ކުރީގެ ރައީސް މައުމޫން އަބްދުﷲ ގައްޔޫމް، ދޫނިދޫ ޖަލުން މާފުށީ ޖަލަށް ބަދަލުކުރި ފަހުން އެމަނިކުފާނަށް "ވީގޮތެއް ނޭނގޭ" ކަމަށް ވިދާޅުވެ ވަކީލުން މިއަދު ކަންބޮޑުވުންފާޅުކުރައްވައިފި އެވެ.
ސަރުކާރު ވައްޓާލަން އުޅުމާއި ރިޝްވަތުގެ ތުހުމަތުގައި ހައްޔަރުކޮށްފައިވާ މައުމޫންގެ ވަކީލުންގެ ޓީމުގައި ހިމެނިވަޑައިގަންނަވާ ހުސެއިން ޝަމީމް ވިދާޅުވީ މައުމޫނާ އެންމެ ފަހުން ގުޅުނީ، މިދިޔަ ހުކުރު ދުވަހު ކަމަށެވެ. އޭގެ ފަހުން އެމަނިކުފާނަށް ގުޅުމުގެ ހުއްދަ ދީފައި ނުވާއިރު، ބައްދަލެއް ވެސް ނުކުރެވޭ ކަމަށް އޭނާ ވިދާޅުވި އެވެ.
ޝަމީމް ވިދާޅުވީ މައުމޫނާ ބައްދަލުކުރަން ވަކީލުން މިއަދު މަސައްކަތް ކުރުމުން، އެ ފުރުސަތު ދެވެން ނެތް ކަމަށް ކަރެކްޝަންސް އިން ބުނެފައިވާ ކަމަށެވެ.
މައުމޫންގެ އިތުރުން، މާފުށީ ޖަލުގައި ހުކުމް ތަންފީޒުކުރަމުންދާ ކުރީގެ ނައިބު ރައީސް އަހްމަދު އަދީބާއި އަދާލަތު ޕާޓީގެ ރައީސް އިމްރާން އަބްދުﷲއާ ވެސް ވަކީލުންނަށް ބައްދަލުނުކުރެވޭ ކަމަށް ޝަމީމް ވިދާޅުވި އެވެ.
"ރައީސް މައުމޫނާ ބައްދަލުކުރަން [ވަކީލުން ކަރެކްޝަންސަށް ހުށަހެޅި] ފޯމެއް ވެސް ބަލައެއް ނުގަނޭ. އެއްވެސް އެއްޗެއް، ހެދުމެއް ވެސް ބަލައެއް ނުގަނޭ. އާއިލީ ބައްދަލުވުމެއް ވެސް ނުދިން. އެއްކޮށް ގުޅުން ކެނޑިފައި މިހާރު ވަނީ،" ޝަމީމް ވިދާޅުވި އެވެ.
އޭނާ ވިދާޅުވި ގޮތުގައި ރައީސް މައުމޫންގެ ހާލު ބެލޭނެ އެއްވެސް ގޮތެއް މިހާރު ނެތެވެ.
"އެހެނެއް ނުހެދޭނެ، ކުއްލި ނުރައްކަލުގެ ހާލަތަށް ވިއަސް،" ޝަމީމް ވިދާޅުވި އެވެ.
މައުމޫނަށް ކުރާ ތުހުމަތު:
1- ރައްޔިތުންގެ މަޖިލީހުގެ މެމްބަރުންނަށް ރިޝްވަތު ދީ، ގާނޫނާ ޚިލާފަށް ވެރިކަން ބަދަލުކުރުމަށް މަސައްކަތް ކުރުން.
2- ފަނޑިޔާރުންގެ މަސައްކަތަށް ނުފޫޒު ފޯރުވައި، ވަކި ގޮތަކަށް ހުކުމްތައް ނެރުމަށް ފަނޑިޔާރުންނަށް ރިޝްވަތުގެ ގޮތުގައި ފައިސާ ދިނުން.
3- ސަލާމަތީ ބާރުތަކުގެ ތެރޭގައި ބައިބައިވުން އުފައްދައި ސަރުކާރާ ދެކޮޅަށް ސަލާމަތީ ބާރުތައް ނުކުތުމަށް ހިތްވަރު ދީ، އެކަމަަށް ރޭވުންތައް ރޭވުން.
ޝަމީމް ވިދާޅުވި ގޮތުގައި މައުމޫނާ ބައްދަލުނުކުރެވޭ ގޮތް ހެދިއިރު، މާފުއްޓަކީ ކުއްލި ނުރައްކަލުގެ ތެރޭގައި ހިމަނާފައިވާ ރަށެއް ނޫނެވެ. "ކުއްލި ނުރައްކަލުގެ ހާލަތޭ" ކިޔައި ހައްގުތަކަށް ހުރަސްއެޅުމަކީ، ޝަމީމް ސިފަކުރެއްވި ގޮތުގައި، ވަރަށް ބޮޑު ޖަރީމާއެކެވެ.
ރައީސް މައުމޫނަށް ޓެރަރިޒަމުން ފެށިގެން ބޮޑެތި ތުހުމަތުތަކެއް ކުރާއިރު އެމަނިކުފާނާ ވާހަކަ ދައްކަން ވަކީލުން ބޭނުންވާ ކަމަށާއި އެ ފުރުސަތަށް ނުދޭނަމަ "ގެއްލުވާލައިގެން އުޅެނީއޭ" ބުނެވޭނެ ކަމަށް ވެސް ޝަމީމް ވިދާޅުވި އެވެ.
"އެއީ ހަމަ ޓޯޗާގެ އަމަލެއް ކަމަށް އަޅުގަނޑު ގަބޫލުކުރަނީ،" ޝަމީމް ވިދާޅުވި އެވެ.