ސަރުކާރުން ރައްޔިތުންގެ މަޖިލީހަށް ހުށަހަޅައި، މިއަދު ބަހުސް ފަށާފައިވާ އެންޓި ޑިފެކްޝަން ބިލް ބިނާކުރަން ޖެހޭނީ ގާނޫނު އަސާސީގެ ބިންގަލުގެ މަތީގައި ކަމަށް، ކަނޑިތީމު ދާއިރާގެ ޕީޕީއެމް މެމްބަރު މުހައްމަދު ހުސައިން މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގައި މިހާރު ހިމެނޭ އެންމެ ތަޖުރިބާކާރު އެއް މެމްބަރު މި ބަހުސްގައި ވިދާޅުވީ މެމްބަރަކު، ޕާޓީ ދޫކޮށްލައިފި ނަމަ މަޖިލީހުގެ ގޮނޑި ގެއްލޭ އުސޫލަށް ތާއީދުކުރައްވާ ކަމަށެވެ. އެކަމަކު އެ ބިލް ވާން ޖެހޭނީ ހަރުދަނާ އުސޫލެއްގެ މަތިން ހަދާ ގާނޫނަކަށް ކަމަށް އޭނާ ވިދާޅުވި އެވެ.
ގާނޫނު އަސާސީގެ ބިންގަލުގެ މަތީގައި އެ ބިލް ބިނާކުރަން މުހައްމަދު ހުސައިން ވިދާޅުވި އިރު، ރައްޔިތުންގެ މަޖިލީހުގެ މެމްބަރުންގެ ގޮނޑި ގެއްލޭނެ ކަމަށް ގާނޫނުއަސާސީގައި ބުނާ ސަބަބުތަކުގެ ތެރޭގައި ޕާޓީއަކުން ވަކިވުން، ވަކިކުރުން ނުވަތަ އެހެން ޕާޓީއަކާ ގުޅުން ހިމަނާފައެއް ނުވެ އެވެ. އެހެން ގާނޫނީ ބައެއް ބޭފުޅުން ވިދާޅުވަނީ ގާނޫނުއަސާސީ ބަދަލުނުކޮށް، އެންޓި ޑިފެކްޝަން ގާނޫނު ނުހެދޭނެ ކަމަށެވެ.
އެކަމަކު އެންޓި ޑިފެކްޝަން ބިލަކީ ގާނޫނު އަސާސީއާ ސީދާ ހިލާފު ބިލެއް ކަމަކަށް އޭނާ ވިދާޅެއް ނުވެ އެވެ.
މުހައްމަދު ހުސައިން ވިދާޅުވި ގޮތުގައި އެންޓި ޑިފެކްޝަންގެ ގާނޫނު 40 ގައުމެއްގައި އޮވެ އެވެ. އޭގެ ތެރެއިން ގިނަ ގައުމުތަކުން ގާނޫނު ލިއުމުގައި ސަމާލުކަން ދީފައި އޮތީ ޕާޓީން މެމްބަރުން ވަކިކޮށްގެން، ގޮނޑި ގެއްލޭ ގޮތް ފުރިހަމަ އިޖުރާއާތުތަކާ އެކުގައި ބޭއްވުމަށް ކަމަށެވެ. އެގޮތުން ފުރަތަމަ ވެސް ގޮނޑި ގެއްލޭ ހިސާބަށް ނުގޮސް، ކުރެވޭނެ ކަންކަން ބިލުގައި ހިމެނުން މުހިންމު ކަމަށް އޭނާ ވިދާޅުވި އެވެ.
އޭނާ ވަނީ ޕާޓީ ޓިކެޓުގައި ކުރިމަތިލުމުން މެމްބަރުންގެ ގޮނޑި ގެއްލިފައި، އަމިއްލަ ގޮތުން އިންތިހާބުވާ މެމްބަރުން ޕާޓީއަކަށް ފުރަތަމަ ފަހަރަށް ބަދަލުވުމުން ގޮނޑި ނުގެއްލޭ ގޮތަށް އޮތުމަކީ އެންމެ ރަނގަޅު ގޮތެއްތޯ ސުވާލު އުފައްދަވައި، ކޮމިޓީ މެމްބަރުން އެކަމާ ވިސްނުމަށް އެދިވަޑައިގެންފަ އެވެ.
"ޕާޓީން ހޮވޭ މެމްބަރު އަމިއްލަ އަށް ނުކުތުމުން ގޮނޑި ގެއްލޭ ފަދައިން، އަމިއްލަ މެމްބަރަކު ރައްޔިތުންނަށް ދިން ޔަގީންކަމާ ހިލާފުވެފައި ޕާޓީއަކާ ގުޅުނީމަ ގޮނޑި ނުގެއްލޭ ގޮތަށް އޮތީމަ، އެ ހާލަތެއްގައި އޮތް މީހަކަށް ހަމަހަމަކަމާ އެކު ފިޔަވަޅު އެޅުނީ ކަމަށް ވާނެތޯ،" މުހައްމަދު ހުސެއިން ވިދާޅުވި އެވެ.
މެމްބަރުންގެ ގޮނޑި ގެއްލޭ ގޮތަށް ހަދަނީ، އެ މެމްބަރުންނަށް އަދަބެއް ދޭން ކަމަށް ވަނީ ނަމަ، ހަމަ އެ މެމްބަރުންނަށް ބައި އިލެކްޝަންގައި ބައިވެރިވެވޭ ގޮތަށް ބިލުގައި އޮތުމަކީ ހަމަޖެހޭ ކަމެއްތޯ އޭނާ ސުވާލު އުފެއްދެވި އެވެ. އެހެންކަމުން އެ މައްސަލަ އަށް ކޮމިޓީން ރިއާޔަތް ކުރަން ޖެހޭ ކަމަށް ވިދާޅުވި އެވެ.
"ބިލެއް ހަދާ ކަމުގައިވާ ނަމަ، ގާނޫނުއަސާސީގައި [ބުނާ ކަންކަން] އެކަށައަޅާލަން ވާނެ. ސުލޫކީ މައްސަލައިގައި ޕާޓީން ވަކިކޮށްގެން ގޮނޑި ގެއްލޭ ކަމުގައިވާ ނަމަ، އެއީ ކޮން ކަހަލަ ކަންތައްތަކެއްގެ މައްޗަށް ކަން ލިޔެވިފައި އޮންނަން ވާނެ،" މުހައްމަދު ހުސައިން ވިދާޅުވި އެވެ.
"ގާނޫނު އަސާސީގައި މެމްބަރުންނަށް ދީފައި އޮތް ވޯޓު ދިނުމުގެ މިނިވަންކަން ރައްކާތެރި ކޮށްދެވޭތޯ ވަރަށް ބޮޑަށް މަސައްކަތް ކުރަން ޖެހޭ."
މި ބިލް ސަރުކާރުން ހުށަހެޅި ނަމަވެސް ޕީޕީއެމްގެ މެމްބަރުންގެ ތެރޭގައި ބޮޑެތި ހިޔާލު ތަފާތުވުންތަކެއް އޮތީ އުފެދިފަ އެވެ.
މުހައްމަދު ހުސައިން އެދިވަޑައިގަތީ ކޮމިޓީގައި ބިލަށް އިސްލާހުތަކެއް ގެންނާނެ ކަމަށް އުންމީދުކުރައްވާ ކަމަށެވެ.
