުޒީބު ވާން ވެއްޖެ. މި ރާއްޖޭގެ ރައްޔިތުންނަކީ ތަންދޮރު އޮޅުން ފިލާ ބައެއް."
ޝިފާޒް ވިދާޅުވީ ރާއްޖޭގައި ގާނޫނުތަކާއި އުސޫލްތައް ހެދިފައި އެބަހުރި ކަމަށާއި ޑިމޮކްރެޓިކް ނިޒާމް ދަމަހައްޓަން ކުރާ މަސައްކަތަށް، ކުރާ އަނިޔާއަކާ ބިރަކުން ނުހުއްޓުވޭނެ ކަމަށެވެ.
"އަޅުގަނޑުމެން އެންމެން މި ތިބީ ކެރިގެން ނުކުމެ. ހުރިހާ ބޭފުޅުން ވެސް ގެންދެވިދާނެ. އެކަމަކު ހަގީގަތަކީ ދެނެއް މި ރާއްޖޭގެ ރައްޔިތުންނެއް އަނިޔާވެރި ކަމަކަށް އާއެކޭ ނުބުނާނެ. އަދި ރައްޔިތުން ހުދުމުހުތާރު އުސޫލަކަށް އާއެކޭ ބުނެފަނާ ނުތިބޭނެ،" އޭނާ ވިދާޅުވި އެވެ.
އެމްޑީޕީން މިރޭ ބޭއްވި ޖަލްސާގައި މަހްލޫފު ވާހަކަ ދައްކަވަނީ.
ޝިފާޒް ވިދާޅުވި ގޮތުގައި ގާނޫނުއަސާސީން ވަނީ ރައްޔިތުންނަށް ވަރަށް ފުޅާކޮށް މިނިވަންކަން ލިބި ދީފަ އެވެ. އެހެންވެ ރައްޔިތުންގެ އަނގަ ބަންދު ނުކުރެވޭނެ ކަމަށް ވިދާޅުވި އެވެ.
"ރައީސް ޔާމީން ގަބޫލު ކުރައްވަން ޖެހޭ އެ މަނިކުފާނު އެކަންޏެއް ނޫންކަން މި ރާއްޖޭގެ ގާނޫނުތައް ދަންނަކީ. ކަމެއްވާ ކޮންމެ ފަހަރަކު ނުކުމެ ގާނޫނުގެ ދިގު އަތް ފޯރާނޭ [ވިދާޅުވާނެ]. ދިގު އަތް އަޅުގަނޑުމެންނަށް ވެސް އެނގޭ. އެ ފޯރަން ފެށީމާ ނޫޅުއްވާތި ތިމަން މަނިކުފާނަށް ރެކެވިދާނެ ކަމަށް،" ޝިފާޒް ވިދާޅުވި އެވެ.
"...މި ކުރާ މަސައްކަތުގެ އާޚިރު ނަތީޖާއަކަށް ވާނީ ރައީސް ޔާމީން ވެސް އަދި އެ މަނިކުފާނަށް ވާގިވެރިވާން ކައިރީގައި ތިއްބެވި މަދު ބޭފުޅުންނާ ހިސާބަށް ވެސް އިންސާފު އަރާ ހަމަ ކުރާނެ."
ޝިފާޒް ވިދާޅުވީ ބޭއިންސާފުގެ މައްޗަށް ވެސް އަބަދު ވެސް އިންސާފު ކާާމިޔާބު ހޯދާނެ ކަމަށެވެ.
"މި އަކުންނެއް އަޅުގަނޑުމެން އެކަކަށް ވެސް ރެކިއެއް ނުގަނެވޭނެ،" ޝިފާޒް ވިދާޅުވި އެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
ސަލީމް ބާއީ
11 June 2017
ޝިފާޒް ބާއިންމެންފަދަ ފަސްބައި ސާފް ތޯހިރު ބޭފުޅުން ޕޯޑިޔަމްތަކަށްއަރާ ވާހަކަދެއްކީމާ ދެން ވަރަށް އައިބު.
މާލެފުޅު
11 June 2017
މިކަހަލަ މީހުން އަރާ ޕާޓީ މަތިފަޑީގަ ތިބޭތީ ދެރައީ.. ގުދޯ ގުދޯ ނުގޮވޭވަރު މީހުން ހައްތާވެސް..
ގޫގުލާ
10 June 2017
ފިލްމުސްޓާރުންނާ ހަމަ އަށް ފޯރާނެބާ؟؟
ހީހީ ހަލާކު
10 June 2017
ތިބުނާ އަތުގެ ދިގުމިނަކީ ކިހާވަރެއްތަ؟
ވެބްކެމް
10 June 2017
ޔާމީނާ ހަމައަށް ފޯރާ އަތެއް ފާޑު ފާޑުގެ ފިލްމު ކުޅުނު މީހުނަށްވެސް ފޯރަންވާނެ. މީ ވަރަށް ވާހަކަ.
މާބެ
10 June 2017
ކަލޭމެންނާ ހަމައަށް ފޯރާފަ ބާކީ އޮތިއްޔާ .
ހުސޭނުބެ
10 June 2017
ގާނޫނުގެ ދިގު އަތް ހުރިހާ މީހުންނާ ދިމާލަށްވެސް ފޯރާނެ!! ވަކި ޔާމީނަކަށް ނޫން!! ކުށްކުރާ އެންމެންނާ ހިސާބަށްފޯރާނެ!! އެއީ ޝިފާޒްކަމަށްވިޔަސް މަހުލޫފަކަށްވިޔަސް ޔާމީނަކަށްވިޔަސް ނަޝީދަކަށްވިޔަސް އަދި އެހެން ރައްޔިތަކަށްވިޔަސްމެ!! އެއީ ނޭގޭ ކަމެއްނޫން!!
ރަނގަޅު
10 June 2017
100 ގެ ވާހަކައެއް ހުސާނުބޭ ތިބުނީ. ކޮންމެ ދުވަހަކު ކޯޓުތަކުން މީހުނަށް ހުކުމްކުރަމުން ދާކަމެއް އެސޮރުމެނަކަށް ނޭނގޭ. އެސޮރުމެން ހީކުރަނީ ހުކުމް ކުރަމުން ދަނީ ހަމައެކަނި ސިޔާސީ މީހުނަށް ކަމަށް. 2000 އަށް ވުރެ ގުނަ މީހުނަށް ހުކުމް ކޮށްފައިވާކަމެއް ނޭނގޭ.
ހަސަނުބެ
11 June 2017
ފޯރާނޭ ބުންޏަސް ފޯރާފައެއް ނެތޭ... ފޯރަނީ ނިކަމެތި ރައްޔިތުމީހާއާ ހަމަ އަށް...
ޒާ
10 June 2017
އެއީ މައްސަލައެއްނޫން. ކަލޭމެން ހީކުރީ ނަޝީދާ ހަމައަށް ޤާނޫނީ ދިގުއަތް ނުފޯރާނެކަމަށް. ކޮންމެ މީހަކުވެސް ކުށެއް ކޮށްފައިވާނަމަ ޤާނޫނީ ފިޔަވަޅު އެޅުމަކުން އެއްވެސް މައްސަލައެއްނެތް. އެކަމަކު މިހާތަނަށްވެސް ޔާމީނު ޤާނޫނާއި ޚިލާފަށް ކޮށްފައިވާ އެއްކަމެއްވެސް ދެއްކިފައި ނުވާތީ ހައިރާންވަނީ.
ފަޚުރުވެރިއާ
10 June 2017
އެއްވެސް މީހަކު ސަރުކާރު ވައްޓާލަން ރާވާތީ ނުވަތަ ސަރުކާރާ ދެކޮޅަށް ނުވަތަ ވެރިކަމާ ހަވާލުވެ ހުންނަށް މީހަކާ ދެކޮޅަށް އަޑު އުފުމުލުމަކީ ކުށްވެރި ވާކަމަކަށް ވާންޖެހޭ ކަމެއްނުން. ދިވެހިރާއްޖޭގެ މި ފިތުރަތާ ދެކޮޅަށް ތިރީސް އަހަރުގެ ގަދަބާރު ވައްޓާލެވުނީ މަދު ބަޔަކު ކުރި ހިއްވަރުން. އެކަން އިޢާދަ ނުވުމަށް ދިވެހި އާއްމު މީހުން މިހާރު އެބަޖެހޭ ވާގިވެރިވާން. އެއީ އެކުރެވުނެ ހިއްވަރުގެ ސަބަބުން މިއަދު ވެރިކަމުގެ ބާރު ވަނީ އާއްމުންގެ އަތްމަތީ. ރަށެއްގެ އަޅާ ފާލަމަކުން ރަށެއްގާ އަޅާ އިންޖިން ގެއަކުން، ކޮންނަ ފަޅަކުން ދިރި އުޅުމުގެ ފަސޭހަކަން ނުލިބޭނެ. ދިރިއުޅުމެގެ ފަސޭހަކަމަކީ ސިޔާސީ ފިކުރުތަކާ ނުގުޅި ތިމާގެ އަމިއްލަ ދިރިއުޅުން ބައްޓަން ކުރުމުގެ ވަސީލަތް ލިބެން ހުރުމާ ތިމާ ކުރާ މަސައްކަތަކުން ތިމާގެ ހުރިހާ ޒަރޫރަތެއް ފުރިހަކުރެވޭނެ ގޮތް މަގުފަހި ވެފާ އޮތުން. މިކަމަށް ވަކިމީހަކު ނުވަތަ ވަކި ފެންވަރަކުގެ މީހަކު ވެރިކަމަށް ހުންނަން ނުޖެހޭ. ވެރިއަކަށް ހުންނަ މީހާއަކީ ދިވެހި ރައްޔަތުން އަށް ކާންދީ ބެލެހެއްޓޭނެ މީހެއްނުން. ވެރިައަކަށް ހުންނަ މީހާ ނޭވާލަނީ ރައްޔަތުންގެ އެހީގާ. ހައްގަކާނުލާ ބަންދު ކުރެވޭ ކޮންމެ މީހަކީ އެތައް މީހުންނަށް އމީހާގެ ފުށުން ފާއިދާ ހުރި މީހަކަށް ވާނެ. ޢޭނާ ކޮށްއުޅުނު ކަމަކީ ވާނީ ނުސީދާ ކޮށް އެތައް ބަޔަކަށް އެއިގެ ފާއިދާ ކުރާނެ ކަމެއްކަން ޔަގީން. އަދި އޭނާ ބަނދު ކުރުމުން އެތައް ބަޔަކު އެކަމާ ހިތާމަ ކޮށް އެބަޔަކުވެސް ކުރާ މަސައްކަތް ހުއްޓާ އެމީހާގެ ދިފާއުގާ މަސައްކަތް ކުރަން ޖެހޭ. ސިޔާސީ ގޮތުން މީހުން ހައްޔަރު ކޮށް އެތައް ބަޔަކަށް އެއިގެ ސަބަބުން ގެއްލުން ލިބޭ ގޮތައް ވެރިކަން ކުރާމީހަކަށް ރައްޔަތުންނަށް ކޮށްދެވޭނެ ކަމެއް އޮންނާނެހެން ހީނުވޭ. މިހެން ވެރިކަން ކުރާ ސަރުކާރަކަށް އިގްތިސާދީ އަދި އިޖްތިމާއީ ކުރިއެރުން ހޯދާ ނުދެވޭނެ. އެހެންވީމާ އެކަހަލަ ސަރުކާރަކަށް ވާގިވެރި ވުމަކީ ރައްޔަތުންނަ ލިބިފައިވާ ބާރު ގެ ބޭނުން ނުހިފުން
ޕޮގުބާ
10 June 2017
ތިބޭފުޅުންގެ ވެރިކަމުގަ ބުރުމާ ގާސިމާއި އަބްދުއްލޯޔާމީނާއި އަބްދުއްލޯ ގާޒީ ހައްޔަރު ކުރީ ގާނޫނާ ޚިލާފަކަނޫންތަ؟ ދައްކާރަނޑު ވާހަކަ އެހުރިހާބޭފުޅުންވެސް ހައްޔަރުކުރީ ކޯޓް އަމުރެއް ނެތި އެއްވެސް ކުށެއް ނުކުރަނިސް ރޭގަނޑު ދަންވަރު އެއްވެސް މީޑިޔާއަކަށްވެސް ނޭންގި ތިބޭފުޅުންނަށް ތާއީދުކުރާ ބަޔަކު ގޮވައިގެންގޮޮސް ރަށްޔެތުންނަށް ވަގަށް ގިރިފުއްޓާ ދޫނިދޫ އާ މާފުށްޓާގަ ތެޅުވީ ނުވާނެ ހަނދާނެ ތިތިބީ ވެރިކަމާހެދި ދުނިޔެއިން މޮޔަވެފަ