މާލޭގެ ވިޔަފާރި ބަނދަރު ތަރައްގީކޮށް ޚިދުމަތުގެ ފެންވަރު ރަނގަޅުކުރަން ފަށާފައިވާ މަޝްރޫއަށް ގުޅިފަޅު ހިއްކާ ނިމިއްޖެ ކަމަށް ޕްލޭނިން މިނިސްޓްރީން މިއަދު ބުނެފި އެވެ.
ޕޯޓު ބަދަލުކުރަން ފުރަތަމަ ފިޔަވަހީގައި ޕްލޭންކޮށްފައި އޮތީ ހަ މިލިއަން ކިއުބިކް މީޓަރު ހިއްކާށެވެ. އެ މަސައްކަތް ނިންމައި މިހާރު ކުރިއަށް ދަނީ ރިވެޓްމެންޓް ޖެހުމުގެ މަސައްކަތެވެ.
ޕްލޭނިން މިނިސްޓްރީން މިއަދު ބުނީ މަސައްކަތް ނުހުއްޓި ކުރިއަށްދާއިރު، މާޗް މަހުގެ ތެރޭގައި ބޮސްކާލިސްގެ މަސައްކަތް ނިމޭނެ ކަމަށެވެ.
މާސްޓާ ޕްލޭނާ އެއްގޮތަށް ގުޅިފަޅު ހިއްކުމުގެ މުޅި މަޝްރޫ އަށް 120 މިލިއަން ޑޮލަރު (1.86 ބިލިއަން ރުފިޔާ) އަރާނެ ކަމަށް ޕްލޭނިން މިނިސްޓްރީން ލަފާކުރެ އެވެ. ބީލަމަށް ނުލައި ބޮސްކާލިސްއާ ފުރަތަމަ ފިޔަވަހި ހަވާލުކުރީ 53 މިލިއަން ޑޮލަރު (817 މިލިއަން ރުފިޔާ) އަށެވެ.
ބޮސްކާލިސްއާ ހަވާލުކުރި ފުރަތަމަ ފިޔަވަހި ނިމުމުން ދެން ހިއްކާނީ ކިހާ ސަރަހައްދެއް ކަމެއް މިހާތަނަށް އާއްމެއް ނުކުރެ އެވެ.
ގުޅިފަޅު ހިއްކައިގެން ހިންގާ މަޝްރޫއުގައި ސަރުކާރުގެ ވިސްނުމަކީ މާލޭ ނޯތު ހާބަރުގައި މިހާރު ދެމުން އަންނަ ހިދުމަތްތައް ވެސް ގުޅީފަޅަށް ބަދަލުކުރުމެވެ. އޭގެ ތެރޭގައި ގުދަންތަކާއި ހޯލްސޭލް ފިހަރާތަކަށް ވެސް ހިމެނެ އެވެ.
ތިލަފުށީގައި ކުރިން އަޅަން ނިންމި ޕޯޓް ގުޅިފަޅަށް ބަދަލުކޮށް ބޮޑު ސަރަހައްދެއް ހިއްކަން ފެށުމުން ތިމާވެށީގެ ތަޖުރިބާކާރުންގެ ކަންބޮޑުވުން އޮތެވެ.
ޕްލޭނިން މިނިސްޓަރު މުހައްމަދު އަސްލަމް ވިދާޅުވެފައިވާ ގޮތުގައި ގުޅިފަޅުގައި އެ ޕްރޮޖެކްޓް ހިންގަން ނިންމީ މާލޭގައި އޮތް ޕޯޓް ކުޑަވުމުގެ ސަބަބުން މާލެ ކައިރިން އެފަދަ ބަނދަރަކަށް އެންމެ ރަނގަޅު ތަނަށް އެ ފަޅު ވާތީ އެވެ. ތިލަފުށީގައި އެކަން ނުކުރީ އެއީ ކުރިންސުރެ ކުނި ނައްތާލުމުގެ މަސައްކަތް ކުރަމުން އަންނަ ތަނަކަށް ވާތީ ޕޯޓެއް ހިންގަން ދަތިވާނެތީ ކަމަށް އޭނާ ވިދާޅުވެފައިވެ އެވެ.
ގުޅިފަޅަކީ ދުނިޔޭގައި ވެސް އާންމުކޮށް ނުހިއްކާ ވަރުގެ ފުން ފަޅެއް ކަމަށް، ބައެއް ތަޖުރިބާކާރުން ބުނެ އެވެ. އެނގިފައިވާ ގޮތުގައި ގުޅިފަޅުން ހިއްކި ސަރަހައްދުގެ ފުން މިނުގައި އެވްރެޖްކޮށް 20 މީޓަރު (60 ފޫޓު) ހުރެ އެވެ. ރާއްޖޭގައި އާންމުކޮށް ހިއްކާފައިވާ ފަޅުތަކުގެ ފުންމިން އުޅެނީ އެވްރެޖްކޮށް ތިން މީޓަރާއި ފަސް މީޓަރާ ދެމެދުގައި ކަމަށް އެ ދާއިރާގެ ތަޖުރިބާކާރުން ވިދާޅުވެ އެވެ. އެހެންކަމުން މިއީ ރާއްޖޭގައި ވެސް ހިއްކާ އެންމެ ފުން ފަޅެވެ. އެހާ ފުން ތަނެއް ހިއްކަން ޖެހުމަށް އެކަމަށް ބޭނުންވާނެ ވެއްޔާއި ހަރަދު ބޮޑުވެ އެވެ.
