ކުރީގެ ނައިބު ރައީސް އަހުމަދު އަދީބު ބޭސްފަރުވާއަށް ރާއްޖެއިން ބޭރަށް ފޮނުވުމުގެ އަމުރަކަށް އެދި އޭނާގެ ފަރާތުން ސިވިލް ކޯޓަށް ހުށަހަޅާފައިވާ މައްސަލަ އެ ކޯޓަށް ނުބެލޭނެ ކަމަށް ކަނޑައަޅަން ދައުލަތުން މިއަދު އެދިއްޖެ އެވެ.
އަދީބު ބޭސްފަރުވާއަށް ރާއްޖެއިން ބޭޭރަށް ފޮނުވަން ދައުލަތުގެ މައްޗަށް އަމުރުކޮށްދޭން އެދި އޭނާގެ ފަރާތުން ހުށަހެޅި މައްސަލާގައި ކޯޓުގައި މިއަދު އޮތީ ލިޔެކިޔުންތައް ބަދަލު ކުރުމެވެ. އެކަމަކު ދައުލަތުން ވަނީ އިޖްރާއީ ނުކުތާއެއް ނަގައި، އެ މައްސަލަ ނުބެލޭނެ ކަމަށް ކަނޑައަޅަން އެދިފަ އެވެ.
ދައުލަތުން ނެގި އެ ނުކުތާއާ ގުޅިގެން އަދީބުގެ ފަރާތުން ޖަވާބުދާރީވާން އަންނަ އާދިއްތަ ދުވަހު އަޑުއެހުމެއް ބާއްވާނެ އެވެ.
މީގެ ކުރިން ދިގު އިސްތަށިގަނޑެއް ހުރި އަދީބު މިއަދު ކޯޓަށް ގެނައިއިރު އޭނާގެ ބޯ ހުރީ ވަރަށް ތުނިކޮށް ކޮށާލައިފަ އެވެ.
އަދީބުގެ ސިއްހީ ހާލަތު ގޯސްވެ، އޭނާ ރާއްޖެއިން ބޭރަށް ފޮނުވަން ޑޮކްޓަރުން ލަފާ ދީފައިވާ ކަމަށް އާއިލާއިން ވަނީ ބުނެފަ އެވެ. އެގޮތުން ލޮލުގެ ބައްޔެއް ކަމަށްވާ ގްލުކޮމާ އަދީބަށް ޖެހިފައިވާ ކަމަށާއި އޭނާގެ އެތެރެހަށީގައި ސިސްޓެއް އުފެދިފައިވާ ކަމަށް ވެސް އާއިލާއިން ވަނީ ބުނެފަ އެވެ.
ސަރުކާރުން ބުނެފައިވަނީ އަދީބު ރާއްޖެއިން ބޭރަށް ފޮނުވޭނީ އޭނާ ދައުލަތަށް ދައްކަންޖެހޭ ފައިސާ ދެއްކުމުން ކަމަށެވެ.