މި ދިޔަ ބުރާސްފަތި ދުވަހުގެ ރޭ މާލޭގެ ކެފޭއެއްގެ ތެރޭގައި ހުއްޓައި ތޫނު އެއްޗަކުން ބޮލަށް ހަމަލާދީ ޒަޚަމް ކޮށްލި ޒުވާނާ އަށް އޭޑީކޭ ހޮސްޕިޓަލްގެ އައިސީޔޫގައި ފަރުވާ ދެނިކޮށް މިއަދު މަރުވެއްޖެ އެވެ.
ހެންވޭރު ޓާމިނަލް ކެފޭގައި ހުއްޓައި އެ ދުވަހުގެ ހަވީރު 6:30 ހާއިރު، ބަޔަކު ތޫނު އެއްޗަކުން ހަމަލާދީ ޒަޚަމް ކޮށްލީ، ހއ. ތަކަންދޫ އިބްރާހީމީ ހިޔާ، ނަދީމް އަބްދުއްރަހީމް 24، އެވެ. އޭނާގެ ބޮލަށް ވަޅިން ހަމަލަދިނުމާ ގުޅިގެން ލިބުނު ޒަޚަމްތަކަށް ފަރުވާ ދެމުން އައީ އޭޑީކޭ ހޮސްޕިޓަލްގެ އައިސީޔޫގައި އެޑްމިޓް ކޮށްގެންނެވެ. އައިސީޔޫގައި އޮތް އިރު ވެސް ނޭވާލަނީ މެޝިނުގެ އެހީގައި ކަމަށް ނަދީމްގެ ގާތް މީހަކު ބުނެފައިވެ އެވެ.
އެރޭގެ މާރާމާރީއާ ގުޅިގެން މިހާތަނަށް މީހަކު ހައްޔަރެއް ނުކުރެ އެވެ. މާލޭގައި މި ދުވަސްވަރު މާރާމާރީތައް އިތުުރުވެފައިވާއިރު، މިދިޔަ އަންގާރަ ދުވަހު ވެސް ދެ މާރާމާރީއެއް ހިނގާފައި ވެ އެވެ. އަދި މިދިޔަ ހަފުތާގައި ވެސް ދެ މާރާމާރީ ހިންގި އެވެ. އެލްސިއޯން ބޭކަރީ ކައިރީގައި މިދިޔަ ހަފުތާގައި ހިންގި މާރާމާރީއަކާ ގުޅިގެން ފުލުހުން ވަނީ ހަ މީހަކު ހައްޔަރުކޮށްފަ އެވެ.