މި އަހަރުގެ ރިޔާސީ އިންތިޚާބުގައި އިދިކޮޅު އެމްޑީޕީން ނުކުންނާނެ ކެންޑިޑޭޓަކު ހޮވުމަށް ބާއްވާ އެ ޕާޓީގެ ރިޔާސީ ޕްރައިމަރީގެ މުއްދަތު މިއަދު ހަމަވިއިރު، ކުރިމަތިލެއްވި ހަމައެކަނި ބޭފުޅަކީ ކުރީގެ ރައީސް މުހައްމަދު ނަޝީދު ކަމަށް އެމްޑީޕީން މިރޭ ބުނެފި އެވެ.
މި މަހުގެ 30 ގައި ބާއްވާ، އެންމެ ބޮޑު އިދިކޮޅު ޕާޓީގެ ރިޔާސީ ޕްރައިމަރީ އަށް ކުރިމަތިލެއްވުމުގެ ފޯމު ނަޝީދުގެ ފަރާތްޕުޅުން އެމަނިކުފާނުގެ ކެމްޕެއިން މެނޭޖަރު ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވަނީ ހުށަހަޅުއްވައިފަ އެވެ. އަދި ނަޝީދު ޕްރައިމަރީގައި ވާދަކުރެއްވުމަށް ތާއީދު ކޮށްފައިވާ އެމްޑީޕީގެ 7،739 މެމްބަރެއްގެ ސޮއި ހިމެނޭ ފޯމު ވެސް އޭގެ ތެރޭގައި ހިމެނޭ ކަމަށް އެ ޕާޓީން ބުނެ އެވެ.
"ރައީސް މުހައްމަދު ނަޝީދުގެ ފަރާތްޕުޅުން ހުށަހެޅުއްވި ފޯމުތަކާއި ތާއީދު ފޯމުތައް އިންތިޚާބާ ބެހޭ ކޮމިޓީން ބެއްލެވުމަށް ފަހު އެއީ ސައްހަ ފޯމުތަކެއް ކަން ވަނީ ނިންމަވާފަ އެވެ،" އެމްޑީޕީން ނެރުނު ބަޔާނުގައި ވެ އެވެ.
މި އަހަރުގެ ރިޔާސީ އިންތިޚާބަށް އެމްޑީޕީގެ ފަރާތުން ވާދަކުރައްވާ ކެންޑިޑޭޓަކަށް ވުމަށް ނަޝީދު މަސައްކަތްޕުޅު ކުރައްވާއިރު، ކްރިމިނަލް ކޯޓުގެ ކުރީގެ އިސް ގާޒީ އަބްދުﷲ މުހައްމަދު ގާނޫނާ ޚިލާފަށް ހައްޔަރުކުރި މައްސަލާގައި ޓެރަރިޒަމްގެ ކުށް ސާބިތުވާ 13 އަހަރުގެ ޖަލު ހުކުމެއް ވަނީ އައިސްފަ އެވެ. އަދި ބޭސް ފަރުވާ އަށް ރާއްޖޭން ބޭރަށް ވަޑައިގެންނެވި ގޮތަށް ނަޝީދު ވަނީ އިނގިރޭސި ވިލާތުން ހިމާޔަތް ހޯއްދަވައިފަ އެވެ.
ނަޝީދަށް އިއްވާފައިވާ ދިގު މުއްދަތުގެ ހުކުމާ އެކު، އެމަނިކުފާނަށް ރިޔާސީ އިންތިޚާބުގައި ވާދަނުކުރެއްވޭނެ ކަމަށް ސަރުކާރާއި ޕީޕީއެމް ކޯލިޝަނަށް ތާއީދު ކުރާ ފަރާތްތަކުން ބުނި ނަމަވެސް ނަޝީދު ވިދާޅުވަނީ ފަހު ވަގުތު ފުރުސަތު ހުޅުވޭނެ ކަމަށެވެ.
