ކުރީގެ ރައީސް މައުމޫން އަބްދުލްގައްޔޫމްގެ ފޯނު ފުލުހުންނަށް ދޭން އިންކާރު ކުރެއްވި ކަމަށް ބުނެ އެމަނިކުފާނުގެ މައްޗަށް ކުރާ ދައުވާ މަޑުޖައްސާލަން ޖެހޭ ސަބަބެއް ނެތް ކަމަށާއި އަދި އެ ދައުވާ ބާތިލް ކުރަންޖެހޭ ސަބަބެއް ވެސް ނެތް ކަމަށް ކްރިމިނަލް ކޯޓުން މިއަދު ނިންމައިފި އެވެ.
މި ދައުވާ ކުރަނީ ގާނޫނާ ހިލާފަށް ސަރުކާރު ވައްޓާލަން އުޅުމުގެ ތުހުމަތަށް މިދިޔަ ފެބްރުއަރީ މަހު މައުމޫން ހައްޔަރުކޮށް، އެމަނިކުފާނުގެ ފޯން ދޭން ފުލުހުން އެންގުމުން އެކަމަށް އިންކާރު ކުރެއްވި ކަމަށް ބުނެ އެވެ. މައުމޫންގެ އިތުރުން އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދުގެ މައްޗަށް ވެސް މި މައްސަލާގައި ދައުވާ ކުރެ އެވެ. މި މައްސަލާގައި ކުރަނީ އަދުލު އިންސާފު ގާއިމްކުރަން ހުރަސް އެޅުމުގެ ދައުވާ އެވެ. އެކަމަކު މިއަދު ކުރިއަށް ގެންދިޔައީ އެ މައްސަލާގައި މައުމޫންގެ ބައި އެކަންޏެވެ.
މިއަދުގެ އަޑުއެހުމުގައި އޮތީ ޝަރީއަތުގެ އަސްލު އަޑުއެހުންތައް ފަށައިގަތުމުގެ ކުރިން ދެ ފަރާތުން ހުށަހަޅާ ހުށަހެޅުންތަކާއި އެކަމާ މެދު ގޮތެއް ނިންމުމެވެ. ޝަރީއަތުގެ ކުރީގެ ހުށަހެޅުންތަކުގެ ގޮތުގައި މައުމޫންގެ ވަކީލުން 12 ކަމެއް ހުށަހެޅުއްވި އެވެ. އެއީ ޖިނާއީ އިޖްރާއާތުގެ ގާނޫނުގެ ދަށުން ޝަރީއަތް ކުރުމާ ގުޅޭގޮތުން ހަދަންޖެހޭ ގަވާއިދުތައް ނެތުމުން އެ މައްސަލައިގެ ޝަރީއަތް މަޑުޖައްސާލަން ޖެހޭ ކަމަށް ބުނެ ހުށަހެޅި ތިން ހުށަހެޅުމަކާއި ދައުވާ ބާތިލްކުރަން ޖެހޭ ކަމަށް ބުނެ ހުށަހެޅި ހުށަހެޅުންތަކެކެވެ.
ދައުވާ ބާތިލް ކުރަން ހުށަހެޅުންތައް ހުށަހެޅީ އެ މައްސަލާގައި ދައުވާ ފޯމްގައި ސޮއިކޮށްފައި އޮތީ ޕްރޮސެކިއުޓާ ޖެނެރަލް ހުއްދަ ދެއްވާފައިވާ ފަރާތެއްކަން އެނގެން ނެތުމުންނާއި އެ މައްސަލާގެ ތަހުގީގު ހިންގީ ގާނޫނާ ޚިލާފް ބަންދެއްގައި މައުމޫން ބަހައްޓަވައިގެން ކަމަށް ބުނެ އެވެ.
މީގެ އިތުރުން މައުމޫނާ ދެކޮޅަށް ދައުލަތުން ހުށަހެޅި ސިއްރު ހެކިވެރިޔާ ބަލައިނުގަތުމަށް ހުށަހެޅި ހުށަހެޅުމަކާއި އެ މައްސަލައިގެ ތަހުގީގު މަރުހަލާގައި ބޭނުންކުރި ލިޔުންތަކާއި ރެކޯޑިންތައް ހޯދަން ހުށަހެޅި ހުށަހެޅުމެއް ހިމެނެ އެވެ. އަދި ޝަރީއަތުގެ ކުރީގެ ހުށަހެޅުންތައް ހުށަހަޅަން އިތުރު ފުރުސަތެއް ދޭން ވެސް މައުމޫންގެ ވަކީލުން ހުށަހެޅުމެއް ހުށަހެޅި އެވެ.
އެ ހުށަހެޅުންތަކަށް ދައުލަތުން ދެކޮޅު ހެދި އެވެ. ދައުލަތުން ބުނިގޮތުގައި ޖިނާއީ އިޖްރާއާތުގެ ގާނޫނުގެ ދަށުން ޝަރީއަތް ކުރުމާ ގުޅޭގޮތުން ގަވާއިދެއް ހެދިފައި ނެތުމަކީ ޝަރީއަތް މަޑުޖައްސާލަން ޖެހޭ ސަބަބެއް ނޫން ކަމަށާއި އެ ގަވާއިދު ނެތަސް، ގާނޫނުގައި ބުނާ ހައްގުތައް މައުމޫނަށް ލިބިވަޑައިގެންފައިވާ ކަމަށެވެ. އަދި އެ މައްސަލައިގެ ދައުވާ ފޯމްގައި ސޮއިކޮށްފައި އޮތީ ޕްރޮސެކިއުޓާ ޖެނެރަލް ހުއްދަ ދެއްވާފައިވާ ފަރާތެއް ކަމަށާއި އަދި އެ މައްސަލާގެ ތަހުގީގު ހިންގިއިރު މައުމޫން ބަންދުގައި ހުންނެވީ އެހެން މައްސަލައަކާ ގުޅިގެން ކަމަށާއި އެހެންވެ، ދައުވާ ބާތިލް ކުރަންޖެހޭ ސަބަބެއް ނެތް ކަމަށް ވެސް ދައުލަތުން ބުންޏެވެ.
އެ މައްސަލާގައި ދައުލަތުން ހުށަހެޅީ ދެ ހުށަހެޅުމެކެވެ. އެއީ މައުމޫނާ ދެކޮޅަށް ހުށަހަޅާފައިވާ ހެކިވެރިޔާގެ ހެކިބަސް ސިއްރުން ނަގައި ދިނުމަށާއި އޭނާއަކީ ކާކުކަން އެނގޭ ފަދަ އެއްވެސް މައުލޫމާތެއް ހާމަ ނުކުރުމަށް ހުށަހެޅި ހުށަހެޅުމަކާއި ޖިނާއީ އިޖްރާއާތުގެ ގާނޫނުގެ ދަށުން ހެކި ރައްކާތެރި ކުރުމަށް އެ މައްސަލާ ކުރިން ނެރެފައިވާ ވަގުތީ އަމުރު ދާއިމީކޮށް ދިނުމަށެވެ.
އެ ހުށަހެޅުންތަަކަށް މައުމޫންގެ ވަކީލުން ދެކޮޅު ހެއްދެވި އެވެ. މައުމޫންގެ ވަކީލުންގެ ޓީމުގައި ހިމެނޭ ވަކީލް މައުމޫން ހަމީދު ވިދާޅުވީ ހެކި ސިއްރުކުރަން ދައުލަތުން އެދުނީ ހެކިންނަށް ނުފޫޒު ފޯރުވަފާނެތީ ކަމަށް ދައުލަތުން ބުނާއިރު، ނުފޫޒު ފޯރާނީ ކޮން ގޮތަކުން ކަން ދައުލަތަށް ބުނެ ނުދެވޭ ކަމަށެވެ. އަދި ހެކި ރައްކާތެރި ކުރުމަށް ކުރިން ނެރެފައިވާ ވަގުތީ އަމުރު ނެރެފައިވަނީ ވެސް ގާނޫނާ ޚިލާފަށް ކަމަށް އޭނާ ވިދާޅުވި އެވެ.
ދެ ފަރާތުގެ ވާހަކަތަކަށް ފަހު، މައުމޫންގެ ހުށަހެޅުންތަކާ ގުޅިގެން އެ މައްސަލަ ބައްލަވާ ގާޒީ ހަސަން ނަޖީބް ނިންމެވީ މައުމޫންގެ ވަކީލުން ހުށަހެޅުއްވި ހުށަހެޅުންތަކަށް ބަލާއިރު، އެ މައްސަލާގެ ޝަރީއަތް މަޑުޖައްސާލަން ޖެހޭ ސަބަބެއް ނެތް ކަމަށާއި އަދި ދައުވާ ބާތިލް ކުރަންޖެހޭ ސަބަބެއް ވެސް ނެތް ކަމަށެވެ. އަދި ސިއްރު ހެކިވެރިޔާގެ ހެކިބަސް ބަލައިނުގަނެވޭނެ ސަބަބެއް ނެތް ކަމަށާއި ޝަރީއަތުގެ ކުރީގެ ހުށަހެޅުންތައް ހުށަހަޅަން މައުމޫންގެ ވަކީލުންނަށް އިތުރު ފުރުސަތެއް ދެވެން ނެތް ކަމަށް ވެސް ގާޒީ ނަޖީބް ނިންމެވި އެވެ.
މައުމޫންގެ ވަކީލުންގެ ހުށަހެޅުންތަކާ މެދު ގޮތެއް ނިިންމިޔަސް، ދައުލަތުން ހުށަހެޅި ހުށަހެޅުންތަކާ މެދު ގާޒީ ނަޖީބް މިއަދުގެ އަޑުއެހުމުގައި ގޮތެއް ނުނިންމަވަ އެވެ. އެކަން މައުމޫންގެ ވަކީލުންނާއި ދައުލަތުގެ ވަކީލުން ވެސް ފާހަގަކުރެއްވި އެވެ.
އެ މައްސަލާގައި މައުމޫނާ އެކު ދައުވާލިބޭ އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދުގެ ބައި ވަކިން ކުރިއަށް ގެންދިޔައިރު ގޮތެއް ނިންމާފައިވަނީ އެ ބޭފުޅުންނާ ގުޅުންހުރި ބައިތަކަށް ކަމަށާއި އެކަމަކު މައުމޫންގެ ބައިގައި ދައުލަތުން ހުށަހެޅި ހުށަހެޅުންތަކާ މެދު ގޮތެއް ނުނިންމާ ކަން ދެ ފަރާތުގެ ވަކީލުން ވެސް ފާހަގަ ކުރެއްވި އެވެ. އެކަމާ މެދު ގާޒީ ނަޖީބް ވަކި އެއްޗެއް ވިދާޅުނުވެ، މިއަދުގެ އަޑުއެހުން މިއަދު ނިންމަވާލެއްވި އެވެ.
އަޑުއެހުން ނިންމަވާލެއްވުމުގެ ކުރިން ގާޒީ ނަޖީބް އިއުލާން ކުރެއްވީ އެ މައްސަލާގެ ދެން އޮންނަ އަޑުއެހުން އަންނަ ބުރާސްފަތި ދުވަހު އޮންނާނެ ކަމަށެވެ. އެކަމަށް މައުމޫންގެ ވަކީލުން ދެކޮޅު ހެއްދެވި އެވެ.
ވަކީލް މައުމޫން ހަމީދު އެކަމާ ގުޅިގެން ވިދާޅުވީ ޝަރީއަތުގެ އަސްލު އަޑުއެހުންތައް ފަށައިގަންނަން ޖެހޭނީ ޝަރީއަތުގެ ކުރީގެ ހުށަހެޅުންތައް ހުށަހަޅާ ނިމޭތާ 30 ދުވަސް ފަހުން ކަމަށް ޖިނާއީ އިޖްރާއާތުގެ ގާނޫނުގައި ބުނާއިރު، އެ މައްސަލައަށް ތައްޔާރުވުމަށްޓަކައި އެ މުއްދަތު ބޭނުންވާ ކަމަށެވެ.
ޖަވާބުގައި ގާޒީ ނަޖީބް ވިދާޅުވީ ކުރިންވެސް ވިދާޅުވިހެން، ބުރާސްފަތި ދުވަހު އެ މައްސަލައިގެ ޝަރީއަތް އޮންނާނެ ކަމަށެވެ.
ގާޒީ އެގޮތަށް ވިދާޅުވުމުން، މައުމޫންގެ ވަކީލުންގެ ޓީމުގައި ހިމެނޭ ވަކީލް މުހައްމަދު ފައިސަލް ވަނީ އެ ޝަރީއަތް ކުރިއަށް ދަނީ ޖިނާއީ އިޖްރާއާތުގެ ގާނޫނާ އެއްގޮތަށް ތޯ ވިދާޅުވެ، ސުވާލު ކުރައްވައިފަ އެވެ. ފައިސަލް ވިދާޅުވީ ޝަރީއަތުގެ އަޑުއެހުންތައް ތާވަލް ކުރަން ޖެހޭނީ ދެ ފަރާތާ މަޝްވަރާ ކޮށްގެން ކަމަށް ގާނޫނުގައި ބުނާ ކަމަށާއި އަދި ގާނޫނުގައި ބުނާ 30 ދުވަހުގެ މުއްދަތެއް ވެސް ޝަރީއަތުގެ އަސްލު އަޑުއެހުންތައް ފަށައިގަތުމުގެ ކުރިން ދޭން ޖެހޭނެ ކަމަށް ގާނޫނުގައި ބުނާ ކަމަށެވެ.
އެކަމާ ގުޅިގެން ވެސް ވަކި އެއްޗެއް ވިދާޅުނުވެ، ގާޒީ ނަޖީބް ވިދާޅުވީ ބުރާސްފަތި ދުވަހު އެ މައްސަލާގެ ޝަރީއަތް އޮންނާނެ ކަމަށެވެ.
މައުމޫންގެ ހާލުކޮޅު ދެރަވުމުން އަޑުއެހުން ފަސްކުރަން އެދުނު
މިއަދުގެ އަޑުއެހުން ފެށުމުން މައުމޫންގެ ވަކީލުން ވަނީ އެމަނިކުފާނުގެ ސިއްހީ ހާލުކޮޅު ރަނގަޅު ނޫން ކަމަށް ވިދާޅުވެ، މިއަދުގެ އަޑުއެހުން ކުރިއަށް ނުގެންދިއުމަށް އެދިވަޑައިގެންފަ އެވެ. ވަކީލް މައުމޫން ހަމީދު ވިދާޅުވީ މިއަދު ވެސް މައުމޫންގެ ސިއްހީ ހާލުކޮޅު ގޯސްވެފައިވާ ކަމަށާއި އެހެންވެ ޚާއްސަ ޑޮކްޓަރަކަށް އެމަނިކުފާނު ދައްކަން ފުލުހުން މިހާރު މަސައްކަތް ކުރަމުން އަންނަ ކަމަށެވެ. އެފަދަ ހާލަތެއްގައި މައުމޫން ހުންނަވަނިކޮށް، އަޑުއެހުން ކުރިއަށް ގެންދިއުމަކީ މައުމޫންގެ ސިއްހީ ހާލުކޮޅު ގޯސްވެދާނެ ކަމެއް ކަމަށް މައުމޫން ވިދާޅުވި އެވެ.
"މިއަދު އެމަނިކުފާނު ހިތްވަރުފުޅާ އެކު ވަޑައިގެން މި އިންނަވަނީ،" ފިޔާތޮށި ކުލައިގެ ގަމީހެއް ތުރު ކުރައްވައިގެން، ޓައީއެއް އަޅުއްވައިގެން ކޯޓު ރޫމުގައި އިށީނދެވަޑައިގެން އިންނެވި މައުމޫނަށް އިޝާރާތް ކުރައްވައި، ވަކީލް މައުމޫން ވިދާޅުވި އެވެ.
ވަކީލް މައުމޫން ވިދާޅުވި ގޮތުގައި މައުމޫންގެ ސިއްހީ ހާލުކޮޅު ގޯސްވެއްޖެ ނަމަ 48 ގަޑިއިރު ވަންދެން އެމަނިކުފާނުގެ އިސްތަށިފުޅު ހަރަކާތް ނުކުރަން ޑޮކްޓަރު އޮންނަނީ ލަފާ ދެއްވައިފަ އެވެ. އެހެންވުމުން އިށީނދެ އިންނެވުމާއި ދަތުރުފަތުރު ކުރެއްވުމަށް މައުމޫނަށް ދަތިފުޅުވާ ކަމަށް ވިދާޅުވެ، ޝަރީއަތް މިއަދު ކުރިއަށް ނުގެންދަން ވަކީލް އެދިވަޑައިގަތެވެ. އަދި އެމަނިކުފާނު ގެއަށް ބަދަލުކޮށްދޭން ވެސް ވަކީލް މައުމޫން އެދިވަޑައިގަތެވެ.
ގާޒީ ނަޖީބް ވިދާޅުވީ މައުމޫންގެ ހާލަތު ބަޔާންކޮށް، އެމަނިކުފާނުގެ ފަރާތުން ކޯޓަށް މިއަދު ލިޔުމުން އަންގާފައި ނެތް ކަމަށެވެ. އަދި މިއަދުގެ އަޑުއެހުން ކުރިއަށް ގެންދަވަން ނިންމެވީ ކަމަށް ގާޒީ ނަޖީބް ވިދާޅުވި އެވެ.
އެގޮތަށް ގާޒީ ވިދާޅުވުމުން މައުމޫންގެ ވަކީލުންގެ ޓީމުގައި ހިމެނިވަޑައިގަންނަވާ ވަކީލް ފައިސަލް ވެސް ވިދާޅުވީ މައުމޫންގެ ސިއްހީ ހާލުކޮޅުގެ މައުލޫމާތު ލިބިވަޑައިގަތީ ކޯޓު ރޫމަށް މައުމޫން ގެންނެވުމުން ކަމަށާއި އެ ޝަރީއަތް މިއަދު އޮންނަ ކަން ވެސް ވަކީލުންނަށް އެނގުނީ ރޭގެ ވަގުތެއްގައި ކަމަށެވެ. އަދި މައުމޫނުގެ ސިއްހީ ހާލުކޮޅު މިއަދު ގޯސްވިއިރު، މިއީ މިމަހުގެ އެކަން ދިމާވި ފަސް ވަނަ ފަހަރު ކަމަށް ފައިސަލް ވިދާޅުވި އެވެ.
ފައިސަލް އެގޮތަށް ވިދާޅުވުމުން ގާޒީ ނަޖީބް ވިދާޅުވީ އެކަމުގައި ގޮތެއް ނިންމަވާފައިވާ ކަމަށާއި މިއަދުގެ އަޑުއެހުން ކުރިއަށް ގެންދަވާނެ ކަމަށެވެ.
ދެ ގަޑިއެއްހާއިރަށް ދެމިގެންދިޔަ މިއަދުގެ އަޑުއެހުމުގެ މެދު ތެރެއިން ވެސް މައުމޫންގެ ވަކީލުން ވަނީ އެހެން ދުވަހަކަށް އަޑުއެހުން ފަސް ކޮށްދޭން އެދިވަޑައިގެންފަ އެވެ. އެކަމަކު ގާޒި ނަޖީބް ވިދާޅުވީ ކުރިން ވެސް ނިންމަވާފައިވާ ގޮތަށް ޝަރީއަތުގެ ކުރީގެ ހުށަހެޅުންތައް ހުށަހެޅުމާއި އެކަމާ މެދު ގޮތެއް ނިންމުން މިއަދު ކުރިއަށް ގެންދަވާނެ ކަމަށެވެ.
އަދުލު އިންސާފު ގާއިމްކުރަން ހުރަސް އެޅުމުގެ ދައުވާގެ އިތުރުން ޓެރަރިޒަމްގެ ދައުވާއެއް ވެސް މައުމޫންގެ މައްޗަށް ދައުލަތުން ކުރެ އެވެ. އެ މައްސަލަ ކުރިއަށް ގެންދަނީ ވަކިންނެވެ.
