ސިވިލް ކޯޓުގެ އަމުރަކުން ހުއްޓާލަން އަންގާފައި ވަނިކޮށް، އިއްޔެ ބޭއްވި އެމްޑީޕީގެ ރިޔާސީ ޕްރައިމަރީގައި ހަމައެކަނި ވާދަކުރެއްވި ކެންޑިޑޭޓް، ކުރީގެ ރައީސް މުހައްމަދު ނަޝީދު 43،922 ވޯޓު ހޯއްދަވައި އެ ޕްރައިމަރީ ކާމިޔާބު ކުރައްވައިފި އެވެ.
މި ނަތީޖާއާ އެކު މި އަހަރުގެ ސެޕްޓެމްބަރު މަހު ބާއްވާ ރިޔާސީ އިންތިޚާބުގައި އެމްޑީޕީގެ ކެންޑިޑޭޓަކީ ނަޝީދު ކަމަށް ވިޔަސް އެމަނިކުފާނުގެ ނަންފުޅު އިލެކްޝަންސް ކޮމިޝަނުން ގަބޫލުކުރުމާ މެދު ވަނީ ސުވާލު އުފެދިފަ އެވެ. ސަބަބަކީ، އެއީ 13 އަހަރުގެ ޖަލު ހުކުމެއްގައި ހުންނެވި ބޭފުޅަކަށް ވާތީ، ސިޔާސީ ހަރަކާތްތަކުގައި ބައިވެރިވުމުގެ ހައްގު ނަޝީދަށް ގެއްލިފައިވާ ކަމަށް އިލެކްޝަންސް ކޮމިޝަނުން ބުނެފައި ވުމެވެ.
ރޭ ފަތިހު އިއުލާން ކުރި، ވަގުތީ ނަތީޖާ އިން ދައްކާ ގޮތުން ވޯޓުލީ 44،011 މީހުންގެ ތެރެއިން ނަޝީދާ އެއްކޮޅަށް ވޯޓު ދިނީ 43،922 މީހުންނެވެ. ނުފެންނަ ވޯޓުގެ އަދަދަކީ 14 އެވެ. ބާތިލް 75 ވޯޓެވެ.
އެމްޑީޕީގެ އަސާސީ ގަވައިދުގައިވާ ގޮތުން، އެ ޕާޓީގެ ރިޔާސީ ޕްރައިމަރީގައި އެއް ކެންޑިޑޭޓަކު ނުކުތަސް، ހޯދަން ޖެހެނީ 10 ޕަސަންޓު ވޯޓެވެ.
ވަގުތީ ނަތީޖާ ދައްކާ ގޮތުން، ނަޝީދަށް އެންމެ ގިނަ ވޯޓު ލިބިވަޑައިގަތީ އެމަނިކުފާނަށް އަބަދުވެސް އެންމެ ތާއީދު ބޮޑު މާލެ އާއި އައްޑޫންނެވެ. އެގޮތުން، މާލެ އިން 5،439 ވޯޓު ހޯއްދެވިއިރު އައްޑޫން ލިބިވަޑައިގަތީ 3،942 ވޯޓެވެ.
އެމްޑީޕީގެ ރިޔާސީ ޕްރައިމަރީ މި ބޭއްވީ، ނަޝީދަކީ ޖަލު ހުކުމެއްގައި ހުންނެވި ބޭފުޅަކަށް ވާއިރު، އެމަނިކުފާނު ބައިވެރިވެވަޑައިގެން ބާއްވާ ޕްރައިމަރީއެއް ގަވާއިދާ ޚިލާފު ވާނެ ކަމަށް އިލެކްޝަންސް ކޮމިޝަނުން އަންގައި އެކަން އެގޮތަށް ނުކުރުމަށް ސިވިލް ކޯޓުން އަމުރުކޮށްފައި ވަނިކޮށެވެ. އަދި އެ އަމުރާ އެއްގޮތަށް، ފުލުހުން ވަނީ ބައެއް ވޯޓު ފޮށިތައް ވެސް ގެންގޮސްފަ އެވެ. އެކަމަކު ވެސް، ވޯޓު ފޮށީގެ ބަދަލުގައި ކޮތަޅާއި ޑަބިޔާ އާއި ދޮންނަ މެޝިނާއި ކޮންގްރީޓް ގަށާ މެޝިން ފަދަ އެއްޗިއްސަށް ވޯޓު ކަރުދާސް އަޅައިގެން، އެމްޑީޕީން ޕްރައިމަރީ ކުރިއަށް ގެންދިޔައީ އެވެ.