ރައީސުލްޖުމްހޫރިއްޔާގެ ގަރާރަކުން މިދިޔަ ހަފުތާގައި އުފެއްދެވި ކުންފުނި، ގްރޭޓާ މާލެ އިންޑަސްޓްރިއަލް ޒޯން ލިމިޓެޑް"ގެ ބޯޑަށް މެމްބަރުން އައްޔަންކޮށްފި އެވެ.
ހަތް މެމްބަރުން ތިއްބަވާ އެ ކުންފުނީގެ ޗެއާމަނަކަށް ހަމަޖެއްސީ، ދަފްތަރު، 4226، މުހައްމަދު ރަޝީދެވެ. އޭނާއަކީ ކުރިން ތިލަފުށި ކޯޕަރޭޝަން (ޓީސީއެލް)ގެ ޗެއާމަނެވެ. އަދި މެނޭޖިން ޑިރެކްޓަރަކީ، ސ. ހުޅުދޫ، ރިވާ ސައިޑް، އަހުމަދު ނާސިފް އެވެ. އެއީ ކުރީ ޓީސީއެލް މެނޭޖިން ޑިރެކްޓަރެވެ.
އޭގެ އިތުރުން ޑިރެކްޓަރުންގެ ގޮތުގައި ހަމަޖެއްސި ފަސް ބޭފުޅުންނަކީ ކްލަބް ވެލެންސިއާގެ ކުރީގެ ޗެއާމަން އަދީލް ޖަލީލް، މ. އަފްޒާ، އާމިނަތު ޝަނާ، ދ. ހުޅުދެލީ، އަހްމަދު ނަޝީދު، ޅ. ނައިފަރު ޑޭޒީމާގޭ އަބްދުލް މުންއިމް މުހައްމަދު މަނިކާއި، ދަފްތަރު އާމިނަތު ހަމީދެވެ.
މި ކުންފުންޏަކީ، ގުޅީފަޅު، އިންވެސްޓްމަންޓް ލިމިޓެޑް (ޖީއައިއެލް) އާއި ތިލަފުށި ކޯޕަރޭޝަން ލިމިޓެޑް އެއްކޮށްލައިގެން ހެދި ކުންފުންޏެވެ. ދެ ކުންފުނިން ވަކިވަކިން ކުރަމުން އައި މަސައްކަތް މިހާރު ކުރާނީ މި ކުންފުނިންނެވެ.
