ރާއްޖެ ޓީވީ ބަންދުކުރަން މެމްބަރު ޔާމީން ގޮވާލައިފި

ރާއްޖެ ޓީވީ ހުއްޓުވާލަން ނޫނީ ބަންދު ކުރަން ޖެހޭ ކަމަށް، އެ ސްޓޭޝަނުގެ އިސްވެރިއެއްގެ ގޮތުގައި ގިނަ ދުވަސްތަކެއް ވާންދެން މަސައްކަތް ކުރެއްވި ރައްޔިތުންގެ މަޖިލީހުގެ ވެލިދޫ ދާއިރާގެ މެމްބަރު އަބްދުﷲ ޔާމީން ރަޝީދު މިއަދު ގޮވާލައްވައިފި އެވެ.

ރާއްޖެ ޓީވީގެ ޑެޕިއުޓީ ސީއީއޯގެ މަގާމާއި ފަހުން އެތަނުގެ އެޑްވައިޒަރެއްގެ ގޮތުގައި ވެސް ހުންނެވި ޔާމީން މިއަދު ކުރެއްވި ޓްވީޓެއްގައި ވިދާޅުވީ ރާއްޖޭގެ ކަންކަން ބޮއްސުންލައިގެން ދިޔުމުގެ ކުރިން، ވީހާ ވެސް އަވަހަކަށް އެ ސްޓޭޝަން ބަންދު ކުރަން ޖެހޭ ކަމަށެވެ. އަދި އަނިޔާވެރިކަމަށް ގޮވާލުމަކީ ނޫސްވެރިކަން ނޫން ކަމަށް ވެސް ވިދާޅުވި އެވެ.

ޔާމީން މިހެން ޓްވީޓް ކުރެއްވުމާއެކު އޭނާއާ އެކު އެތަނުގައި މަސައްކަތް ކުރެއްވި ބައެއް ނޫސްވެރިން ވެސް ޓްވީޓުގައި ރައްދު ދިނެވެ.

ނޫސްވެރިއެއްގެ ގޮތުގައި މަސައްކަތް ކުރައްވަމުން ޔާމީން ރާއްޖެ ޓީވީއާ ގުޅިވަޑައިގެންނެވި އިރު އެތަން ހިންގަމުން ދިޔައީ މާލެޓީވީގެ ނަމުގަ އެވެ. އޭނާއާއެކު ދެން އިސްކޮށް އެތަނުގައި މަސައްކަތް ކުރެއްވީ މިހާރު ސަންގު ޓީވީގެ ސީއީއޯ އިބްރާހިމް ވަހީދު (އަސްވާޑް) އެވެ. އެކަމަކު ފަހުން އެ ދެބޭފުޅުން ރާއްޖެ ޓީވީން ވަކިވެ ވަޑައިގެން، ސަންގު ޓީވީ އުފެއްދީ އެވެ.

ކުރިން އެމްޑީޕީ މެމްބަރެއްގެ ގޮތުގައި ހުންނެވުމަށް ފަހު މިހާރު ސަރުކާރާއެކު މަސައްކަތް ކުރައްވަމުން ގެންދަވާ ޔާމީންގެ މި ޓްވީޓާއެކު ސޯޝަލް މީޑިއާގައި އޭނާއަށް ގިނަ ފާޑުކިޔުންތަކެއް އަމާޒުވި އެވެ.

ބައެއް މީހުން ބުނިގޮތުގައި ޓެރަރިޒަމަށް ހިތްވަރު ލިބޭ ގޮތަށް، ތަނެއް ނައްތާލަން ޔާމީން ގޮވާލެއްވި އިރު އެތަނަކީ އޭނާ މީހަކަށް ހެއްދެވި ތަނެވެ. އަދި މިހާރު ރަނގަޅު މަގާމެއްގައި ހުންނެވުމަށް ފަހު، ކުރިން މަސައްކަތް ކުރިތަން ނައްތާލަން ގޮވުމަކީ "ކުއްޅަވަފަލު ރަންޏަކަށް" ވުން ކަމުގައި ވެސް ބައެއް މީހުން ސިފަ ކުރި އެވެ.

އާއްމު ގޮތެއްގައި އިދިކޮޅު ފަރާތްތަކުގެ ހަބަރުތައް ގެނެސްދޭ ރާއްޖެ ޓީވީ ބަންދުކުރުމަށް، ފޮނަދޫ ދާއިރާގެ މެމްބަރު އަބްދުއްރަހީމް ވެސް ވަނީ މީގެ ކުރިން އެކި ފަހަރު މަތިން ގޮވާލައްވާފަ އެވެ.