ފިތުރު ޒަކާތުގެ ގޮތުގައި ބ. އޭދަފުށީގެ ކޮންމެ ފަގީރަަކަށް މިފަހަރު 12000ރ. އަށް ވުރެ ގިނައިން ލިބުނު ކަމަށް އެ ރަށު ކައުންސިލުން ބުނެފި އެވެ.
ކައުންސިލުން ބުނީ އެ ރަށުން މި ރޯދަ މަހު 2918 މީހަކު ޒަކާތުގެ ގޮތުގައި 51،101ރ. ދައްކާފައިވާ ކަމަށާއި ޒަކާތް ހައްގުވާ ފަގީރުންގެ ގޮތުގައި ތިބީ އެންމެ ހަތަރު މީހުން ކަމަށެވެ.
ފަގީރުންގެ ގޮތުގައި އޭދަފުށީން 31 މީހަކު ނަން ނޯޓްކުރި ނަމަވެސް އިސްލާމިކް މިނިސްޓްރީން އެ މީހުންގެ ފޯމުތައް ޗެކްކުރުމަށް ފަހު ފަގީރުންގެ ގޮތުގައި ކަނޑައަޅާފައި ވަނީ ހަތަރު މީހެކެވެ. އެހެންވެ ޒަކާތުގެ ފައިސާ އެ ހަތަރު މީހުންގެ މެދުގައި ބަހާލުމުން ބޮލަކަށް 12،776ރ. ވަނީ ލިބިފަ އެވެ.
މި ރޯދަ މަހު އެއް ލައްކަ އަށް ވުރެ ގިނަ މީހުން ޒަކާތް ދައްކާފައި ވާއިރު މާލެ ސަރަހައްދުން ފަގީރުންގެ ގޮތުގައި ރަޖިސްޓްރީކުރި 5000 އަށް ވުރެ ގިނަ މީހުންގެ ތެރެއިން ކޮންމެ މީހަކަށް ދިނުމަށް ކަނޑައަޅާފައި ވަނީ 500ރ. އެވެ. ޒަކާތުގެ ގޮތުގައި މިފަހަރު 2.7 މިލިއަނަށް ވުރެ ގިނަ ރުފިޔާ ލިބުނު ކަމަށް އިސްލާމިކް މިނިސްޓްރީން ވަނީ ބުނެފަ އެވެ.