ޖުމްހޫރީ ޕާޓީއާ ދާދި ފަހުން ގުޅިވަޑައިގެންނެވި، އެމްޑީޕީގެ ކުރީގެ ޗެއާޕާސަން އަލީ ވަހީދު ޖުމްހޫރީ ޕާޓީގެ ރައީސްކަމަށް މިއަދު ކުރިމަތި ލައްވައިފި އެވެ.
ސަރުކާރާ ދެކޮޅަށް ކުރި މޭ ޑޭގެ ބޮޑު މުޒާހަރާއަށް ފަހު އަމިއްލައަށް އަރުވާލެއްވިގެން ރާއްޖޭން ބޭރުގައި އުޅުއްވާ އަލީ ވަހީދު ޖުމްހޫރީ ޕާޓީގެ ސެކްރެޓަރީ ޖެނެރަލް އަހުމަދު ސަމީރަށް އަލީ ވަހީދު ފޮނުއްވި ސިޓީގައި ވިދާޅުވީ އޭނާ ޖޭޕީގެ ރައީސް ކަމަށް ކުރިމަތިލައްވަނީ އެ ޕާޓީ އިތުރު ހަރުފަތަކަށް ގެންގޮސްދިނުމަށް ކަމަށެވެ.
"އެންމެންނަށް ހަމަހަމަ، ގޮފިތަކުގެ ބާރުވެރި، އިންތިޒާމްވެފައިވާ ކޮމިޓީތަކެއްގެ ތެރެއިން ރާއްޖޭގެ ހުރިހާ ރައްޔިތުންނަށް ހާދިމް އިހުލާސްތެރި މަސައްކަތެއް ކޮށްދިނުމަށްޓަކައި ޖުމްހޫރީ ޕާޓީގެ ރައީސްކަމަށް އަޅުގަނޑު ކުރިމަތިލަމެވެ." ޖޭޕީ ލީޑަރު ގާސިމް އިބްރާހިމްގެ އެޑްވައިޒަރަކަށް މިހާރު ހުންނެވި އަލީ ވަހީދު ފޮނުއްވި ސިޓީގައިވެ އެވެ.
ޖުމްހޫރީ ޕާޓީ އަކީ އަލީ ވަހީދު ގުޅިވަޑައިގެންނެވި ތިން ވަނަ ޕާޓީ އެވެ. ކުރީގެ ރައީސް މައުމޫން އަބްދުލްގައްޔޫމްއާ އެކު ޑީއާރުޕީގައި ވެސް އަލީ ވަހީދު އިސްކޮށް ހަރަކާތްތެރިވެވަޑައިގަތެވެ. އޭނާ ސިޔާސީ ދާއިރާ އަށް ނުކުމެވަޑައިގަތީ މައުމޫނާ އެކު ޑީއާރުޕީންނެވެ. އަލީ ވަހީދު ވަނީ މިދިޔަ ދައުރުގައި ތޮއްޑޫ ދާއިރާގެ މެމްބަރުކަންވެސް ކުރައްވައިފަ އެވެ.
ފަހުން އެމްޑީޕީއާ ގުޅިވަޑައިގެން އެޕާޓީގެ ޗެއާޕާސަންކަން އަލީ ވަހީދު ކުރެއްވިއިރު އެޕާޓީ ލީޑްކުރެއްވި އެއްބޭފުޅަކީ އަލީ ވަހީދެވެ.
ބުރާސްފަތި ދުވަހު ބާއްވާ ޖުމްހޫރީ ޕާޓީގެ ކޮންގްރެސްގައި އެ ޕާޓީގެ އަސާސީ ގަވައިދަށް ބޮޑެތި ބަދަލުތަކެއް ގެނައުމަށް ވަނީ ނިންމައިފަ އެވެ. ޖޭޕީގެ ކޮންގްރެސްގައި ސިއްރު ވޯޓަކުން އިންތިހާބުކުރާ މުހިންމު މަގާމުތަކުގެ ތެރޭގައި ޕާޓީގެ ލީޑަރާއި ރައީސް އާއި ނައިބު ރައީސް އާއި ހަތަރު ނައިބު ލީޑަރުންގެ އިތުރުން ޒުވާނުންގެ ލީގާއި އަންހެނުންގެ ލީގުގެ ރައީސް އާއި ނައިބު ރައީސް އާއި ސެކްރެޓަރީ އާއި ދެ މެމްބަރުން ހިމެނެ އެވެ.
ޖޭޕީގެ ރިޔާސީ ކެންޑިޑޭޓަކީ ޕާޓީގެ ލީޑަރު ކަމުގައި އޮންނަ އޮތުން ބަދަލުކޮށް، ޕްރައިމަރީއަކުން ރިޔާސީ ކެންޑިޑޭޓް ހޮވާ ގޮތަށް އަސާސީ ގަވައިދު ބަދަލުކުރުމަށް އެ ޕާޓީގެ ކުރިއަށް އޮތް ކޮންގްރެސް އަށް ހުށަހަޅާނެ އެވެ. މީގެ ކުރިން ޖޭޕީގައި ރައީސް ކަމުގެ މަގާމެއް ވެސް ނޯވެ އެވެ. މިފަހަރު ކޮންގްރެސްގައި އެ މަގާމު އުފައްދަނީ އަލަށެވެ.