ފުލުހުން ރޭ ހައްޔަރުކުރި، ކުރީގެ ރައީސް މުހައްމަދު ނަޝީދުގެ ކޮއްކޯފުޅު، ގާނޫނީ ވަކީލް ނާޒިމް ސައްތާރު ފުލުހުންގެ ބަންދުން ދޫކޮށްލައިފި އެވެ.
ނާޒިމް ދޫކޮށްލީ މީގެ ކުޑަ އިރުކޮޅެއް ކުރިންނެވެ.
ފުލުހުން ނާޒިމް ހައްޔަރު ކުރީ، ކުއްލި ނުރައްކަލުގެ ހާލަތުގެ ދަށުން ހައްޔަރު ކޮށްފައިވާ ބައެއް މީހުން ކްރިމިނަލް ކޯޓަށް ރޭ ހާޒިރު ކުރުމުން އެ ސަރަހައްދުގައި ހުންނަވަނިކޮށެވެ.
ނާޒިމް ވިދާޅުވީ އޭނާއަށް އެއްވެސް ސުވާލެއް ނުކުރާ ކަމަށާއި ބަންދުން ދޫކޮށްލިއިރު، ފުލުހުންގެ އިދާރާއަށް ހާޒިރުވާން އަންގާފައިނުވާ ކަމަށެވެ.
"ކޯޓަށް ވެސް ހާޒިރުނުކޮށް ފުލުހުން މި ދޫކޮށްލީ. ފުލުހުންގެ ވާޖިބަށް ހުރަސްއެޅިކަމުގެ ތުހުމަތު މި ކުރަނީ،" ނާޒިމް ވިދާޅުވި އެވެ.
ކުއްލި ނުރައްކަލުގެ ހާލަތު އިއުލާނުކުރި ފަހުން އެ ހާލަތުގެ ދަށުން އަދި އެކި މުޒާހަރާތަކާ ގުޅިގެން އެތައް ބަޔަކު ވަނީ ހައްޔަރުކޮށްފަ އެވެ.
