ރައީސް އަބްދުﷲ ޔާމީންގެ ހާއްސަ މަންދޫބެއް އެންމެ ފުރަތަމަ ޒިޔާރަތްކުރަން ހަމަޖެއްސި މަންޒިލަކީ އިންޑިޔާ ކަމަށާއި ނަމަވެސް އެ ގައުމުގެ އޮފިޝަލުންނަށް މި ދަނޑިވަޅުގައި ބައްދަލުކުރެވެން ނެތުމުން އިންޑިޔާ އަށް ނުދާން ނިންމީ ކަމަށް ރައީސް އޮފީހުން މިއަދު ބުނެފި އެވެ.
ރާއްޖޭގެ ސިޔާސީ މަސްރަހުގައި މިހާރު ހިނގަމުންދާ ކަންކަމާ ގުޅޭ މައުލޫމާތު، އެކުވެރި ބައެއް ގައުމުތަކާ ހިއްސާ ކުރެއްވުމަށް ރައީސް އަބްދުﷲ ޔާމީންގެ ހާއްސަ މަންދޫބުންތަކެއް ތިން ގައުމަކަށް ފޮނުއްވަން ވަނީ ނިންމައިފަ އެވެ.
ރައީސް ޔާމީންގެ މަންދޫބުން ފޮނުއްވަނީ ޕާކިސްތާނާއި ޗައިނާ އަދި ސައޫދީ އަރަބިއްޔާ އަށެވެ. އެގޮތުން އިކޮނޮމިކް މިނިސްޓަރު މުހައްމަދު ސައީދު ޗައިނާ އަށް، އަދި ފޮރިން މިނިސްޓަރު ޑރ. މުހައްމަދު އާސިމް ރޭ ވަނީ ޕާކިސްތާނަށް ފުރާވަޑައިގެންފަ އެވެ.
ފިޝަރީޒް މިނިސްޓަރު ޑރ. މުހައްމަދު ޝައިނީ ސައޫދީ އަރަބިއްޔާ އަށް މިއަދު ފުރާވަޑައިގަންނަވާނެ އެވެ.
ސިޔާސީ ހަލަބޮލިކަމާއެކު ސަރުކާރާއި އިދިކޮޅު ފަރާތްތަކުގެ ކަންބޮޑުވުންތައް އޮޅުންފިލުވުމަށް ރޭ ވަނީ ޔޫރަޕިއަން ޔޫނިއަން (އީޔޫ)ގެ ސަފީރުންގެ ވަފުދެއް ވެސް ރާއްޖެ ވަޑައިގެންފަ އެވެ. ނަމަވެސް ދިވެހި ސަރުކާރުގެ ވަޒީރުން އެ ބޭފުޅުންނާ ބައްދަލުކުރައްވަން ވަގުތު ދެއްވާފައި ވަނިކޮށް އެ ވަފުދު ފުރައިގެން ދިޔައީ ކަމަށް ސަރުކާރުން ބުންޏެވެ.
ރައީސް އޮފީހުން ނެރުނު ބަޔާނުގައި ބުނީ، އީޔޫގެ ވަފުދުގެ ބޭފުޅުން ފޮރިން ސެކްރެޓަރީ އަހުމަދު ޝަރީރުއާ އެކު ކާމިޔާބު ބައްދަލުވުމެއް ބޭއްވި ކަމަށެވެ. އެ ބައްދަލުވުމުގައި ރާއްޖެ މިހާރު އޮތް ހާލަތު ކިޔައިދީފާނެ ކަމަށް އެ އޮފީހުން ބުންޏެވެ.