ދިވެހިން އިންތިގާލީ ސަރުކާރެއް ބޭނުމެއް ނުވާ ކަމަށް ބުނެ ކުރީގެ ރައީސް މުހައްމަދު ނަޝީދަށް ޕީޕީއެމް ނައިބު ރައީސް އަދި ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ފާޑު ވިދާޅުވެއްޖެ އެވެ.
އަންނަ އަހަރުގެ ރިޔާސީ އިންތިޚާބުގައި ހޮވަންޖެހޭނީ އިންތިގާލީ ރައީސެއް ކަމަށް ވިދާޅުވެ އެމްޑީޕީގެ ގައުމީ މަޖިލީހުގެ މެމްބަރުންނާ މުޚާތަބު ކުރައްވައި، ނަޝީދު ވިދާޅުވީ މިހާރު ކަންކަން ހިނގަމުންދާ ގޮތަށް ބަލާއިރު މިނިވަން އިންތިޚާބެއް ހޯދުމަކީ ވަރަށް އުނދަގޫ ކަމެއް ކަމަށެވެ. އެހެންވެ، އެމަނިކުފާނުގެ ގަބޫލުފުޅު ކުރައްވަނީ 2018 ގައި ހޮވަން ޖެހޭނީ ގުޅިފައިވާ ޕާޓީތަކުގެ ތެރެއިން ނެރޭ އިންތިގާލީ ރައީސެއް ކަމަށާއި އެ ރައީސެއްގެ ދައުރަކީ މުއައްސަސާތައް އިސްލާހުކޮށް، މިނިވަން އިންސާފުވެރި އިންތިޚާބެއް ބޭއްވޭނެ މާހައުލެއް ގާއިމް ކުރުން ކަމަށް ނަޝީދު ވިދާޅުވި އެވެ.
ރައީސް ނަޝީދު ދެއްކެވި ވާހަކަފުޅާ ގުޅިގެން އަބްދުއްރަހީމް ކުރެއްވި ޓުވީޓްތަކެއްގައި ވިދާޅުވީ ދިވެހިން އިންތިގާލީ ސަރުކާރެއް ބޭނުމެއް ނުވާ ކަމަށާއި ރައްޔިތުން ބޭނުންވަނީ ތަރައްގީއާއެކު ކުރިޔަށްދާން ކަމަށެވެ. އަދި ރައީސް ޔާމީނަށް 2018 ވަނަ އަހަރުގެ އިންތިހާބު ކަށަވަރުކޮށްދެއްވާނެ ކަމަށް ވެސް އޭނާ ވިދާޅުވި އެވެ.
"ހަތެއް ފެބްރުއަރީ 2012ގައި ރައީސް ނަޝީދު ބަލިކޮށްފައި. އިންޝާ ﷲ ދެން އަލަކުން މޮޅެއް ނުވާނެ. ކޮންމެހެން މާމޮޅު ވާހަކަދައްކާނެ ކަމެއް ނެތް،" އަބްދުއްރަހީމް ވިދާޅުވި އެވެ.
އޭނާގެ އިތުރުން ވިލިމާފަންނު ދާއިރާގެ މެމްބަރު އަދި ޕީޕީއެމް ޕާލަމެންޓްރީ ގްރޫޕްގެ ލީޑަރު އަހުމަދު ނިހާން ވިދާޅުވީ ހުރިހާ ގޮތަކުން ވެސް ހިސާބު ޖެހީމަ ވެސް ރައީސް ނަޝީދަށް 2018ގައި ކުރިމަތިނުލެވޭ ކަމަށެވެ.
"މުހައްމަދު ނަޝީދަށް ދެން ވެރިކަން ނުކުރެވޭނެކަން ސައިންޓިފިކް އުސޫލްތަކުން ވެސް ވަނީ ކަށަވަރުވެފައި،" ނިހާން ވިދާޅުވެފައިވެ އެވެ.
