ކެމްޕޭން ކުރިއަށް ގެންދޭ، އީސީ ފަހަތަށް ޖެހޭނެ: ނަޝީދު

ކުރީގެ ރައީސް މުހައްމަދު ނަޝީދަށް ރިޔާސީ ޕްރައިމަރީގައި ވާދަ ނުކުރެއްވޭނެ ކަމަށް އިލެކްޝަންސް ކޮމިޝަން (އީސީ) އިން ކަނޑައެޅި ނަމަވެސް ކެމްޕޭން ކުރިއަށް ގެންދިޔުމަށާއި އީސީން އަދި ފަހަތަށް ޖެހޭނެ ކަމަށް އެ މަނިކުފާނު މިއަދު ވިދާޅުވެއްޖެ އެވެ.

ކުރިއަށް އޮތް ރިޔާސީ އިންތިހާބުގައި އެމްޑީޕީގެ ފަރާތުން ވާދަކުރައްވާނެ ކަމަށް ނަޝީދު އިއުލާންކުރެއްވި ނަމަވެސް އީސީން ވަނީ އެ މަނިކުފާނަށް ފުރުސަތު ދީފި ނަމަ، އެމްޑީޕީގެ ޕްރައިމަރީ ބާތިލްކޮށް، ޕާޓީ އުވާލާނެ ކަމުގެ އިންޒާރު މިއަދު ދީފަ އެވެ.

އީސީން ބުނާގޮތުން ކުށެއް ސާބިތުވެފައިވާ އެއްވެސް މީހަކަށް ސިޔާސީ ޕާޓީއެއްގެ ރިޔާސީ ޕްރައިމަރީގައި ވާދައެއް ނުކުރެވޭނެ އެވެ. އަދި ގާނޫނާއި ގަވާއިދާ ޚިލާފަށް ބާއްވާ ޕްރައިމަރީތައް ބާތިލްކުރާނެ ކަމުގެ އިންޒާރު ވެސް އެތަނުން މީގެ ކުރިން ވަނީ ދީފަ އެވެ.

އީސީގެ މި އިންޒާރާ ގުޅިގެން ޔޫޓިއުބް މެދުވެރިކޮށް ނެރުއްވި ވީޑިއޯއެއްގައި ނަޝީދު ވިދާޅުވީ ރިޔާސީ އިންތިހާބުގެ ކެންޑިޑޭޓެއްގެ ކެންޑިޑެސީ ސައްހަ ކަމާގުޅޭ ގޮތުން ގޮތެއް ނިންމާނީ ސުޕްރީމު ކޯޓުގެ ފަސް ފަނޑިޔާރުން ކަމަށާއި އެ މަނިކުފާނު އިންތިހާބުގައި ވާދަކުރުމަށް ހުރިހާ ގާނޫނުތަކާއި ގަވައިދުތައް ތަންދޭ ކަމަށެވެ. އެހެންވެ، އެމްޑީޕީގެ މެމްބަރުން މިކަމުގައި "އެއް ރޫހާއި އެއް ޖޯޝެއްގައި އެކަތިގަނޑެއްގެ ގޮތުގައި" ތިބެ މަސައްކަތް ކުރާ ނަމަ، އީސީން ފަހަތަށް ޖެހޭނެ ކަމަށް ނަޝީދު ވިދާޅުވި އެވެ.

EC ge fahuge inzaaru: "Nasheed ah vaadha eh nukureveyne, Primary baathilkoh fiyavalhu alhaanan"

The most trusted news source in the Maldives

Mihaaru

"އީސީން އެހާ ކުރިން ބަޔާން ނެރެ، އަޅުގަނޑާ ބެހޭގޮތުން ވާހަކަ ދެއްކީމައި ސާފުވަނީ އެ ބޭފުޅުންނަކަށް އެއްގޮތަކަށް ވެސް ނުކެރެއޭ އަޅުގަނޑާ ވާދަކުރާކަށް. ކޮންމެ ގޮތަކަށް ވެސް އެ ބޭފުޅުން އެބަޖެހެއޭ އަޅުގަނޑުގެ ކެންޑިޑެސީ ބާތިލްކުރަން... އެކަމަކު ޣައިރު ގާނޫނީ އަމަލެއްގެ މަތީގައި އީސީއަކަށް ނުހުރެވޭނެ،" "ޖަޒީރާ ރައީސް"ގެ ނަމުގައި މިހާރު ކެމްޕޭން ފައްޓަވާފައިވާ ނަޝީދު ވިދާޅުވި އެވެ.

އެ މަނިކުފާނު ވިދާޅުވި ގޮތުގައި އިންތިހާބުގައި ވާދަނުކުރެވޭނެ ކަމަށް ބުނެ އީސީން ބަސް ބުނުމަކީ ކުރިއަށް އޮތް އިންތިހާބަށް އެތަނުން ނުފޫޒު ފޯރުވާނެކަމުގެ ފުރިހަމަ ދަލީލެކެވެ. އަދި އެމްޑީޕީގެ ރިޔާސީ ޕްރައިމަރީއާ ގުޅޭގޮތުން އީސީން ދައްކަން ޖެހޭ އެއްވެސް ވާހަކައެއް ނެތް ކަމަށާއި އިންތިހާބު ހިނގާނެ ގޮތާއި އެ ކޮމިޝަނަށް ލިބިފައިވާ ބާރު، ގާނޫނުން ކިޔައިދީފައިވާ ކަމަށް ނަޝީދު ވިދާޅުވި އެވެ.

"އަަޅުގަނޑު އެމްޑީޕީ މެމްބަރުން ކައިރީ އެދެން ޕޯސްޓަރު ހިއްޕައި، ދޮރުން ދޮރަށް ހިނގައި، މި ހިންގާ ފޯރި ގަދަ ކެމްޕޭން ކުރިއަށް ގެންދިޔުމަށް. އެއަށް ފަހު އެމްޑީޕީގެ މެމްބަރުން ގޮތެއް ނިންމާނެ. އެގޮތަށް އެކަން ނިމުމުން ދެން އީސީއާ މުއާމަލާތެއް ކުރަން ޖެހޭނީ" އެ މަނިކުފާނު ވިދާޅުވި އެވެ.

އިލެކްޝަންސް ކޮމިޝަނުގެ ރައީސް އަހްމަދު ޝަރީފް ސޮއިކުރައްވައި އެމްޑީޕީ އަށް މިއަދު ފޮނުވި ސިޓީގައި ބުނެފައި ވަނީ ނަޝީދަކީ ކުށެއް ސާބިތުވެ ހުކުމެއްގައި ހުންނެވި ބޭފުޅެއް ކަމަށެވެ. އެހެންވެ ގާނޫނުތަކުގައިވާ ގޮތުގެ މަތިން، ރިޔާސީ ޕްރައިމަރީގައި ވާދަކުރައްވަން އެމަނިކުފާނުގެ ޝަރުތު ހަމަނުވާ ކަމަށާއި އެމަނިކުފާނަށް ފުރުސަތުދީގެން ބާއްވާ ޕްރައިމަރީއެއް އެ ކޮމިޝަނުން ބަލައި ނުގަންނާނެ ކަމަށް ވިދާޅުވި އެވެ.

ނަމަވެސް އެމްޑީޕީން މިއަދު ހެނދުނު ބުނީ އީސީގެ ވާހަކަ ބަލައި ނުގަންނަ ކަމަށާއި އެ މަނިކުފާނުގެ ކެންޑިޑެސީ އެ ކޮމިޝަނަށް ހުށަހަޅާނެ ކަމަށެވެ.

ނަޝީދުގެ ކެމްޕެއިން އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެމްބަރު އަސްލަމް ވިދާޅުވީ ނަޝީދަކީ ޝަރުތު ފުރިހަމަވާ، ރައްޔިތުން ބޭނުންވާ ކެންޑިޑޭޓް ކަމަށެވެ. އަދި ކެނޑިޑޭޓެއްގެ ޝަތުރު ހަމަނުވާ ކަމަށް އިލެކްޝަން ކޮމިޝަނަށް އެންގޭނީ އެ ކޮމިޝަނަށް ކެންޑިޑެސީ ހުށަހެޅުމުން ކަމަށް ވެސް އަސްލަމް ވިދާޅުވި އެވެ.

އިންތިހާބުތަކާ ބެހޭ ގާނޫނުގައި ބުނާ ގޮތުން ކެންޑިޑޭޓެއްގެ ނަން ހުށަހަޅާތާ 48 ގަޑިއިރުގެ ތެރޭގައި އެ މީހެއްގެ ޝަރުތު ހަމަވާކަން ނުވަތަ ނޫންކަން އިލެކްޝަނުން އެ ކެންޑިޑޭޓަކަށް އަންގަން ޖެހެ އެވެ. ޝަރުތު ހަމަނުވާ ކަމަށް އިލެކްޝަނުން ނިންމައިފިނަމަ ކޯޓަށް ދިއުމުގެ ފުރުސަތު ކެންޑިޑޭޓަށް ލިބިގެންވެ އެވެ. ކެންޑިޑެސީއާ ގުޅޭ ގޮތުން ފަހުގެ ނިންމުން ނިންމާނީ ސުޕްރީމް ކޯޓުންނެވެ.