އިންޑިއާ އަކީ ރާއްޖޭގެ "އަދުއްވެއްގެ" ގޮތުގައި ސިފަކޮށް، ވަގުތު ނޫހުގައި ލިއުނު ލިއުމެއްގެ މައްސަލަ މޯލްޑިވްސް މީޑިއާ ކައުންސިލުން ބަލަން ފަށައިފި އެވެ.
ކައުންސިލުން ނެރުނު ބަޔާނުގައި، ވަގުތުގެ ނަން ނުގެނެސް ބުނެފައި ވަނީ، ގުޅުން ގާއިމްކޮށްފައިވާ ބައެއް ގައުމުތަކާއި ރާއްޖެއާ ދެމެދު އޮންނަ ގުޅުން ހީނަރުވެގެން ހިނގައިދާނެ ފަދަ ކޮންޓެންޓުތައް އޮންލައިން މީޑިއާއަކުން ޝާއިއުކުރަމުންދާ ކަމުގެ ޝަކުވާތައް ކައުންސިލަށް ހުށަހަޅަމުން އަންނަ ކަމަށެވެ. އެހެންވެ، މި މައްސަލަ އާއި މިފަދަ އެހެން މައްސަލަތައް ވެސް ކައުންސިލުން ބަލަމުން އަންނަ ކަމަށް ބަޔާނުގައިވެ އެވެ.
އިންޑިއާ އާއި ރާއްޖެއާ ދެމެދު އޮންނަ ގުޅުމުގެ ނާޖާއިޒު ފައިދާ އިންޑިއާ އިން ނަގާ ކަމަށް ދޭހަވާ ގޮތަށް ވަރަށް ބޮޑަށް ފާޑުކިޔައި ވަގުތުގައި ލިއުނު ލިއުމުގައިވާ ގޮތުން، ގާތް އެކުވެރިއެއް ކަމަށް ހެދިގެން އޮތް، އިންޑިއާ އަކީ ރާއްޖޭގެ ދުޝްމަނެކެވެ.
"ވަގުތު"ގެ އެ ލިޔުން، މީޑީއާ ކައުންސިލުން ސިފަކޮށްފައި ވަނީ، ގައުމީ ސަލާމަތަށް ނުރައްކާވާ ލިޔުމެއްގެ ގޮތުގަ އެވެ. އަބުރު ރައްކާތެރިކުރުމާއި ހިޔާލު ފާޅު ކުރުމުގެ ގާނޫނުގެ ދަށުން، މިފަދަ މައްސަލަތައް ތަހުގީގު ކުރުމުގެ ބާރު މީޑިއާ ކައުންސިލަށް އޮތީ ދީފަ އެވެ.
ކައުންސިލުން ބުނީ ގައުމީ ސަލާމަތަށް ނުރައްކާވާ ފަދަ ހިޔާލުތައް މީޑިއާގައި ހާމަކުރުމާ ގުޅިގެން ލިބިދާނެ ގެއްލުމަކުން މީޑިއާ އާއި ރިޕޯޓަރުން ސަލާމަތް ކުރުމަށްޓަކައި ހޭލުންތެރި ކުރުވުމަކީ ވެސް އެ ކައުންސިލްގެ ޒިންމާއެއް ކަމަށެވެ. އެހެންވެ، ގައުމީ ސަލާމަތަށް ނުރައްކާވާ ފަދަ ކޮންޓެންޓާ މެދު ފަރުވާތެރިވުމަށް މީޑިއާ ކައުންސިލުން ވަނީ އެދިފަ އެވެ.
މީގެ އިތުރުން، ގާނޫނުގައި ހިޔާލު ފާޅު ކުރުމުގެ މިނިވަންކަން ހަނިކޮށްފައިވާ ހާލަތްތަކުގެ ތެރެ އަށް މީޑިއާތަކުން ނުވަނުމަށާއި ދިވެހިރާއްޖެއާ ގުޅުން ގާއިމްކޮށްފައިވާ އެއްވެސް ގައުމަކާއެކު އޮންނަ ގުޅުން ހީނަރުވެގެން ހިނގައިދާނެ ފަދަ ކޮންޓެންޓުތައް ޝާއިއު ނުކުރުމަށާއި އެފަދަ އެއްވެސް އަމަލެއް ހިންގުމަށް ހިތްވަރު ނުދޭން ވެސް މީޑިއާ ކައުންސިލުން ވަނީ އިލްތިމާސްކޮށްފަ އެވެ.
އިންޑިއާއާ ދެކޮޅަށް ލިއުނު ލިއުމެއްގެ މައްސަލަ ކައުންސިލުން ބަލަމުން އަންނައިރު، އެ ލިއުމާ ގުޅޭގޮތުން ރާއްޖޭގެ އިދިކޮޅު ސިޔާސީ ޕާޓީތަކުން ވެސް ވަނީ ކަންބޮޑުވުން ފާޅުކޮށްފަ އެވެ.
ވަގުތު ނޫހުގެ ވެބްސައިޓްގައި މި ހަފުތާގައި ޝާއިއު ކުރި އެ ލިޔުން މިއަދު ވަނީ އެ ވެބްސައިޓުން ނަގައިފަ އެވެ.
