މީގެ ތިން އަހަރެއްހާ ދުވަސް ކުރިން ގެއްލިފައިވާ ނޫސްވެރިޔާ އަހުމަދު ރިލްވާނަށް ވީގޮތެއް އަދިވެސް ނޭނގޭ ކަމަށް ފުލުހުން މިއަދު ކޯޓުގައި ބުނެފައިވާ ކަމަށް ރިލްވާންގެ އާއިލާއިން ބުނެފި އެވެ.
ރިލްވާން ގެއްލުނު މައްސަލައިގެ ތަހުގީގުގެ މައުލޫމާތު ދިނުމަށް ފުލުހުންގެ މައްޗަށް އަމުރުކޮށްދޭން އެދި އޭނާގެ އާއިލާއިން ސިވިލް ކޯޓަށް ހުށަހަޅާފައިވާ މައްސަލާގައި މިއަދު އެ ކޯޓުގައި ބޭއްވި އަޑުއެހުމާ ގުޅިގެން އާއިލާއިން ނެރުނު ބަޔާނުގައި ވަނީ ރިލްވާން ވަގަށް ނެގި ފަހުން އޭނާ އަށް ވީގޮތެއް ހޯދިފައި ނެތް ކަމަށް ފުލުހުންގެ ފަރާތުން މިއަދު ކޯޓުގައި ބުނި ކަމަށެވެ. އާއިލާއިން ބުނީ ތަހުގީގުކުރާތާ ތިން އަހަރުވެފައިވާ އެ މައްސަލާގައި ދިން މި ޖަވާބަކީ ގަބޫލުކުރަން ދަތި ޖަވާބެއް ކަމަށެވެ.
"ދައުލަތުގެ ކިބައިން މި އެދެނީ މި މައްސަލައާ ގުޅިގެން ފުލުހުން ހާމަކުރާ މައުލޫމާތު ސިއްރުކުރަން ޝަރުތުކޮށް ނަމަވެސް އެ ހާދިސާގެ ހަގީގަތް އާއިލާއާ ހިއްސާކޮށް، އެކަމުގެ ސަބަބުން އާއިލާއަށް ލިބިފައިވާ ހިތްދަތިތަކެއް ލުޔެއް ހޯދައި ދިނުމަށެވެ،" އެ ބަޔާނުގައިވެ އެވެ.
ރިލްވާން ގެއްލުމުން، އޭނާއަށް ވީގޮތެއް ހޯދަން އެންމެ ބޮޑަށް މަސައްކަތް ކުރި އަދި ދާދިފަހުން މަރާލި ޔާމީން ރަޝީދުގެ މަރާ ގުޅިގެން ޔާމީންގެ އާއިލާއިން ފުލުހުންނަށް ކުރާ ދައުވާގެ އަޑުއެހުން ވެސް މިއަދު ކޯޓުގައި ބޭއްވި އެވެ. އެ މައްސަލަ ކުރިއަށް ގެންދަން ބޭނުންވަނީ ހުރިހާ ލިޔުންތައް ސިއްރު ކޮށްގެން ކަމަށް ފުލުހުން ކޯޓުގައި ބުނެފައިވާ ކަމަށާއި އެކަމަކު ޔާމީންގެ އާއިލާއިން އެކަމަށް ދެކޮޅު ހަދާފައިވާ ކަމަށް އެ ބަޔާނުގައިވެ އެވެ.
ޔާމީން މަރާލުމުގައި އަމަލީ ގޮތުން ތިން މީހަކު ބައިވެރިވި ކަމަށް ފުލުހުން ތުހުމަތު ކޮށްފައި ވިޔަސް އެ މީހުންނަށް އަދި ދައުވާ އުފުލާފައި ނެތް ކަން އެ ބަޔާނުގައި ފާހަގަކޮށްފައިވެ އެވެ. އަދި ރިލްވާން ގެއްލުނު މައްސަލާގައި މިހާތަނަށް އެއްވެސް މީހަކު ބަންދެއް ނެތް ކަމަށް ވެސް ބުނެފައިވެ އެވެ.
"އަހުމަދު ރިލްވާން އަބްދުﷲ އާއި ޔާމީން ރަޝީދުގެ އާއިލާއަށް އިންސާފު ލިބޭނީ މައްސަލާގައި ކަން ހިނގާ ދިޔަގޮތުގެ ހަގީގަތާއި އެކަން ހިނގަން މެދުވެރިވި ސަަބަބުތައް ހާމަވެގެން،" އެ ބަޔާނުގައިވެ އެވެ.
ރިލްވާން ގެއްލުނު މައްސަލާގައި ފުރަތަމަ ބަޔަކު ހައްޔަރު ކުރިޔަސް ފަހުން އެ އެންމެން ވަނީ ދޫކޮށްލައިފަ އެވެ. އޭގެ ތެރެއިން ބައެއް މީހުން ރާއްޖެއިން ބޭރަށް ވަނީ ފުރައިފަ އެވެ.