މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ ބޮޑު ޚިޔާނާތާ ގުޅިފައިވާ އެސްއޯއެފް ކުންފުނިން އެމްއެމްޕީއާރްސީއަށް 160 މިލިއަން ރުފިޔާ ދެއްކުމަށް ސިވިލް ކޯޓުން މިއަދު ހުކުމް ކޮށްފި އެވެ.
އެމްއެމްޕީއާރުސީގެ ބޮޑު ޚިޔާނާތާ ގުޅުން އޮތް ކަމަށް ތުހުމަތު ކުރެވުނު އަދި މިހާރު ފިލައިގެން ރާއްޖެއިން ބޭރުގައި އުޅޭ މުހައްމަދު އައްލާމް ލަތީފް (މޮހޯ) ގެ ހިއްސާ ކުރިން އޮތް އެސްއޯއެފްގެެ މައްޗަށް އެ ހުކުމް އައީ އެ ކުންފުންޏާއި އެމްއެމްޕީއާރުސީއާ ދެމެދު އޮތް އެއްބަސްވުމެއްގެ ދަށުން އެމްއެމްޕީއާރުސީއަށް ލިބެންޖެހޭ 10.7 މިލިއަން ޑޮލަރު (160 މިލިއަނަށް ވުރެ ގިނަ ރުފިޔާ) ހޯދަން އެމްއެމްޕީއާރުސީން ދައުވާ ކުރުމުންނެވެ.
ގާޒީ ހާތިފް ހިލްމީ ކުރެއްވި ހުކުމުގައި ވަނީ ދެ ފަރާތުގެ ދެމެދުގައި ސޮއިކޮށްފައިވާ ޕްރޮމިސަރީ ނޯޓްތަކުންނާއި ލޯނުތަކުގެ ގޮތުގައި އެސްއޯފަށް އެމްއެމްޕީއާރުސީން ދޫކުރި ފައިސާގެ ތެރެއިން 10.7 މިލިއަން ޑޮލަރު އެމްއެމްޕީއާރުސީ އަށް ދެއްކި ކަން އެސްއޯއެފް އަށް ސާބިތުކޮށް ނުދެވޭ ކަމަށެވެ. އެހެންވެ، އެ ފައިިސާއަކީ އެމްއެމްޕީއާރުސީއަށް އެސްއޯއެފުން ދައްކަންޖެހޭ ފައިސާކަން ސާބިތުވާ ކަމަށް އެ ހުކުމުގައިވެ އެވެ.
އެސްއޯފްގެ ޣައިރު ހާޒިރުގައި ކުރި އެ ހުކުމުގައި އަންގާފައި ވަނީ މިއަދުން ފެށިގެން ހަ މަސް ތެރޭގައި އެ ފައިސާ ދައްކައި، ޚަލާސް ކުރުމަށެވެ. އެސްއޯއެފްގެ ޣައިރު ހާޒިރުގައި ހުކުމްކުރީ އެ މަޖިލީހަށް އެސްއޯއެފްގެ ފަރާތުން ހާޒިރު ނުވުމުންނެވެ.
އެ މައްސަލަ އެމްއެމްޕީއާރުސީން ކުރިން ކޯޓަށް ހުށަހަޅައިގެން ކުރިއަށް ގެންދަނިކޮށް، އެމްއެމްޕީއާރުސީން ކޯޓަށް ހާޒިރު ނުވުމުން ފުރަތަމަ އެ މައްސަލަ ބޭރުކޮށްލި އެވެ. މިއަދު އެ މައްސަލައިގެ ހުކުމްކުރީ ދެވަނަ ފަހަރަށް އެމްއެމްޕީއާރުސީން އެ މައްސަލަ ހުށަހެޅުމުންނެވެ.
އެމްއެމްޕީއާރުސީން ދޫކުރި ރަށްތަކާއި ފަޅުތަކުން ދައުލަތަށް ލިބެންޖެހޭ 1.22 ބިލިއަން ރުފިޔާއަށް ޚިޔާނާތްތެރިވެފައިވާއިރު އޭގެ ތެރެއިން ބައެއް ފައިސާ އެކި ފަރާތްތަކަށް ބަހާފައިވަނީ އެސްއޯއެފްގެ އެކައުންޓުންނެވެ. އޭގެ ތެރެއިން ފަސް މިލިއަން ޑޮލަރަށް ޚިޔާނާތްތެރިވި މައްސަލައެއްގައި ކުރީގެ ނައިބު ރައީސް އަހުމަދު އަދީބާއި އެ ކުންފުނީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތާއި ވިޔަފާރިވެރިޔާ ހާމިދު އިސްމާއިލްގެ މައްޗަށް ވެސް ވަނީ ކުށް ސާބިތުވެފަ އެވެ.
