ޕީޕީއެމުން ވަކިކުރުމާ ގުޅިގެން މަޖިލީހުގެ ގޮނޑި ގެއްލިއްޖެ ކަމަށް އިލެކްޝަންސް ކޮމިޝަނުން ނިންމާފައިވާ ހަތަރު މެމްބަރެއްގެ ގޮނޑިއާ މެދު އިތުރަށް ނިންމަން ޖެހޭ ނިންމުމެއް ނެތް ކަމަށް ސުޕްރީމް ކޯޓުން ކަނޑައަޅައިފި އެވެ.
އެ ހަތަރު މެމްބަރުންނަކީ ވިލިނގިލީ ދާއިރާގެ މެމްބަރު ސައުދު ހުސެއިން އާއި ދިއްދޫ ދާއިރާގެ އަބްދުއްލަތީފު މުހަންމަދާއި މަޑުއްވަރީ ދާއިރާގެ މެމްބަރު މުހަންމަދު އަމީތު އަދި ތުލުސްދޫ ދާއިރާގެ މެމްބަރު މުހަންމަދު ވަހީދު އިބްރާހީމެވެ. މި ހަތަރު ބޭފުޅުންނަކީ ވެސް ގޮނޑި ގެއްލުނުކަމާ މެދު ސުވާލު އުފައްދައި، އެކަމާ މެދު ގޮތެއް ނިންމައިދިނުމަށް އެދި ސުޕްރީމް ކޯޓަށް މައްސަލަ ހުށަހެޅުއްވި ހަތަރު ބޭފުޅުންނެވެ.
ސުޕްރީމް ކޯޓުގެ ނިންމުން އާންމުކޮށްފައިވާ އިރު އެ މައްސަލައިގެ ނިންމުމުގައި ބުނެފައި ވަނީ، މިކަމާ ބެހޭ ގޮތުން ސުޕްރީމް ކޯޓުން މީގެ ކުރިން ނިންމުންތަކެއް ނިންމާފައިވާ ކަމަށާއި އަދި މެމްބަރުންގެ ގޮނޑި ގެއްލޭ ގޮތް ގާނޫނުއަސާސީގައި ބަޔާންކޮށްފައިވާ ކަމަށެވެ. ހަމައެހެންމެ، މި މައްސަލާގައި ކުރި ހުކުމަށް ފަހު، އެކަން އިތުރަށް ކަށަވަރު ކުރުމަށް ޓަކައި އޭގެ ފަހުން އަމުރެއް ނެރެފައިވާއިރު، "އެ ގަޒިއްޔާގައި ހުކުމް ކުރި ތާރީހުގައި ރައްޔިތުންގެ މަޖިލީހުގެ މެމްބަރުންގެ ގޮތުގައި ތިބި ބައެއްގެ މެމްބަރު ކަމާ މެދު ވަކި ގޮތެއް ކަނޑައެޅުމުގެ ބަދަލުގައި އެ ތާރީހުގެ ފަހުން އެ ފަރާތްތަކުން އަމަލު ކުރާ ގޮތެއްގެ މައްޗަށް ތަތުބީގު ވާނެ އަހުކާމްތަކެއް ބަޔާން ކުރާ ގަޒިއްޔާއަކަށް ވާއިރު، އެ ގަޒިއްޔާގެ ދަށުން އަދި ގަޒިއްޔާގައި ބުނެފައިވާ ސަބަބުތަކަށް ޓަކައި ރައްޔިތުންގެ މަޖިލީހުގެ މެމްބަރެއްގެ މެމްބަރުކަން ގެއްލޭނެ ގޮތް ބަޔާންކޮށްފައި އޮތުމުން" އެ ތާރީހާ ހަމައަށް މެމްބަރު ކަމުގައި ތިއްބެވި ބޭފުޅުންގެ މެމްބަރު ކަމާ މެދު ސުވާލެއް ނުއުފެދޭ ކަމަށެވެ.
މަޖިލީހުގެ މެމްބަރުކަމުގެ ގޮނޑި ގެއްލިފައި ނުވާ ކަމަށް މި ނިންމުމުގައި ސީދާ ބުނެފައި ނުވި ނަމަވެސް، ގާނޫނީ ވަކީލުން ވިދާޅުވަނީ މި ނިންމުން މާނަކުރެވެނީ މެމްބަރުކަމުގެ ގޮނޑި ނުގެއްލޭ ކަމަށެވެ. އަދި އިދިކޮޅު ފަރާތްތަކުން ގެންދަނީ އެކަމާ އުފާ ފަޅުކުރަމުންނެވެ.
