ހަވާލުވާނެ ފަރާތެއް ނެތި، މައްކާގައި ހާލުގައި ޖެހުނު ހަތަރު ދިވެހިންނާ މޯލްޑިވްސް ހައްޖު ކޯޕަރޭޝަނުން ހަވާލުވެއްޖެ އެވެ.
ދެމަފިރިއަކާއި އުމުރުން ދުވަސްވީ ދެ މީހަކު އިއްޔެ މައްކާ އަށް ދިޔައީ މީހުން ހައްޖަށް ގެންދަން ސަރުކާރުން ހުއްދަ ދިން އެއްވެސް ޖަމާއަތަކާ ގުޅުމެއް ނެތި އެވެ. އެ މީހުންނަށް ސައުދީ އަށް ދެވުނީ ރާއްޖޭގައި ހުންނަ ސައުދީ އެމްބަސީގެ ނަމުގައި އެ މީހުންނަށް ވިސާ ޖަހައިދީފައި އޮތުމުންނެވެ.
ހަވާލުވާނެ ބަޔަކު ނެތި ހާލުގައި ޖެހުނު އެ ހަތަރު މީހުންގެ ކަންކަމާ ސަރުކާރުން ހަވާލުވެ، އެ މީހުންގެ ހުރިހާ އިންތިޒާމެއް ހައްޖު ކޯޕަރޭޝަނުން ހަމަޖައްސާނެ ކަން ހައްޖު ކޯޕަރޭޝަންގެ އޮފިޝަލަކު ވަނީ ކަށަވަރުކޮށްދެއްވައިފަ އެވެ.
ދިވެހި ހައްޖު މިޝަނުން ބުނެފައިވާ ގޮތުގައި އެ ހަތަރު މީހުން ތިބޭނެ ތަނެއް ހަމަޖެހެންދެން ސިސިލްފަރު ގްރޫޕުން ވަގުތީ ގޮތުން ވަނީ އެ ޖަމާއަތުން މީހުން ބައިތިއްބާ ހޮޓަލެއްގައި އެ ހަތަރު މީހުން ތިބެވޭނެ އިންތިޒާމް ހަމަޖައްސައިދީފަ އެވެ. އެ ހަތަރު މީހުން އަތުން ފައިސާ ނެގި މީހާ އެ މީހުން ސައުދީ އަށް ފޮނުވީ ވެސް ތިބޭނެ ތަނެއް ހަމަޖެއްސުމެއް ނެތި ކަމަށް ހައްޖު މިޝަނުން ބުނެފައިވެ އެވެ.
"އެ ހަތަރު މީހުންގެ ތެރޭގައި ހިމެނޭ ދެމަފިރިން އެބަ ބުނޭ އެމީހުން ހައްޖަށް ފޮނުވުމަށް ފައިސާ ނެގީ އަރަބިއްޔާ ސްކޫލްގެ ޕްރިންސިޕަލް ނަސްރުﷲ ކަމަށް. އަދި ހައްޖަށް ދެވޭނެ ކަމަށް ނަސްރު ލިޔުމެއް ވެސް ދިން ކަމަށް. އެ ދެމީހުން ބުނާ ގޮތުގައި މީހެއްގެ އަތުން 70 ހާސް ރުފިޔާ ނެގި. ދެން ޖިއްދާ އަށް ގޮސްފައި ގުޅާށޭ ކިޔާފައި ދިން ކަމަށް ވަނީ، ސިސިލްފަރު ޖަމާއަތުގެ އޮފިޝަލެއް ކަމަށްވާ އިރުޝާދުގެ ނަންބަރު،" ހައްޖު މިޝަންގެ ރައީސް އަދި އިސްލާމިކް މިނިސްޓްރީގެ ޑެޕިއުޓީ މިނިސްޓަރު އިބްރާހީމް އަހްމަދު ވިދާޅުވި އެވެ. "މި ކޮޅަށް އައިސް ސިމެއް ނަގައިގެން އިރުޝާދަށް ގުޅީމާ ވިދާޅުވިޔޯ ޓެކްސީއެއް ނަގައިގެން މައްކާ އަށް އަންނާށޭ. އެކަމު އެމީހުން ތިބީ ހަވާލުވާނެ ފަރާތެއް ނެތީމާ އެއާޕޯޓުން ނުނިކުމެވިފައި. ދެން އަޅުގަނޑުމެން މިޝަންގެ ފަރާތުން އެއާޕޯޓަށް ގޮސް ވަރަށް މަސައްކަތުން އެމީހުން ނެރެވުނީ. އެއީ ވެސް އެމްބަސީގެ ނަމުގައި ވިސާ ޖަހާފައި އޮތީމަ."
އެހެން ނަމަވެސް، ނަސްރުﷲގެ ފޯނު ނުނަންގަވާތީ މިކަން ހިނގައިދިޔަ ގޮތް އަދި ވަނީ ސާފު ނުވެ އެވެ.
