ރައްޔިތުންގެ މަޖިލީހުގެ އިދާރާގެ ފާހާނާއެއްގައި މިއަދު ހިނގި އަލިފާނުގެ ހާދިސާއާ ގުޅިގެން މަޖިލީހުގެ މާދަމާގެ ޖަލްސާ ކެންސަލްކޮށްފި އެވެ.
މަޖިލީހުން މެންބަރުންނަށް ފޮނުވި މެސެޖެއްގައި ބުނީ އަލިފާނުގެ ހާދިސާއަށް ފަހު އާއްމު ހާލަތަކަށް ކަންކަން ގެނައުމަށާއި ކަމާ ގުޅޭ ގޮތުން އިތުރު ފިޔަވަޅުތައް އަޅަން ވަގުތު ބޭނުންވާތީ މާދަމާގެ ޖަލްސާ ނުބާއްވަން ނިންމާފައިވާ ކަމަށް ދަންނަވަން މަޖިލީހުގެ ރައީސް ވިދާޅުވި ކަމަށެވެ. އަދި ޖަލްސާއެއް ދެން އޮންނާނެ ދުވަހެއް ފަހުން އަންގާނެ ކަމަށް ވެސް ބުނެފައިވެ އެވެ.
މިއަދު އިރު އޮއްސުނު ވަގުތު އަލިފާން ރޯވީ ފާހާނާއެއްގެ ތެރޭގައި ހުރި ޓީޝޫ އަޅާ އެއްޗެއްގަ އެވެ. މިއީ ކަރަންޓުގެ މައްސަލަޔަކުން ހިނގި ހާދިސާއެއް ނޫން ކަމަށް ސްޓެލްކޯއިން ބުނާ ކަމަށް މަޖިލީހުގެ ނައިބު ރައީސް މޫސާ މަނިކު ޕީއެސްއެމް އަށް ދެއްވި އިންޓަވިއުއެއްގައި ވިދާޅުވި އެވެ.
"ސުވާލު އުފެދޭ ގޮތަކަށް ރޯވެފައި ހުރީ. ރޯވުމުގެ ސަބަބުން މަޖިލީހުގެ ތެރެއަށް ދުން އަރައި، ކަޅު ދުން އޮތީ. އަދިވެސް ސާފެއް ނުކުރޭ،" މޫސަ ވިދާޅުވި އެވެ.
ނަމަވެސް މިއީ ބަޔަކު ގަސްދުގައި ކުރި ކަމެއް ކަމަށް މޫސަ ވިދާޅެއް ނުވެ އެވެ. އޭނާ ވިދާޅުވީ އެކަމާ ގުޅޭ ގޮތުން އެއްޗެއް ވިދާޅުވެވޭނީ ފުލުހުންގެ ތަހުގީގަށް ފަހުގައި ކަމަށެވެ.
ގަލޮޅު ދެކުނު ދާއިރާގެ މެންބަރު އަހްމަދު މަހްލޫފު ކުރެއްވި ޓްވީޓެއްގައި ވިދާޅުވީ މިއީ ގަސްދުކޮށްފައިވާ ކަމެއް ކަމަށެވެ. އަދި މިއީ މަޖިލީހުގެ ޖަލްސާތައް ނުބާއްވަން ޖެހި މަޅިއެއްތޯ ސުވާލުކުރައްވާފައިވެ އެވެ.
މަޖިލީހުގެ ރައީސް އަބްދުﷲ މަސީހު މަގާމުން ވަކިކުރުމަށް، އިދިކޮޅު މެންބަރުން ހުށަހަޅުއްވާފައިވާ މައްސަލަ އެޖެންޑާ ނުކުރާތީ އާއި މަޖިލީހުގެ ބައެއް މެންބަރުން ހައްޔަރުކޮށް، ޖަލްސާތަކަށް ހާޒިރުކޮށް ނުދޭތީ މަޖިލީހުގައި މިއަދުވެސް ވަނީ އިހުތިޖާޖުކޮށްފަ އެވެ. މަސީހް ރިޔާސަތުގައި ދެތިން މިނެޓަކު އިންނެވުމަށް ފުރުސަތު ހޯއްދެވީ ގިނަ އަދަދެއްގެ ސިފައިން މަޖިލީހުގެ ޗެމްބަރަށް ވައްދައި އިދިކޮޅު މެންބަރުން ދުރަށް ލައިގެންނެވެ.