ރާއްޖޭގެ ސްކޫލުތަކުގައި އަންނަ އަހަރު ދަރިވަރުން ފޮތްތަކާއި ޓެބްލެޓް ވެސް ބޭނުން ކުރާނެ ކަމަށް އެޑިއުކޭޝަން މިނިސްޓްރީން މިއަދު ބުނެފި އެވެ.
އެ މިނިސްޓްރީގެ ސްޓޭޓް މިނިސްޓަރު އަހުމަދު ޝަފީއު ވިދާޅުވި ގޮތުގައި ޓެބްލެޓް ގެނެސްދޭނެ ބަޔަކު ހޯދުމުގެ މަސައްކަތް މިހާރު އަންނަނީ ކުރަމުންނެވެ. އެކަމަކު އެ އެއްޗެހި ބޭނުންކުރަން ފަށާނީ އަހަރުގެ ކިހާ ހިސާބެއްގައި ކަމެއް އޭނާ ވިދާޅެއް ނުވެ އެވެ.
އަންނަ އަހަރުގެ ތެރޭގައި ރާއްޖޭގެ ހުރިހާ ސްކޫލެއް ޑިޖިޓަލައިޒް ކުރަން ސަރުކާރުން ވަނީ ނިންމައިފަ އެވެ. ރައްޔިތުންގެ މަޖިލީހަށް ދައުލަތުގެ މި އަހަރުގެ ބަޖެޓް ހުށަހަޅުއްވައި ދެއްވަމުން ފިނޭންސް މިނިސްޓަރު އަހުމަދު މުނައްވަރު ވިދާޅުވީ ޓެބްލެޓް ބޭނުންކުރުމުގެ މަޝްރޫއަށް 154 މިލިއަން ރުފިޔާގެ ބަޖެޓެއް ކަނޑައަޅާފައިވާ ކަމަށެވެ.
ޝަފީއު ވިދާޅުވީ ޓެބްލެޓް ބޭނުންކުރަން ފެށި ކަމުގައި ވިއަސް ޓެކްސްޓް ފޮތްތައް ވެސް ބޭނުންކުރާނެ ކަމަށެވެ. ނަމަވެސް ޓެބްލެޓް ބޭނުންކުރުމަށް ދަރިވަރުންނާއި ޓީޗަރުން އަދި ބެލެނިވެރިން ވެސް އަހުލުވެރިކުރުވާނެ ކަމަށް އޭނާ ވިދާޅުވި އެވެ.
"ކުއްލިއަކަށް ޓެކްސްޓް ފޮތްތައް ބޭނުންކުރުން ހުއްޓާލާ ވާހަކައެއް ނޫން. ޓެބްލެޓް ބޭނުންކުރަން ފަށާއިރު ވެސް ޓެކްސްޓް ފޮތްތައް ހުންނާނެ. މަޑުމަޑުން އެ ބޭނުންކުރުން މަދުކުރެވިގެން ދާނީ،" ޝަފީއު ވިދާޅުވި އެވެ.
ޓެބްލެޓްތައް ބޭނުންކުރާނީ ދަރިވަރުންނަށް އެކަމުން އެންމެ ފަސޭހަ އަދި ފައިދާ ކުރާނެ ގޮތަކަށް ކަމަށާއި އެކަން ބެލުމަށް ދިރާސާތައް ހަދާނެ ކަމަށް އެޑިއުކޭޝަން މިނިސްޓްރީން ބުންޏެވެ.